1 विश्वास आशा कोअल्यी गोठीइ भरीवसू आन ने देखाअनारी गोठीइ बद्दल पुरावू होय. 2 काहाके यी गोठीइ बाप्तिमेहें आपाअ पेल्लाआ डायहांआं साक्शी हाजी नावलाअयिही.

3 विश्वासोवाअहीं आपुहूं जाआंत जाहे के आखी कोल देवोअ शब्दावाअहीं बोण्यीहीं. मोन्ज्ये जे देखाअनारी गोठी होय, तियीं वाअहीं नाहां बोण्यी. 4 विश्वासोवाअहींज हाबेले काइनो रोत हाजो गाराहा देवोअ काजे आप्यो; तिहीं वाअहीं तियाहा धर्मी होय कोत साक्शी जोड़्यी. काहाके देवे तियाआ भेटेए बाप्तिम साक्शी आप्यी. तियाहाज काजे तो मोइत गोयुहू तेबी गोग्याज कोअहे.✝

5 हनोकोहो मोतोअ आनुभाव ने आवुहूं जोवे कोत तियाआ विश्वासोज वाअहीं तो उसे विसाइत गोयू, आन तियाआ पोत्तुज ने लागू, काहाके देवे तियाहा विसीत लेदू, आन तियाआ विसाइलोअ पेल, "तिये देवोहो खुस कोअयू" एहलिही साक्शी आप्यी.✝ 6 विश्वासो सिवाय देवोहो खुस नाहां कोइत सेकते. काहाके देवोअ जागे आवनारो एहें कोत विश्वास कोअहूं जोवे के तो होय, आन जें माहें तियाहा खोरा मोनोवाअहीं होदतेहे, तियांहां तो बक्शीस आपेहे.

7 विश्वासोवाअहीं नोहे वेगी केदिहीं नाहां देख्यी एहली गोठीइ सुसना जोड़्यी तेहेलामेहें आदरमानो वाअहीं भक्ती कोइत सोताआ कुटूंबाहा वासाड़ीलोअ काजेहे जाहाज बोणायी, आन एहें कोइत तिये दुन्याहा दोशी ठरव्यी आन विश्वासो वाअहीं तो धर्मी जिवनोअ वारिस बोण्यु.✝

8 विश्वासोज वाअहीं अब्राहामे देवे हाद्यू, ताहां आदेश मानित एहलिही जागे निहीत गोयु के तो जागू तियाहा वारिस हक्काजमेहें जोड़नारु ओतू; तियाहा काअली वोग जाअलोअ तोंज ने मुंदू ओतू तेबी तो निहींत गोयू. 9 विश्वासोज वाअहीं, तो आथवसन जोड़ल्या देसोम पोरदेसीइ होस रोयू; आन तियीज जागेहे तियाआ वारिस इसाहाक आन याकोब यांअरी तो तंबामेहें वोहती कोइत रोयू. 10 काहाके, जियाआ योजना कोअनारु आन बांदनारु देवुज होय एहला होयरोअ तो वाट जोवतुतो.

11 विश्वासोवाअहींज, सारा डायी ओत गोयी तेबी तियीही पोर्‍याहा जल्म आपिइलोअ ताकत जोड़्यी; काहाके तियी आथवसन आपनाराहा इमानदार समज्युतो. 12 तिहींज वाअहीं फक्त एकाज पोअ रोत, जो मोअहूं वाटे लागुतो एहला डायापोअ रोत जुगोमेर्‍याआ ताराआ होस आन दोर्‍याआ मेरेपोर्‍याआ रेटाआ होस गोणाय ने एतीही पारवाड़ी उब्ज्यी.

13 एं आखे विश्वासोम रोत कोअतीज मोये; तियांहां देवे आपल्यो आथवसन पुरो ओवत्लो ने देखाअयो. पोन सेटेज रोत पालीत कोइत खुस ओवे आन तियां मानित लेदो के, "आपू धरतीपोअ पारके आन वाटहारे होय." 14 जें एहलिही गोठी कोतेहे, तें ओं देखाड़तेहे के तें वावड़्या देसोअ होदवाली होय. 15 आन जिया देसोम रोत तें निहीत आयेते, जर तियाआ विसार कोअते ताहां तियांहां वापिस जाअलाआ सान्सो ओतो. 16 पोन ते‍ं एक जाअखा हाजा मोन्ज्ये होरगाआ देसोअ लालस कोअतेहे, तिहींवाअहीं देवोहो बी तियांआं देव एहें कोत कोवड़ाइलोम नाहां लाज आवती, काहाके तिये तियांआं कोअते एक होयर बोणायोहो.

17 विश्वासोज वाअहीं अब्राहामे तियाआ परिक्शाआ वेले इसहाकोहो गाराहा कोत आपी देदू; जियाआ बाप्तिम तिये देवोअ आथवसन खोरो मान्योतो.✝ 18 आन तियाआ बाप्तिम देवे तियाहा कोयोतो के, "इसहाकोपोअ रोत ताआ पारवाड़ साले." 19 काहाके अब्राहामे समजीत लेदो के, देव तियाहा मोल्याम रोत बी जिवाड़ीत सेकेहे; एहेंकोइत एक पाल्ल्ये इसाहाक तियाहा मोल्याम रोतुज वापिस जोड़्यू.

