1 Pecai Jisu, Kemci Rabe le kepui tei eh, Jordan Reuki gade cailigwangdi, nah Rabe ne pecu renaamkang gage ngngwa gai, 2 cikade zie riakdai ge herakesiabe ne pecu kedakdi. Cipau tingdau pa magede tyei ma, nah cidungde cangdi ge pa mzeu di. 3 Ge herakesiabe pe dage rangdi, "Nang magade Tinggwang Nabe lie cai, aipau tsu de dage sam rang gailo iciude cide tangku kwak mmilu kerane." 4 Dede Jisu pecu keligai, "Kesanglaisiu ga ainzwa rau teula, ‘Mina tangku rünne le lungh gailak.’"✝ 5 Pecai herakesiabe pecu ngngwa hangdi nah kideu ga hegwangramdung pelane pecu keulia gai peting kedui nage gage. 6 Pecai herakesiabe pe dage rangdi, "Ih aipau pelane reu kengkieng nah penui kendu ncu peu zie, kedanemene cidungde acu pwapeu delu, nah Ih cide Ih peu keneume keheibede peu lubui. 7 Cine, nang a dwa keumie acu reca cai, cidungde pelane n gu dizie." 8 Dede sam keli eh, Jisu pe dage rangdi, "Kesanglaisiu ga ainzwa rauteula, ‘Nang n Tinggwang Rampaube de reca zie, nah nang pe gwa rünne tei zie.’"✝ 9 Pecai pa Jisu de Jerusalem ga ngngwa gwang lwe pecu peu kerecaki peureu hutu ga bamlu, delwe pe dage rangdi, "Nang Tinggwang Nabe liecai, aika de cak mie gai pielo. 10 Kedanemene ainzwa rauteula,

‘Pa n ziemne tinggimgwame de ajadung kai gai zie, ncu gumlu kerane,’

11 nah, ‘Penui ncu penui badung le pwa cuhlu zie,

iciu eh nang tangtsu gage n pi sam melu kerane.’"✝

12 Dede sam keli eh, Jisu pe dage rangdi, "Kesanglaisiu ga ainzwa rangla, ‘Nang n Rampaube Tinggwang de kehedei gage kailak.’"✝

13 Herakesiabe mdakkepie leune teicangdi ge, tingkak ke pe dade tetdi.

14 Ge Jisu Kemci Rabe kengkieng gade Galilee ga cailigwangdi, nah pe hadung twagwa kebam cuikui pelane ga rangpupbak ladi. 15 Nah penui synagoguedung ga pa mide ledeu cuhdi, mteibena twa pung eh.

16 Cu pa pecu nkwet cuh kecu nam, Nazareth ga gwanglu, nah pe zai ge nzwa, pa Sabbath benai synagogue ga lütlu, nah pa pei sahbak gai kera cuh saplu. 17 Ge pecu caihakecibe Isaiah laisiudum* de peu. Pa laisiudum letlu ge ainzwa rauteu kela de ngaulu,

18 "Rampaube Rabe ada la,

kedanemene pa samliakeyi pwa kegahme de ledeu lo acu keniaklu.

