1 Nah cinzwa eh, Sanballat anui kirie de teidai aulie kecu siu luge, pa deigadi, nah pe rata sütdi. Nah pa Jewmedung de keu henui teidi.

2 Nah pa pe zangme nah Samaria reugwame dwade rangdi, "Kemnei Jewme aidungde penui daipai tei aulie cet lano? Penui namdi de penui ziemne teimcang dailu kera cet lani? Penui pum kaibeu zieni? Penui tingnaige gage teicanglu builie eh cet lani? Penui mimütdung le pwa tangtsudung teilu buini, cidungde ru kedi caine de?"

3 Ammonme pei Tobiah pe taiga bam. Nah pa rangdi, "Yeo, penui tsukwa hekwa kebam dega magade maiserung ge pereu ga nghang zie liecai, pa penui tsukwa kirie de tei ngkaudi lubui."

4 Dede Ih Tinggwang dage kekie tei, anuide nuinue kebamde ne, nah penui rangmsia kebamde peu penui peuga gwangdi lulo. Nah penuide tuiteu eh peu sangme deu ga hebaang teidi lulo. 5 Nah penui kemau tei kedidung penui mau gibeu so, nah penui maudung n dwade kemaigi diso, kedanemene penui anui heta tei kebamme dwade kii lalu.

6 Cine anui kirie de hekwacuh, nah kirie pelane pempie ge gage keriangkeu cuhlu. Nah minadung heta tei kera lung pung bam kedine.

7 Nah cinzwa eh Sanballat, nah Tobiah, Arabme, nah Ammonme, nah Ashdod namdi medung, Jerusalem kirie tei cuhlu zeu delie kecu nah kirie ga ketiet kidung ngketdi zeu delie kecu siu luge, penui rata sütdi. 8 Nah penui pelane ngngwa heciem riem bamdi, gwang Jerusalem de regi kera nah cide de tei kebwak gai kera. 9 Nah anui anui Tinggwang dage kekie teigai. Nah anui minadung de peu tingmui tingba penuide renia kerane kwa bamdi.

10 Nah Judahme suisiet leige teigai,

"Hepütdung pung kebamme kengking nnei dizeu da, nah cika kehera kieesüt bam.

Nah anui ziemne au, anui kiriebe hekwa gailak di zeu da."

11 Nah anui ngauraume rangdi, "Penui cilak, nah anui penui kakga gwang eh penuide teitsetdi kemaktane penui ngaulak. Nah anui bata de tei mtak dizie."

12 Nah cinzwa eh, ngauraume taiga lungh kebam Jewme kegwang dau, penui anuida pia kerie ge rangdi, "Keheiga ge nnui nreugai liede, penui anuide renia zie!"

13 Nah Ih kirie caiga heni kehena ga, mine kengau ni ga minadung de peu bamlu; nah Ih minadung de peu penui kingtiedung, penui hengeidung, nah penui lakpidung pwalu, delwe penui pautsa rehi gade peu bamlu. 14 Nah Ih piegai, nah Ih cuh saplu, delwe makecime, nah kedime, nah mina pelane dage ranggai, "Anui ngauraume de hing so. A Rampaube au dai dige dibi nah hingbi kecu nsung lulo! Delwe nnui ramme ziemne, nnui napei nah nnui napui, nnui naudung, nah nnui kidung ziemne keregi lu."

15 Nah cinzwa eh, anui ngauraume penui riempwa kebamde anuine cipwadi delie kecu ha suilu, nah Tinggwang ne penui riempwa kebam de ngamkedi cilu, anui pelane kirie teidai kerane, mina keheibe de pe ta ga cailigwang di. 16 Nah cinzwa eh, cipaunai gwale de, a minadung pempie ge bata tei, nah pempie ge, hengeidung, hegeudung, nah lakpidung, nah hekakrakcum pwalwe kwa eh saplu. Nah muiteume Judahme kilungme pelane cai sapbeu. 17 Kirie hekwa kebamme, nah penui ngha pelane peugai bata tei kera niadung pwa kecume de pe ba bage lam bata tei nah kedale ba hereunet pwa. 18 Nah bata keteime mina keheibe de pekia gage kingtie ge keupung kap. Nah hemeuseu kii kekwabe a taiga bam.

19 Nah Ih minadung pelane nah penui reu makecime nah muiteume dage rangdi, "Bata tei hemisüt nah tei mdipet kedine, nah anuide kirie de ne, mige pe sinabe dade tsamdi nah mdeila dida. 20 Nnui hemeuseu kii kwa de siude, nnui anuide cika ngngwa gwang ngkwalu, Anui Tinggwang anui ziemne regi beuzie."

21 Cine anui tingba ramsang tingcang nuge gade tingmui hegi pet kemaktane pempie ge kirie reuga bata tei nah pempie ge hengei pwa sap ntiprip eh kwa. 22 Aiciu eh, aipau tingdau Ih minadung dage ranggai, "Peu mipei nah pecu kenghame peciakne Jerusalem nam sumga gwang bam kera tingmui, delwe penui tingmui anui ziemne namdibe de kwa luzie nah tingna bata teilu kerane." 23 Nah Ih mede, a siname mede a kilame de, mede mipei a caiga kwa kebambe de, migede anui painidung ra ma, mede dui sak kecudau migede pe reunet ra dima.