1 तिहींइं फासाड़ी देवदुत माहूं किमती डोणोअ होस जिवनोअ पाअयोंअ खाड देखाड़्यी, जे देवोअ आन मेडाअ राजगादीइ जागे रोत वोहतीते. 2 ते खाड होयरोअ सड़केए पोरापोर वोहतीते. तियी खाडीइ यी तोड़े आन तियी तोड़े जिवनोअ साड़े ओते; तियां हारेक साड़ोहों बारा जातीइ फलवे लागतेते, आन तें हारेक मोयनाम फलतेते; आन तियां साड़ोअ पालावाअहीं आखी जातीइ माअहें हुदरीइतेते.

3 तिहीं रोत तिया होयरोम हारापोअ जोगोहो किज ने रोय, आन तिया होयरोम देवोअ आन मेडाअ राजगादी रोय. तियाआ सेवक तियाआ आराधना कोए.✝ 4 तें तियाहा आमने सामने पाले, आन तियाअ नाव तियांआं निंडाअ पोअ लेखल्यो रोय. 5 तिहीं रात केदिहीं ने ओवे; आन तियांहां दिवाआ आन दिहोअ उजालाआ गरज ने पोड़े, काहाके प्रभु देव सोताआ उजालो तियांपोअ हादाजलम पाड़े.

6 फाशोअ देवदुते माहूं कोयो, "ए गोठी सत्य आन भरिवसाआ होय." आन प्रभु देव, जो तियाआ आत्मा तियाआ भविश्यवक्ताहां आपेहे. तिये तियाआ देवदुतोहो याअकाजे मोकल्यू के तियाआ सेवकोहों जे गोठी वेगीज ओवनारी होय ते देखाड़े.

7 ईसु कोहे, "उनाआ! आंय वेगुज आवोहो! धन्य होय तों जों या पुस्तकोमेर्‍यीइ भविश्यवाणी मानेहें."

8 आंय योहान होय, जो यीं गोठीहीं देख्यी आन उनाअयू. जेहेलाम आंय उनाअतुतो आन पाल्या कोअतुतो, तेहेलाम देवदुत माहूं ए गोठी देखाड़तुतो, आंय तियाआ गुडाअहीं पागे पोड़ीइलोअ काजे उठ्लीत पोड़्यू. 9 पोन तिये माहूं ओं कोयो, "तु एहें मा कोअही; काहाके आंय बी ताआ आन ताआ पाही भविश्यवक्ताआं, आन जें या पुस्तकोमेर्‍यीइ गोठी मानतेहे तियां माअहों सेवकोमेर्‍युउ एक होय, तु देवोओज भक्ती कोअ." 10 फाशोअ तिये माहूं कोयो, "या पुस्तकोमेर्‍यीइ भविश्यवाणीइ गोठी मा बोंद कोअही; काहाके वेल आहने होय. 11 बाक्तो कोअनारो बाक्तो कोअतोज रोय, जों सोगद्यो ओय, तों सोगदायीमेहें वादतो जाय; जों हाजो तो हाजोज कोअतो रोय. जों सोको होय तों सोको ओवतोज रोय."

12 ईसु कोहे, "उनाआ! आंय वेगुज आवोहो! आन हारेक जोओंहों जियां तियांआं कामोंअ पुरमाणे बक्शीस आपिहीं. 13 आंय अल्फा आन ओमेगा, पेहलु आन सेलवाऱ्युउ, सुरुवात आन सेवट होंव."

14 तें हाजे होय, जें सोताआ आंगड़े तुवीत लेतेहे, तियांहां जिवनोअ साड़ोअ जागे आवीइलोअ आधिकार जोड़े, आन तें बाओमेहें रोत होयरोमेहें फोहे. 15 पोन हुंणे, मोत्रीइनारे, सिनालो कोअनारे, खुन कोअनारे, मुर्तीइ पुंजन कोअनारे, लबाड़ी पसन कोअनारे आन लबाड़ी कोअनारे आखे होयरोअ बारथे रोय.

16 "आंय, ईसु, माआं देवदुतोहो याआ काजे मोकल्यू के तुमाआं आगाड़ी मंडड़ीइ बाप्तिमेहें यी गोठीइ साक्शी आपित सेके. आंय दाविदोअ मुल, पारवाड़, आन वेगऱ्युउ समकीइनारु तारु✝ होय."

17 आत्मा आन वोड़ली बेनू कोतेहे, "आव!" जो उनाअहे, तो उत्तर आपे, "आवा!" जों तिहील्यो होय तों आवे, आन जियाहा जोवे तों जिवनोअ पाईं फुकट लेत जाय.

18 जे माअहें या पुस्तकोअ भविश्यवाणीइ गोठी उनाअतेहें, आंय तियां आखाहा ओं वारुहूं कोत देहो: के जर एखू माअहुंउं यी गोठीही वादाड़े, ताहां देव या पुस्तकोमेहें लेखल्यी आखी पिड़ा तियापोअ टाकी देय. 19 जर एखु यी भविश्यवाणीइ पुस्तकोअ गोठीमेहें रोत काविहीं काडे, ताहां देव या पुस्‍तकोमेहें कोत आपल्या जिवनोअ साड़ आन सोका होयरोम रोत तियाआ वाटु काडीत टाके.

20 यीं गोठीइ साक्शी आपनारु एहें कोहे, "होव, आंय वेगुज आवोहो!" आमेन! प्रभु ईसु आव!

21 प्रभु ईसु ख्रिस्ताआ मेरवानी पवित्र माअहोंअरी रोअहूं जोवे. आमेन.