Pa acu hebaangmedung de suirang paulia kera langgai,

nah miakcitme de peu mangaudailu kera,

nah tei kehereikelame de lungmpet kera,

19 nah Rampaube suiyi mmi de sahgailu kerane."✝

20 Ge pa laisiudum hezuidi eh, hegwa tei kebambe de peu daidi, delwe bamdi. Cu synagogue ga kebam leune pecu pielingci bam kapdi. 21 Pecai pa penui dage rang cuhdi, "Henai nnui kesiu gade Kesanglaisiu aide tei canglu da." 22 Nah mina pelane pecu twa kapti, nah pe mui gade ngaugia samdung rang kepet ziemne penui swagahdi, nah penui rangdi, "Aide Joseph napei meni?" 23 Ge pa penui dage rangdi, "Nnui mi rangla samgwa aide a dage rangbi zie, ‘Daru kecibo, n katei ncu tei mmi lulo. Capernaum gade tei kecu anui kesiudung de n ram gade de cide kesiakge teigai lo.’" 24 Dede pa rangdi, "Ih nnui dage rangsiakte liazie, caihakecime mige de de pekatei pe ram gade au yilie lula ma. 25 Dede kesangsiakpe gade Ih nnui dage rangzeu, ndaa Elijah kelung tingdau Israel ga hemipui kekiee ge bamla, cidau mmi kecum eh kei herok ting ge ngkuidi, cidau hangdeu pelane reu ga herakum kumgwangdi.* 26 Dede Elijah de penui mige dage de langgai ma, Sidon cuikui ga kelung hemipui Zarephath dage gwale.✝ 27 Nah caihakecibe Elisha tingdau Israel ga kempame kekiee la, dede penui migede de teimci beuma, dede Syriame pei Naaman de gwale."✝ 28 Ge penui sam aidungde siu luge synagogue ga kebam pelanene penui rata sütdi. 29 Cine penui cuhlu, delwe pecu namceu gwale teu mpetdi, nah penui renam teipwa kebam kideutu reu hetiatu gage pecu ngngwa nghang di, iciu eh pecu cikade kelui gaidi kerane. 30 Dede pa minadung kakgade zau eh, pa pe lampui le gwangdi.

31 Pecai pa Capernaum namdi ga nghungdi, Galilee deuzi ga, nah pa Sabbath benai penuide ledeu cuhdi. 32 Nah penui pe keledeu sam ziemne penui swagahdi, kedanemene pe sam ga au kengkieng bam kecune. 33 Cu synagogue ga mipei ge mcikemak rabe peda kela kauge bam, nah pa sahbak eh hap eh ranggai, 34 "Ha! Nazareth Jisu nang anui de teu daipai teilai? Nang anuide ngkapdi zielie gwang lani? Nang caubi Ih cibam, Tinggwang Kemcibe lie!" 35 Nah Jisu pecu kesiu eh ranggai, "Zing dedi, nah pe dade mpetdi!" Iciu ge herakesiabe minabe de keling mie minadung kakgage kaidi, delwe pecu teikeherei mezing eh, pa pe dade mpetdi. 36 Cine penui pelane penui swagahdi, nah ket ket dage rang eh, ranggai, "Aide dai sam no, pa aja nah kengkieng teu eh mcikemak rabedung de lang mpet nah penui mpetdi zeu kecu?" 37 Cine cuikui twagwapung kebam pelane ga pe ha rang gwangdi.

38 Pecai pa cuhlwe synagogue gade tet di, nah pa Simon ki ga lütlu. Simon nai mra eh mateei süt bam, cine pe ziemne pe dade penui nggia kiedi. 39 Cine pa pe taiga saplwe kemra de kesiugai ge cide pecu pütdi, iciu ge pa zette cuhlwe penui gwatei cuhdi.

40 Cu tingnaimiak nlwetdi lai kezeu dau, keheibe de mra eh mateei ketsamtsam kebam leunedung de peda penuide ngngwa gwang beu, nah pa cidung ket ket reu gage pe ba hwagai, delwe penuide tei ngkeibeu bamdi. 41 Nah herakesiabedung de penui kekiee ge dade mpetlu nah sahbak eh ranggai, "Nang au Tinggwang Nabe da!" Dede pa penuide kesiudi delwe peu penuide marang tadi, kedanemene penui pa Khrista kecu ci kedine.

42 Tingbalu ge, pa tetpwa heni mi kegah ga miedi, dede mina maabe pecu pei ladi nah peda gwanglu, nah pecu penui dade tetdi helo kaam kera teidi. 43 Dede pa penui dage rangdi, "Ih Tinggwang hegwangram samliakeyi teu namdi kedadung gade ledeu maisia, kedanemene aipau kiede ziemne acu langgailu."

44 Pecai pa Judea deuceu ga synagoguedung ga ledeu jüja ladi.