1 Nah mipeidung nah penui naudung sahbak gai, penui kangme, Jewmedung de ncam eh.

2 Nah cika midungge rangdi, "Anui napeidung nah anui napuidung au kiee süt. Nah anui ciu keu lugo, ciude anui tyei nah ring bamlu kerane."

3 Nah cika midungge rangdi, "Anui anui luhdung, nah anui kubetsi luhdung nah anui kidung bamdo bam dida, iciu eh anui herakum kum kecudau ciu luilu kerane."

4 Nah midungge rangdi, "Anui anui luhdung nah anui kubeluh dungde hegwangpei raha ha kerane rangkanggeu releu dida.

5 Nah cu au, anui caihereibe pumteih de anui pumteih nzwada, penui napei dungde anui napeidung nzwada. Nah ainie, anui au anui napeidung nah anui napui dungde hebaang tei kera gage tuigai dida. Midungge anui napuidungde hebaang tuizwa dida, nah Tinggwang ziemne anui ba ga magede gah da kedanemene anui luhdung nah anui kubetsi dungde migu di delu."

6 Nah penui ncam kwadung nah aipau samdung de Ih siu luge Ih a rata sütdi. 7 Nah a lung gade cetgai, nah Ih makecime dungde nah kedime de mlaidi. Delwe Ih penui dage rangdi, "Nnui pekai keu bam dida, nnui katei nnui kangme Jewme dade!" Nah Ih penui ziemne maadibe ngkwa qu hekwa gai.

8 Nah Ih penui dage rangdi, "Anui teilu kebui rehi gade, Jewme, anuikatei anui siname heleuhbe da zwa kedime dade lui caili dailu. Dede nnuikatei liede nnui siname de zwa la, nah anuine penuide lui caili dai bamla!" Ge penui mlei tadi, nah penui nzeu magede rang kera gahdi.

9 Nah Ih ranggai, "Aide yi ma, nnui tei kebam tadung de. Nnui anui Tinggwang mie kehing gade tet kerabe meni, anui ngauraume, heleuh renia kebamde ziemne?* 10 Delwe, Ih liede, a kibaume, nah a rehangmedung penuide rangkanggeu nah ciu releu beu bam dida. Kehereide, anui pekai keu kecude püt digo! 11 Kehereide, henai gage, penui luhdung, penui kubetsi luhdung, penui olive bangdung, nah penui kidung nah rangkanggeu haige de nah ciudung, zau keheci, nah nnui penuide maca releu keladung de penuide peucaili dai dilu."

12 Nah penui rangdi, "Anui peucaili dai dizie, nah anui magede penui dade kiedai lakta. Aiciu eh nang kerangde nzwa eh anui tei luzie." Ih cingkume de qulu delwe Ih penuide aipau samde nzwa eh mneilu kera peu penuide sampetlu.

13 Pecai, Ih a pai kecunggai eh, Ih ranggai, "Ainzwa eh peu Tinggwang de nnui sampet de mnei kemak keheibede nnui kidung gade nah nnui mabam gade kecung gaizie.* Nah ciciu eh pecu kecung gai eh peu magede bangbeu ta dizie."

Nah hemaabe pelane rangdi, "Amen!" Nah penui RAMPAUBE de twagai, nah minadung aipau sam rehi gade teilu.

14 Judahme deuga acu penui gu kedibe tei kera pane kedet kelu benai gade, Hegwangpei Artaxerxes hegwang teikelu mmi ngkai be kum gade gwang mmi camreiekena kecang de, mmi kereiekena, Ih akatei mede a kilungme kedibe gu taktyei tyei ma. 15 Dede ndaa a dwale kedime minadung de teikeherei bamla, nah penui rangkanggeu shekel riakdai* gage si eh ketyeipok nah zau de penui dade luu bamla. Cipau nreude penui rehangme kecangde mina reu kengking teu bamla. Dede Ih Tinggwang mie kehing gade, akatei cide nzwa tei ma. 16 Yeo, cipau nreude Ih a bata ketei aipau kirie gage kai nah anui au luhdung kette luima. Nah a rehangme peciakne cika makam ketei ziemne kangbau gai.

17 Cu au Jewme nah kedime mipei 150 ge de ngngwa a taktyei bam ga bam, anuide twagwapung kebam heleuh gade anuida kegwangme de si eh. 18 Nah tingba ramsangne lang beula kecube cai ketumseu ge, meurün mci kecube herok, nah nruinedung a ziemne langbeu la, nah lang kereine kakga zau ketsamtsam kekiee ge puinlim eh peula. Cine cide gade Ih deuceudibe taktyei de kie lama, kedanemene aipau minadung de keherei kecune.

19 Ih n dage kie gaila, a Tinggwang, mina aide ziemne makeyi leune tei kegai de, acu nsung gailo.