1 Cipau nai Moses laisiukwak gade pei sahbak gai, minadung dage, nah cide ga rawpwa kela ngaulu, Ammonme mede Moabme migede madaude peu Tinggwang mina ga si laklie kecu. 2 Kedanemene penui Israelme de taktyei nah dui pwa redau kemakne. Nah pa penuide peu reset kerane Balaam de lilu, dede anui Tinggwang reset cide pwa samlam ge teidi. 3 Nah cinzwa eh, Israelme hezai de siulu herizi, penui tingbung gade sangme peciakne de langgi di.

4 Cu, aipau dwa gade, cingkupei Eliashib, Tobiah de kenname ge, anui Tinggwang ki maniakibung pie rengeila. 5 Nah pa pe ziemne kibung kedige teleibeu, nah penui recadung kaibamla cikage: marim kehengui; nah kerecaki netdung; nah ciu zikerei zige makai, zau, nah maca, Levime, lei keteime, nah herieki kekwame de tei lulo kebeu; nah cingkume de reca kebeudung. 6 Nah aide aiciu kebamdau Ih Jerusalem ga bam ma. Kedanemene Babylon hegwangpei Artaxerxes hegwang teikelu mmi camreiekena bekum Ih hegwangpei da mie kedine. Nah pecai Ih tetkera hegwangpei dade keteulu.

7 Nah Ih Jerusalem ga caili gwanglu. Nah Eliashib Tobiah ziemne kemauta teikedi Ih cilu, Tinggwang ki gage pe ziemne kibung ge teigai kebeu. 8 Nah Ih cide a suita zingdi, nah Ih Tobiah ki niadung peciakne kibung gade kelien mpetdi. 9 Nah Ih ranggai ge penui kibungdung tei mcilu. Nah Ih cikage Tinggwang ki niadung, recadung nah kehengui de si eh kai caili gaidi.

10 Nah Ih Levime de pe mzi peubeu kemak, nah heta tei kebamme Levime nah lei keteime, mileunede pe luh riep gage pakgai kedi cilu. 11 Ih kedime dungde ngngwa repia, nah Ih ranggai, "Daitei eh Tinggwang ki de gidi no"? Nah Ih penuide qu hekwalu nah penuide peu penui bamga gwang bam dailu. 12 Nah Judahme pelane kerei zige ciu, nah zau, nah maca teugwang beu mabam hekwa kibung ga. 13 Nah Ih maniakibungdung kekwame de kedetlu: cingkupei Shelemiah, nah keraube Zadok, nah Levime pei Pedaiah; nah Zaccur napei, Mattaniah napei Hanan ne penuide kenghabe tei. Kedanemene penui au masanglie la, nah penui siname dungde ma mzibeu kera penuide nlumbeu.

14 Acu nsunglo, a Tinggwang, aide ziemne, nah Ih Tinggwang ki ziemne tei kegai nah ngha kegai ziemne a samsang ta keyi de hemaidi helo.

15 Cipau tingdau Ih Judah ga minadung sabbath benai kubetsidui tui bam eh ngau, nah minadung mei kekiee pwalwet eh, nah minadung gada reu gage hepwet tei kebam, zau liede, kubetsi, nah tangzüttsi, nah pe pwet ketsamtsam, nah minadung Jerusalem ga pwagwang Sabbath benai. Nah Ih aipaunai penui gu magede zwa helo de rang beudi. 16 Nah Tyreme cika lungh kebamme heka nah ma zwa kerabe ketsam tsam teugwang nah cidungde sabbath benai Judah leuhme dage nah Jerusalem gade de zwabam. 17 Nah Ih Judahme makecime de kesiu. Nah Ih penui dage ranggai, "Daino aide ma kemau nnui teikebam de, nah Sabbath tingba de teihera eh? 18 Nnui paume ndaa ainzwa teigai, nah anui Tinggwang kengkap aidungde pelane anuida nah namdi aikage kaigai beu meni? Nah nnui Sabbath teihera gai eh Israel reu gage rata teugwanggai si bam dida."

19 Nah cinzwa eh, Jerusalem herieki mui nlüt kedidau Sabbath dwa, Ih ranggai, nah kikamdung ngkuidi, nah Ih rangbeu cide ngkei laklie de penuide Sabbath cang kemakta. Nah Ih a mina rehangme kangge de peu herieki ga sap kwalu; Sabbath benai magede teu nlüt luma. 20 Nah heli keteime nah mania ketsam tsam kezwame Jerusalem namdi gwale piage mede piana bam dila. 21 Nah Ih penui dage mrairang, nah Ih penui dage rangbeu, "Daitei nnui herie dwaga kwa bamno? Nnui aiciu daicai, Ih nnui dage a ba kai dizie!" Cipaucai gwale, penui Sabbath ga gwang tadi.

22 Nah Ih Levime dage penuikatei penuide teimci lulo rangbeu nah gwang heriekidung kwa lulo de Sabbath tingba teimci lu kerane.

Aide ziemne de acu nsung gailo, a Tinggwang, nah n samkakkelu samsang kedi teu acu nggia gailo.

23 Cipau tingdau Ih Jewme Ashdodme, Ammonme, Moabme mipuidung de ngngwa lungh kebamde ngau. 24 Nah penui namedung, pempie ge Ashdodme let rangdi, nah migede Hebrew let rang cilu tadi, dede mi kedame let rangdi. 25 Nah Ih penuide kesiugai, nah penuide resetgai, nah penui midung gede dap, nah penui peutam pai gidi. Nah Ih penuide peu Tinggwang zi teu sampet lu: "Magade nnui nnui napui dungde penui napeime de peucai, mede magade nnui penui napuime gade nnui napeime ziemne, mede nnuikatei ziemne lucai! 26 Solomon, Israel gwangpei, ma aidungde ketei ziemne kemau tei meni? Dede heleuhdung kekiee kakgade pa kenzwa hegwang mide gah: nah pe Tinggwang pecu hung, nah Tinggwang pecu Israel pelane reu hegwang teibeu. Sangme puidung ne pecu depeu kemau tei. 27 Ciciude anui n kwa kingnei zieni, anui Tinggwang dage samsang mene aipau kesia kedi leune teigai kera, nah sangme pui dungde luu zieni?"

28 Nah cingku kedibe Eliashib napei, Joiada name gade hangge, Horonme pei Sanballat napui de pe naulu. Nah Ih pecu a taiga de langgi di.

29 Penuide nsunggailo, a Tinggwang, penui cingku tadung nah cingkume nah Levime ngngwa samkakkelu de tei hera kedi ziemne.

30 Ih penuide sangme zai pekiene gade teimci lu. Nah Ih heta tei kerane, mige ge kecude pe ta riep nlum beudi, cingkume ziemne nah Levime ziemne; 31 nah keru reca tei kerane peting dau tsingdiak teugwang kera; nah meitsi pet raitu kecudung ziemne.

Acu nsung lo, a Tinggwang, keyi ge ziemne.