1 Nah cinzwa eh, Sanballat penai Tobiah, nah Arabme pei Geshem, nah anui ngauraume kedame, Ih herie tei canglu delie kecu nah cika ketietki bamsi medelie kecu siu luge (cidau tingde Ih heriekidung gage kikam kai canglu mereu liede), 2 Sanballat penai Geshem a dage sam aide langgai eh ranggai, "Gwanglo, nah anui peting ge riemlwe Ono langkam ga renam ge gade gwang redau go." Nah penai a dage makesia teigai kera cet bamdi.

3 Nah Ih penai dage samgwame de langgai, rang eh, "Ih bata kemlang ge tei au, nah Ih nghung daugai laklie. Daitie peu bata de mtak dilai Ih cide gidi eh nah nnai taiga nghung kera?"

4 Nah penai sam aide nzwa pia mdai langpwa a dage kaigai, nah sam aide nzwa Ih penai de samli beudi.

5 Pecai Sanballat pegu rehangme de pia pe mengeibe a dage langgai sam aide nzwa, nah gum kemak laisiu ge peba ga bam. 6 Cide ga ainzwa raupwala, "Nang nah Jewme kedame keregi kera cet bamlie kecu, heleuhdung kakgade siu eh nah Gashmu rang kecu au ciziemne nang herie de teuncuh dai aulie de. Nah aipau sam riade gadecai nang ne penui reu hegwang tei zielie zeu. 7 Delwe, nang Jerusalem ga caihakecime de nlum pwa bamlie zeu, rang eh ‘Judah ga hegwangpei ge bam!’ de eh sahgai kerane. Nah cu, aipau samde hegwangpei siu luzie. Cine cu, gwang eh anai ngngwa kempau lugo."

8 Nah Ih samli ge pe dage langgai, rang eh, "Magede cikenzwa ta teima sam aide nang rang kebamde rehi gade au, dede nang cide nkatei n lungcet gade mpwak kecuge da."

9 Kedanemene penui pelane anuide keheu eh ranggai, "Penui bata dungde gade mtak dizie, nah cide teicang luta dizie." Dede Ih kekie tei, acu teingkieng beulo.

10 Nah pecai, Ih Delaiah napei, Mehetabel tsapei, Shemaiah ki ga lüt, nah pa tetpet mene bam. Nah pa rangdi, "Anai Tinggwang ki, kerecaki lung gade redau kera peting ge riet golie. Nah anai kerecaki kikam de ncap digo, kedanemene penui ncu teitset di kera gwangla delu. Yeolie, penui ncu teitset di kera tingmui gwangzie."

11 Nah Ih rang, "Ih kenzwa mipei ge pakdi zieni? Nah cau, Ih kenzwage, kerecaki ga nlüt eh nah lunghlu bui ni? Ih lütlak!"

12 Nah Ih cilu, nah piegai, Tinggwang ne langgai ma pecu. Dede pa cairasam rangpwa acu rangmsia, kedanemene Tobiah nah Sanballat ne pe zie lipwa pecu langgai. 13 Pecu aipau tade ziemne pe zie lilu hetau henim rangkang le, iciude Ih hingdi kerane, nah Ih cidungde teidi eh kemau teidi kerane. Nah penui acu peu hezi kesia ge punglu kerane, iciu eh penui acu rangmsialu kerane.

14 Ih kekie tei, a Tinggwang, nsung gailo Tobiah nah Sanballat de, pe bata aidungde tei kegaide nzwa eh, nah caihakecipui Noadiah de de, nah caihakecime kedame acu keheu kelamedung de.

15 Nah tingbazie riakngeiekena cai Elul bekei* zie ngkaiemengei benai herie pelane tei cangsiak lu. 16 Nah cinzwa eh, anui ngauraume pelane siu keludau, anuide twagwapung kebam leuhdung pelane ngngi di, nah penui penui zu hengam le puipung di. Nah penui aipau bata de anui Tinggwang ne teigai lie kecu cilu. 17 Nah, cipau tingdau, Judah muiteume penui laisiudung kekiee Tobiah da langgai bam, nah Tobiah gu laisiudung penui da gwang bamdi. 18 Judah ga mina kekiee ge pecu sampetlwe kebamne, kedanemene pa au Arah napei Shekaniah napui nahpei. Nah Jehohanan pe napei ne Berechiah napei Meshullam napui de luu ludi. 19 Cipaureude, penui a dwa gade pe bata keyi leune rang, nah penui Ih kerangbe pe dage paubeu ciau la. Tobiah acu keheu kerane laisiudung langgai bam.