1 Nah aide hegwangpei Artaxerxes hegwang tei kebam mmi 20 bekum Nisan bekei* dau, zau pe dwa ga bam. Nah Ih zau de pwalu, nah Ih hegwangpei de peudi, nah Ih au pedwa gade a suisia eh bam ma.

2 Nah hegwangpei acu keteugai, "Dai ziemne n suisia lano? Cu n ziemne au, nang au mra ma. Aide au madema helung siacu gwale." Nah Ih au ngngi sütdi.

3 Nah Ih hegwangpei sam keligai, "Peu hegwangpei de kelungta ringkelube tei lulo! A paume de kekung namdi de kaudi da, nah pe namdi heriekidung de mi ne ru msia süt dida, Ih daitei eh a suisia melu laino."

4 Nah hegwangpei a dage rangdi, "Nang dai luuneu lano?" Nah Ih tinggim Tinggwang dage kiegai.

5 Nah Ih hegwangpei dage ranggai, "Magade hegwangpei pe sui liecai, nah n kilabe n dwa gade petau liecai, acu peu Judah ga, a paume de kungpwa kebam namdi de ga mielo, nah Ih cide tei dailu kerane."

6 Nah hegwangpei hegwangpui pe taiga bam eh acu keteugai, "N beuh daidau kecang zieno?" Nah nang daidau cailigwang daizie no? Nah hegwangpei pe suilu, nah pa acu langgai, nah Ih pecu peting ranglia beudi.

7 Nah Ih hegwangpei dage ranggai, "Hegwangpei pesui liecai, acu peu Euphrates Reuki kenlwetle deuceu deuceudime ziemne laisiudung peulo, iciu eh penuide peu Ih Judah ga kelüt ga kecang acu peu kahgwang lu kerane; 8 nah Asaph, hegwangram hegung kekwabe dage de laisiu kailo, ciude pa acu kengking reketbam riekidung tsiadung kai kerane tsing peulu zie, cide ki ziemne, nah namdi kirie ziemne, nah Ih lungh kera ki de ziemne."

Nah hegwangpei acu peu, Tinggwang acu ngngwa kelane. 9 Nah Ih Euphrates Reuki deuceudidung da gwang, nah Ih hegwangpei gu laisiudung penuide peulu. Nah hegwangpei reugwa kedime nah hekwen keteume de acu si eh langgai beu.

10 Nah Horonme Sanballat nah Ammonme pei kedibe Tobiah aide siulu. Nah cide penai sui tazing di, Israelme ziuyi ziemne mige bata teizie lie eh gwang kebam de.

11 Nah Ih Jerusalem ga gwanglu, nah Ih cika langcum ne bam.

12 Nah Ih tingmui tetpet, Ih nah mina kiee kemak ge acu ngngwalwe mie nah Tinggwang Jerusalem ziemne teigai kera a lung tei kebeude Ih mige dage de ranglia ma. Cu ada makaune keda bam ma Ih cwa kela gada de rünne gwale. 13 Nah Ih tingmui langkam herieki gade tetpet, neidi duirwak dwaga kecang, nah dung herieki ga kecang gwanglu. Nah Ih Jerusalem kiriedung pie twagwa gai, cidungde kau kebamde nah pe riekidung mi ne ru kedi de piegai. 14 Nah Ih Duirwak Rieki tetkah nah hegwangpei rejaai ga tetgai, dede cika a kaune tet kera ziemne heni gahdi. 15 Nah Ih tingmui wadi* gade nghang keladau Ih kirie de pie twagwa gai, pecai tet caili delwe Ih langkam rieki ga gwanglu, nah Ih caili dailu. 16 Cu cika kedime Ih daiga miebi nah daitei labi kecu cima. Nah cu ting kecang ga Ih Jewme, mede cingkume, mede makecime, mede namdi ga kedime, mede keda cika matei kebamme de made ranglia mereu.

17 Nah Ih penui dage ranggai, "Anui keherei kebamde nnui pie gailo, Jerusalem kaukedi nah pe riekidung mi ne rumsia kedide. Gwanglu eh anui Jerusalem riekidung teidai cugo, ciude anui ngngam bam sita dizie." 18 Nah Ih penui dage a Tinggwang acu ngha eh acu ngngwa kelade nah hegwangpei samdung pa a dage rang kegaidungde ndugai.

Nah penui rangdi, "Anui teicuh dai cugo." Nah penui heta keyi tei kera ziemne mteilu.

19 Nah Horonme pei Sanballat, nah Tobiah, namdi kedibe, Ammonme, nah Arabiame Geshem siulu, nah penui anuide henui teidi, nah penui anuide mneudi. Nah penui rangdi, "Nnui tei kebam aidungde daino? Nnui hegwangpei de ngngwa renia zeuni?"

20 Nah Ih penuide sam ge keligai, nah Ih penui dage ranggai: "Tinggim Tinggwang, pa anuide kengking peuzie, nah anui anuikatei, pe kilame, heta teicuh dai zie. Dede nnui ziemne Jerusalem ga nnui qwa, mede nnui mzeu, mede nnuide nsungla kera gede gah."