1 Kei hena be kei raitube nai, mina pelane maage tei eh heni kemza Dui Rieki dwaga ngkwalu. Nah penui keraube Ezra dage RAMPAUBE Israelme dage kai kebeu Moses zai laisiukwak de pwagwang kera ranggai.* 2 Nah cingkupei Ezra hezai de mipei de nah mipui dwaga pwa mpetlu, nah siulu kebui leune ngkwa kebam dwa gage, kei hena bekei zie raitu benai. 3 Nah pa cide heni kemza ga Dui Rieki dwaga kebamde gade peigai, tingcang gade gwang tingna kecang, mipei nah mipui, nah siulu kebuime dwa gade. Nah Moses gu hezai laisiudum de minadung pelane kingnei sünne lu. 4 Nah keraube Ezra penui aide ziemne teipwa kebam tsingle teikelu bamra ga sapbam. Nah pe taiga, pe zetle sap kebamme: Mattithiah, Shema, Anaiah, Uriah, Hilkiah, nah Maaseiah; pe hilebie: Pedaiah, Mishael, Malkijah, Hashum, Hashbaddanah, Zechariah, nah Meshullam. 5 Nah Ezra minadung pelane dwa gade Moses gu hezai laisiudum de letlu, pa mina pelane reu kecehu ga sap kecune. Nah pa Moses gu hezai laisiudum letlu herizi, mina pelane cuh saplu.

6 Nah Ezra Rampaube kedi Tinggwang de twagai. Nah mina pelane penui ba hwacuh lwe sam keligai, "Amen! Amen!". Nah Rampaube de reca eh penui koktungmie hangdeu tunglu. 7 Nah Jeshua, nah Bani, nah Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah nah Levime ne mina dungde hezai de rangmci lia bamdi. Nah minadung penui bam ga bam. 8 Nah penui sünne eh laisiukwak gade peigai, Tinggwang zaide gade, nah pekie rangmci liagai. Nah penui pei kebamde ci mcilu.*

9 Nah Nehemiah, deuceudibe, nah Ezra, cingkube, keraube, nah Levime mina dungde rangmci lia kebamme dung, mina pelane dage rang, "Henai tingba au mci; cide nnui Rampaube Tinggwang ziemne. Nnui lung siaso nah hapso." Kedanemene minadung pelane penui hezai sam dungde siu kelucai hapbam kedine.

10 Nah pa penui dage rang. "Miecu, maca tyeilu nah kekumbe saklu, nah magede telei nzeu kemakme de kesa pwa peulu, kedanemene henai tingba au mci, anui Rampaube ziemne. Nah nnui lung sia so, kedanemene, Rampaube suiyi de, nnui kengkieng delu."

11 Nah Levime minadung pelane de kaamdi eh ranggai, "Matu so, kedanemene henai kemci tingba lu. Nah nnui lung siaso."

12 Nah mina pelane matyei nah sak kera nah taktyei mzi beu kera nah penui renga gai kerane tetdi, kedanemene penuide ranglia kegai samde penui ci kelune.

13 Nah kei hena be kei pekenabe nai, mina leune pautsa peume, cingkume, nah Levime keraube Ezra da gwang ngkwalu, hezai samdung de pei kerane. 14 Nah penui hezai dega raupwakela ngaulu Rampaube Moses dage aja kai kebeu de: Israelme de paiki ga lungh lulo kebeu kei hena bekei* hengyi tingdau; 15 nah penui kedame dungde depeu siu kerabelie de nah penui namdidung pelane ga nah Jerusalem ga paucang gailo de rang eh: "Lamlwa ga petcu, nah olive tsingkiakdung, maca tsingbangdung, nah myrtle tsingkiakdung, palm tsingkiakdung, nah tsingnei bang tsingkiakdung keugwang lu, rauteu kelanzwa, paikidung teilu kera ziemne."

16 Nah minadung mie tsingkiadung teugwanglu delwe mileunede pe ki reu gage, nah pe kisie gage, nah Tinggwang kigudung ga, nah Dui Rieki heni kemza de gage, nah Ephraim rieki heni kemzade gage penui kidung teilu. 17 Nah ngkwa kebam pelane, hebaang gade cailigwang kelume, paiki teilu, nah penui paiki ga lungh di. Kedanemene Israelme Nun napei Joshua tingdau gade cipaunai kecang ainzwa teilu kemak ziemne. Nah penui suiyi sütdi. 18 Nah pa tingba ramsangne, tingbazie raitu gade kamtu benai kecang Tinggwang zaikwak gade peigai. Nah penui lang hena ne hengyi lu, nah lang heset ne benai hezai ga raupwa kelade nzwa eh hemaabe ngkwalwe kemci renet de teilu.