1 Nah pekei zie* ngkaiemdai benai Israelmedung rosopai bahlu nah penui peu gage rebui pwetlu, delwe mmwang kera gwang ngkwalu. 2 Nah Israel leuh penui sangme leune dade mpet ntsamlu. Delwe penui sap eh, nah penui teimau kedi penui mau petlu, nah penui paume batadung gade teimau kedidung mau petlu. 3 Nah penui bam gade penui saplu, nah bamdakkak kecum ge penui RAMPAUBE penui Tinggwang zaide peibak degai, nah bamdakkak kecum ge penui mau pet eh RAMPAUBE penui Tinggwang de koktungmie recalu.

4 Nah Levime pihidok bamga Jeshua, Bani, Kadmiel, Shebaniah, Bunni, Sherebiah, Bani nah Kenani saplu. Nah penui RAMPAUBE penui Tinggwang dage kekie tei sahbak di. 5 Nah Levime, Jeshua, Kadmiel, Bani, Hashabneiah, Sherebiah, Hodiah, Shebaniah nah Pethahiah, mina dage rangdi:

"Cuh saplu! Nnui RAMPAUBE Tinggwang de twalu kelungta nah kelungta twalu! Nah peu penuide n zi kemdu de twalu, samlam nah hetwa pelane reu peu pe zide hetwa pung kelube tei lulo. 6 RAMPAUBO, nang rünne RAMPAUBE: nang ne tinggimdung nah ting ga hegidung nah tinggimgwame pelane teigai, kideu nah cika kebam pelane, jaaidi nah cika kebam pelane; nah nang ne ma pelane de kering peu; nah tinggimgwamedung penui keumie ncu reca la.

7 RAMPAUBO, nang au Abram de kedet kelube Tinggwang. Nah nang pecu Chaldeeme deu* Ur gade ngngwa mpetlu. Nah, nang pe zi ‘Abraham,’ de msiaklu. 8 Nah n dwade pa masang kecu nang ngaulu: nah nang pecu ngngwa samkaklu, Cannanme deu, Hittime, Amorme nah Perizzitme, Jebusme nah Girgashme deu pe leuhme de pwapeu kera; nah nang n samdungde tei luda, kedanemene nang au samsang kecune.

9 Nah nang dainzwa eh anui paume Egypt ga keherei bi kecu ngaulu, nang penui nggia kiekegai kwa Jaaidi Kegie de gade siulu. 10 Nah nang Pharaoh *de marengei nah miswakegah batadung teilia gai, nah pe kilame pelane dage, nah pe deuga mina pelane dage, kedanemene penui n minadung dage daikenzwa gede penui zaisiabi kecu ci kebamne. Nah nang nzi teilu, nah cide henai kecangde bam. 11 Nah nang penui miak dwa gade jaaidi de zina teidi, nah penui jaaidi sum gade kecang deu ga tetkah mpetlu. Nah nang penuide gwazui kelame de dui kecok ga nlimdi, tangtsukang ge dui kedi ga nlimmie kedinzwa. 12 Nah nang ting kebaa dau hemwa gele penui lampui saubeu, nah tingmui mi le saubeu penui lampui tei mbaa eh peu penuide tet kera lampui pwalu kerane. 13 Nah nang Tinggim gade Sinai deutu ga nghunglu delwe penui dage marang. Nah penuide kesamsang tutiak nah hezai kesangbedung, hezai keyidung nah ajadung pwapeu. 14 Nah nang penuide n kemci sabbath de peu cigai. Nah nang n kilabe Moses dage penuide hezaidung teimzai lulo peugai. 15 Nah nang penui mzeu ge penuide tinggim gade tangku peu, nah nang penui hereu luge tsurakang ge gade dui lwapet eh peu penuide sak. Nah nang penuide peu zielie kebeu deu dega lütlwe gumlulo nang penuide rangbeu.✝

16 Dede penui nah anui paume ngangdi. Nah penui penui lung takdi nah n ajadung mzai tadi. 17 Nah penui siu laklie di, delwe nang penui kakgade n miswakegah batadung leune nang teikegai nsungtadi. Nah penui ngang eh muiteu ge de kedetlu penuide Egypt ga mi baang tei kera ngngwa cailigwang dai kerane. Dede nang au kemau gibeu kela Tinggwang, mide ngaunggia nah kula, n rata mneula nah n sampetdung ga samsang bam muila, nah nang penuide gidi ma. 18 Penui ziemne penui ketumseu mie ge teilu eh, ‘Aide nnuide Egypt gade ngngwa mpet kebeube nnui Tinggwang da,’ de eh rang, delwe penui ncu rangkemsia kedi teidi,* 19 iciude nang au, n ngaugia kedi dene penuide hetaideu gage gidi ma. Pa tingkebaa dau penui lampui sau kelia hemwa penui reu kelade nah tingmui mi le pwa penui lampui tei mbaa beu eh penui ziemne tetgai kera lampui saubeu keugi dima. 20 Nah nang n zaikeyi gade penui teimai kesiabe ranglia. Nah nang penuide peu manna tyei ta dima nah penui hereu kedidau nang penuide dui sak kera peu. 21 Nah nang penuide hetaideu ga mmi riakdai peu ring lalu; penui magede teumai kesiabe bam dima. Penui painidung hak dima, nah penui pi teei eh mma dima. 22 Nah nang penuide peu heleuhdung nah hegwangramdung gwalu, nah nang penuide hangdeu petündung ga kecang kaipwa beu. Delwe penui Sihon deude gwalu, Heshbon ne hegwang tei kebam deude, nah Bashan deude Og hegwang tei kebam deude. 23 Nah nang penui namedung tinggimdung ga hegidung kieege teingkiee beu. Nah nang penui paume dage sampet kebeu deude gage penuide ngngwa gwang beu hangdeu cide gumlu kerane.

