Apocalipse 16

देवोअ खोतेए वाटकू

1 ताहां आंय मंदिरोमेहें रोत एक वोडु आवाज उनाअयू; तो तियां हांत देवदुतोहो कोहे: "जावा देवोअ खोतोअ हांत वाटका धरतीपोअ रेसवी द्या."

2 तेहलाम पेलठु देवदुत जात कोइत तियाआ वाटकु धरतीपोअ रेसवी देदू. आन जियां माअहुंउं पोअ तिया जनवारोअ निशाणी ओती आन जे तियी मुर्तीइ पागे पोड़तेते, तियांआं डिलो पोअ एकी जातीइ खाराब आन सिसड़ाअलाहा फोड़क्या निहीया.

3 बिहीरे देवदुते तियाआ वाटकु दोर्‍यामेहें रेसवी देदू. ताहां दोर्‍यामेहें मोल्‍या माअहुंउं रक्‍ताआ होस ओत गोयो, आन तिया मेर्‍येए आखे जिवजंतु मोइत गोये.

4 तिसरे देवदुते बी तियाआ वाटकु खाडीइ आन पाअयोंअ उकलामेहें ओली देदू आन तें रक्त बोणीत गोये. 5 तेहेलामेहें आंय पाअयोंअ देवदुतोहो एहें कोत्लाहा उनाअयू, "पवित्र, जो होय, जो ओतु, जो तू न्यायी होय, आन तुमेज ओ न्यायनिवाड़ू कोअयुहू! 6 काहाके तियां देवोअ माअहोंअ आन देवोअ भविश्यवक्ताआं रक्त वोहाड़्योतो, आन तू तियांहां रक्त पिवाड़्यो; काहाके तें यी लायकीइ होय." 7 फाशोअ आंय देवान्याअहीं रोत एहें कोत्लाहा उनाअयू के "होव, ए प्रभु देवा, वोडी ताकतवाला देवा, ताआ न्‍यायनिवाड़ु खोरु आन हाजू होय."

8 सौथे देवदुते तियाआ वाटकु दिहोपोअ ओली देदू, आन तियाहा आगी वाअहीं माअहुंहूं पुजीत टाकीइलाआ अधिकार आप्यू. 9 आन मांअहें दिहोअ तोपोवाअहीं पुजाइत गोये. ताहां तियी पिड़ा पोअ जियाहा आधिकार होय, तिया देवोअ नावोअ तियां निंदा कोअयी आन देवोअ नावोअ महिमा कोइलोअ कोअते मोन ने फिरव्यो.

10 पासवे देवदुते तियाआ वाटकु जनवारोअ राजगादीपोअ ओली देदू, ताहां तियाआ राज्याहा आंदारे टापित लेदो, आन तियांआं दुखोअ वोजेसे जिव जिवोअ जिबीही सावे वोल्ये. 11 तियांआं दुखोअ आन फोड़क्‍याआं वाखरी तियां होरगामेर्‍याआ देवोअ निंदा कोअयी; पोन तियांआं सोताआ खाराब कामोंअ बोदले मोन ने फिरव्यो.

12 साहावे देवदुते जाहां तियाआ वाटकु वोडी फरात नावोअ खाडीपोअ रेसवी देदू, ताहां तियी खाडीइ पाईं आटाइत गोयो, याआ कोअता के दिही उगताआ वोल रोत आवनारा राजाअ कोअता वाट बोणुहूं जोवे. 13 ताहां आंय तिया अजगरोअ सोबीमेहें रोत, आन तिया जनवारोअ सोबी मेहें रोत, आन तिया ठोग भविश्यवक्ताआ सोबीमेहें रोत तिन एठा आत्माहां डेट्काआ रुपोमेहें निहींत्‍लाहा देख्‍यो. 14 काहाके एं समत्कार देखाड़नारे पुतोअ आत्मे होय, जे आखी कोलीपोर्‍याआ राजहांअ जागे याअ काजेहे निहीत जातेहे के तियांहां वोडी ताकतवाला देवोअ वोडा दिहोअ लड़ायीइ काजेहे एकठा कोए.

15 "पाला, जेहें कोइत बांड आवेहे तेहेंज कोइत आंय आवोहो; आन उगड़ाअला एहेलाहा मा सालहा, पोन तुमांआं लाज माअहुंहूं ने देखाअहूं जोवे, तियाहा कोत जो जागतू रोय, आन तियाआ आंगड़े पेवित रोय तो धन्य होय!"

16 ते आत्में तियां राजहांहां इब्री बाशामेहें अरमोगिदोन कोतेहे तिया जागापोअ एकठा कोअया.

17 हांतवे देवदुते तियाआ वाटकु वारामेहें रेसवी देदू, ताहां मंदिरोमेहें रोत राजगादी पोअ रोत एक वोडूबी आवाज निहीयु तिये कोयो के, "पुरो ओत गोयो." 18 ताहां विजल्‍यो, बाला गाजा वोल्या, आन जोरे बी धरती आल्यी, ते एतीही जोरे आल्यी के जोयोंअ रोत माहुंउं धरतीपोअ आयो, तोयोंअ रोत एहेलोहो केदिहींज नाहां ओवो. 19 यावाअहीं तिया वोडा होयरोअ तिन डुन्का ओत गोया, आन राज्या राज्यामेहें होयरे ओदरात पोड़्ये आन देवे वोडा बाबेल होयरोअ ओर कोअयी के तो खोतेए बाल्लायी वाअहीं दाराक्शाआ रोहो पिवाड़े. 20 आन आखा दोर्‍या मेर्‍याआ डोगोअ पोड़ीत गोया, आन डोगोअ नाव निशाणीज ने रोया. 21 जुगोमेहें रोत एक मोण वजनोवाले गारे माअहूं पोअ पोड़्ये, ताहां गाराआ पिड़ा आवल्यी कोत माअहूं देवोअ निंदा कोअयी, काहाके तियां गाराआ पिड़ा खुब वोडी ओती.