20 विश्वासोज वाअहीं इसहाके याकोबोहो आन एसावोहो आवनारी गोठीइ बाप्तिमेहें आशिर्वाद आप्यू.

21 विश्वासोज वाअहीं याकोबे मोइले वेले योसेफोअ बेनू पोर्‍यांम रोत एकेकाहा आशिर्वाद आप्यू आन डेंगारीइ सेंडीइ टेकु लेत कोइत वोंद्यो.

22 विश्वासो वाअहीं योसेफे जेहलाम तो मोइत जाय एहेलुहू ओतू, तेहलाम इस्राएलवालाआं निहींत जाअलोअ सर्सा कोअयी आन तियाआ आडोअ बाप्तिमेहें आदेश आप्यू.

23 विश्वासोज वाअहीं मोशे ऊब्जीइयू तोयोंअ रोत तियाआ आयहीन आब्हू तियाहा तीन मोयना जाआं निकाड़ीत मिक्यू, काहाके पोर्‍यू हाजूबी होये ओं तियां देख्यू, आन तियांहां राजाआ आदेशोअ बिक ने लागी.

24 विश्वासोज वाअहीं मोशे, वोडू ओयु तेहलाम फारो राजाआ बेटिह्हीइ पोर्‍यू कोवड़ाइलोअ नाकारी देदो. 25 काहाके तियाहा पापोम थोड़ा दिहोअ सुख भोगीइला पेक्शा देवोअ माअहोंअरी दुख भोगीइलोअ जाअखो पसन कोअयो. 26 तिये ख्रिस्ताआ वाखरी निंदा वेठीइलोअ मिसर देसोअ धनो रोत जाअखु वोडु लाभ होमज्यो, काहाके तारासोअ बोदले भविश्याम मिलनारा बक्शीसोअ वोग तियाआ नजर ओती.

27 विश्वासोज वाअहीं तो राजाअ खोतेहे ने बियू आन मिसर देसोहो सोड़ी देदू, काहाके जो नाहां देखाअतू तियाआ वोल तो देखत्लाआ होस मजबुत रोयू. 28 विश्वासोज वाअहीं तिये वल्हांडण आन रक्त हितड़ीइलोअ नियम मान्य कोअयू, काहाके आरिवनारु इस्राएली माअहुंहूं आथ ने लागाड़ुहुं जोवे.

29 विश्वासोज वाअहीं, तें लाल दोर्‍याम रोत कोअड़ी पुयींपोअ सालत्लाआ होस मेरे उनकीत गोये आन मिसरवाले बी तेहेंज कोए गोयेन आखेज मिलीत बुडीत मोये.✝

30 विश्वासो वाअहीं जाहां इस्राएली माहें यरीहोअ पितड़ाआ मेरेमेरे हांत फेरी मार्‍यी ताहां तों खोहलात पोड़्यो. 31 विश्वासोवाअहीं, राहाब रांडी* आदेश तोडनारांअरी ने आरवाअयी; काहाके तियी देस हेअनारा तिरवाश्याहां* कोअमेहें निकाड़ीत मिक्याते.

32 ओमें आंय फाशुउ केतुहू जाआं कोत देखाड़ो? गिदोन, बाराक, शिमशोन, यिप्तह, दाविद, शमुवेल आन भविश्यवक्ता यांआं बाप्तिमेहें आंय कोनु वोलो ताहां वेल ने पुरनारी. 33 यां विश्वासो वाअहींज राज्ये जिक्ये; हाजे कामे कोअये, देवोअ आपल्या आथवसनोअ फल देख्यो, सिहांवागोअ जोड़बे बोंद कोअये. 34 आगीइ हेकेहे हेली कोअयी; तारवारीइ तारे रोत वासात निहींये; कमजोरीमेहें ताकत जोड़्यी; लड़ायीमेहें बाहदिर निहींये; बिहीरा देसोवाला सेयनिकोहों ओड़ीत काड्या.

35 वारुज बोईंहीं तियींइं मोल्या माटी फाशाआ जिवता ओवीत वापिस मिल्या; वारुज जोओं ताम वापिस जिवित उठीइलो काजेहे मार खाता खाता मोइत गोया पोन सुटका ने होद्यी. 36 वार जोएं ताम निंदा वेठीइलोम, सापका खाअलोम, बेड़ीम के जेलेम पोड़ीइलोम पारजाणाम पोड़्ये. 37 डोणोअ मारु खादू; करवती वाअहीं सिराअये; तियांआं परिक्शा ओवी; तारवारी वाअहीं मोये; हाकड़ेमेहें आन तारासोमेहें, दुख वेठते जात मेडांआं आन बोकड़ाआ सांबड़े फांगते जात इंहींन-तिहीं वाजते इंड्ये; 38 आन रानोमेहें, डोगोमेहें, कुपामेहें आन धरतीइ कापड़ाटामेहें भटकिइते फिर्‍ये. काहाके दुन्या तियांआं काजे ने हाजी ओती. 39 यां आखाहा विश्वासोज वाअहीं हाजी साक्शी जोड़्यी, तेबी तियांहां आथवसन आपल्यी वस्तु ने जोड़्यी. 40 आपाआ काजे देवे हाजाम हाजी गोठ ठरवित मिक्यी काहाके ते आपा वाअहींज पुरी ओत सेकुहूं जोवे.