24 Penui namedung lütlwe Canaanme deude gwalu, delwe nang mina cika lungh kebamme dwa gade penui reu ngkienglu. Nah nang penui ba gage, cipau hegwangpeidung, nah cika kelunghme dungde, peu penui keneura tei lukebui kengkieng peu. 25 Nah anui paume hangdeu keyidung nah riekelu namdidung the tuilu. Nah penui makeyi leune pui kebam, tekwa kui kelube dung, kubeluhdung, nah Olive luhdung, matsibangdung kekieege kebam kidung gumlu. Nah penui tyei keneu leu tyei mnung lu nah penui luo petdi delwe nang penuide ma keyibe kepeu leune teu eh kehega lu.

26 Nah penui nsam mzai tadi nah ncu mlaidi; nah penui n zai de penui caile ge kaidi. Nah n caihakecime penuide peu nda nreu cailigwang dailu kerane zierang keteime de penui teitsetdi. Nah penui kemau kedi teigai di. 27 Nah nang penui ngauraume ba gage penuide kaidi, nah ngauraume penuide teikeherei. Nah penui keherei keludau n dage penui nggia kiegai, nah nang tinggim gade siulu. Nah, n ngaugia kedi gade, nang penuide kelibeu kerame pwapeu, nah penui ngauraume ba gade penuide kelibeu.

28 Nah lungciep penuida gwang luge, penui ndwa gade kemau teidai di. Nah nang penui ngauraume ba gage penuide kaidai di, nah ngauraume ne penui reu teudi. Nah penui nreugwang ndage penui nggia kiegai, ge nang tinggim gade siulu delwe penuide pia kekiee ge kelibeu n ngaugia kedi de ziemne. 29 Nah nang penuide nreugwang n keledeusamdung mzai dailu lulo mrai ranggai. Dede penui ngangdi nah n zaidung mzai tadi. Nah, nang rangkegai samdung, penui cidungde kingnei ma, cide, magade mige mzai lucai, pa cidungde teu lungh zie. Nah penui n dage penui lung takdi nah ngang eh, kingnei raudi.

30 Nah nang penui dage mmi kekiee ge nlung tie gwang nah n rabe gade caihakecime lung teibeu eh penui dage mria ranggai, dede penui kingnei tadi. Nah nang penuide penui ngauraume ba gage kaibeu di. 31 Dede, n ngaugia kedi gade, nang penuide ngkapdi ma, nah nang penuide gi dima. Kedanemene nang au mide ngaungia nah mide hungkela Tinggwang kecune.

32 Cine cu, anui Tinggwang, kedi, kengkieng, nah kehing Tinggwang, samkak kelude nah samkakkelu samsang kaizeu kelabe, peu n dwa gade anui keherie kegai pelane de peu kemta ge diso, Assyria gwangpei tingdau gade henai kecang anuida keherei kegwang, anui gwangpeidung, anui muiteumedung, anui cingkume nah anui caihakecime, anui paume nah n leuhme peciakne da keherei kegwang dungde. 33 Nah anuide saja kepeu leune ga nang au masang da. Kedanemene nang au samsang la; dede anui ziemne au, anui kemau tei sütdi. 34 Nah anui gwangpeidung, anui paume, anui muiteume nah anui cingkume nzai de mzailu tadi. Nah penui n zaidung penui lung gage kaizeu luma mede nang penuide mraisamdung rang kebeude n sam kingnei luma. 35 Nah penui hegwangram gade penui n gwatei ma, nah nang n zaiyi eh penuide samlam beu, nah nang hangdeu keyi kemza penui dwa gade penuide pwa peu liede, penui kemau ketei gade nreu luma.

36 Ainie henai anui; anui au hebaangme ge dida. Nah nang anui paume de taktyei kepeu hangdeu keyi aika; ainie anui au, anui hebaangme teila dida!* 37 Anui kemau tei kedine hangdeube gade luhlüt kelube hegwangpei nang anui reu gage kai kebeube da gwang dila, nah penui anuide nah anui kauruine de teu penui sui teila. Nah anui au kehereisüt ladi da.

38 Nah aidungde pelane teikedi ziemne, anui samsang eh samkak kelude raugaila, nah anui muiteume, anui Levime nah anui cingkume cika ge penui kaugiak giak gaila.