1 Cu Tiberius Caesar kedi tei kelu mmi kereiemengei bekum, Judea cuikui ga Pontius Pilate ne deuceudibe tei, nah Galilee ga Herod ne deuceudibe* tei, nah pe sinabe Philip ne Ituraea penai Trachon cuikui ga deuceudibe tei nah Lysanias ne Abilene ga deuceudibe tei, 2 Annas penai Caiaphas ne cingku kedibe ketei* ting dau, Zechariah napei, John da Tinggwang sam hetaideu gade gwang. 3 Cine pa Jordan cuikui lule ailam pelane ga mie eh kemaugilu kera ziemne helungkenreu duipum de ledeu gwang. 4 Caihakecibe Isaiah samdung kesanglaisiu ga raupwa kebam nzwa eh,

"Mige hetaideu gade makwa sah eh,

‘Rampaube lampui de mtei lulo,

Pe lampuidung tei mzui lulo.*

5 Langkam leune tei pui luzie,

nah lamlwatu nah kideutu leune tei hena dizie,

nah lampui kengkoidung de tei mzui dizie,

nah lampuidung kesia de tei mdui dizie,

6 nah mina pelane Tinggwang kelikelu de ngau zie.’"✝

7 Cine pe dade duipum tei zie lie kegwang maadibe dage John rangdi, "Nnui neidui namedung! Caune nnuide gwang kezeu lunghop gade pak lulo rangmriak beuno? 8 Ciziemne, helung nreulu kebui tsidung bui lulo, nah nnuikatei nnui lung gade, ‘Anui au anui pei Abraham bam lie,’ de eh rang cuh so, kedanemene Ih nnui dage rangla Tinggwang au aipau tsudung dele Abraham name teu cuhlu bui. 9 Iciu liede, mreu de au tsingbangdung mah gage kai dida. Cine tsingbang petsi keyi buila kemak keheibe de bi kaudi eh mi gage kelien gaidi zie." 10 Ge hemaabedung de pe dade keteu bamdi, "Iciucai anui daipai tei zie no?" 11 Nah pa penui sam keli eh rangdi, "Ncwa kena kebambe de kette kegahbe de mzibi maisia, nah ketyeipok kebambe de cinzwa teilu maisia." 12 Cidau heraha kehamedung de duipum tei zielie gwang, nah penui pe dage rangdi, "Keledeubo, anui daipai teilai?" 13 Nah pa penui dage rangdi, "Nnuide ha lulo de kebeu de swa ha si so." 14 Cidau reugwamedung de pecu keteu, "Nah anui daipai teilai?" Cine pa penui dage rangdi, "Magede süt eh, mede kenret rang mmau eh keuso, nah nnui ziehi dele mnunglu."

15 Nah minadung au reguisüt eh kwabam nah peciakne de penui lung gade John aipaude Khrista demi mebi de cet bam kapdi. 16 John keli eh, penui pelane dage ranggai, "Kesang Ih nnuide duile duipum tei, dede mige aswa de ngkieng gwa cuge gwang zeu, Ih au pe kila tei kera nah pe picum ria hiak kerade dui lie.* Pa Kemci Rabe nah mi le nnuide duipum tei zie. 17 Pe tsingdap au peba gala, pe hecaipung de gui mcigilu kerane, nah wheat pe bau gage hekwalu kerane. Dede pa perie de tei mmüt gai kelak mile ru dizie."

18 Ciziemne, ma kedadung kekiee de kecung eh, pa samliakeyi de pwa mina de ledeubeu. 19 Dede John deuceudibe Herod de pe swacingbe nau Herodia ziemne, nah pa ma kesiadung leune tei kedi ziemne kesiugai. 20 Cidungde pelane reu si eh pa John de hebaangki gage tui gaidi.

21 Cu ciciu eh mina pelane duipum tei luge, Jisu de de duipum teilu nah pa kekie tei kebam dau, tinggimdung ngkeidi, 22 nah Kemci Rabe pumbe rehi gade* tamhau nzwa pereu ga hung, nah tinggim gade makwa ge, "Nang au a na, akube. Ih ncu a suiyi luda," de eh gwang.

23 Jisu pe zierang ta tei mdeu kecu dau pa mmi camrei kenzwa ge di. Pa au (mina lungcet gade cai) Joseph na, Heli na, 24 Matthat na, Levi na, Melchi na, Jannai na, Joseph na, 25 Mattathias na, Amos na, Nahum na, Esli na, Naggai na, 26 Maath na, Mattathias na, Semein na, Josech na, Joda na, 27 Joanan na, Rhesa na, Zerubbabel na, Salathiel na, Neri na, 28 Melchi na, Addi na, Cosam na, Elmadam na, Er na, 29 Joshua na, Eliezer na, Jorim na, Matthat na, Levi na, 30 Simeon na, Judah na, Joseph na, Jonam na, Eliakim na, 31 Melea na, Menna na, Mattatha na, Nathan na, David na, ✝ 32 Jesse na, Obed na, Boaz na, Salmon na, Nahshon na,✝ 33 Amminadab na, Admin na, Arni na, Hezron na, Perez na, Judah na,✝ 34 Jacob na, Isaac na, Abraham na, Terah na, Nahor na, 35 Serug na, Reu na, Peleg na, Eber na, Shelah na, 36 Cainan na, Arphaxad na, Shem na, Noah na, Lamech na, 37 Methuselah na, Enoch na, Jared na, Mahalaleel na, Cainan na, 38 Enos na, Seth na, Adam na, Tinggwang na.