Amatayo 1

Chilagwa cha Ayesu Kilisto

1 Gangani nga mahina ga chilagwa cha Ayesu Kilisto, mwana bha Adaudi na mwana bha Aaibulahimu, 2 Aaibulahimu akaabheleka Aisaka, na Aisaka akaabheleka Ayakobo, na Ayakobo akaabheleka Ayuda na akaanung’una bhabhenji, 3 Ayuda akaabheleka Apelesi na Azela yakubhehe anyongo bhabhenji akibha Atamali, na Apelesi akaabheleka Ahesilomu, na Ahesiloni akaabheleka Aalamu. 4 Aalamu akaabheleka Aaminadabu, na Aaminadabu akaabheleka Anashoni, na Anashoni akaabheleka Asalumoni, 5 Asalumoni akaabheleka Aboazi, na anyongo bhabhe Aboazi akibha Alahabu, Aboazi na Alutu bhakibhanga akaabhelei bha Aobedi, na Aobedi akaabheleka Ayese,

6 Ayese akaabheleka amwana yakubhee akibha Amwenye Adaudi. Adaudi akaabheleka Asolomoni, yakubhee anyongo bhabhe nga jonijola jwaakibha hanu bha Aulia. 7 Asolomoni akaabheleka Alehoboamu, na Alehoboamu akaabheleka Aabiya, na Aabiya akaabheleka Aasa, 8 Aasa akaabheleka Ayehoshafati, na Ayehoshafati akaabheleka Ayolamu, na Ayolamu akaabheleka Auzia, 9 Auzia akaabheleka Ayotamu, na Ayotamu akaabheleka Aahazi, na Aahazi akaabheleka Ahezekia, 10 Ahezekia akaabheleka Amanase, na Amanase akaabheleka Aamoni, na Aamoni akaabheleka Ayosia, 11 Ayosia akaabheleka Ayekonia na akaanung’una bhabhenji. Gono gukibha muda Bhayahudi chibhakapelekwanga kuhamilanga ku Babeli. 12 Bhayahudi pabhakibhanga kuubhanda ku Babeli, Ayekonia akaabheleka mwana Ashelitieli, na Ashelitieli akaabheleka Azelubabeli, 13 Azelubabeli akaabheleka Abiudi, na Abiudi akaabheleka Aeliakimu, na Aeliakimu akaabheleka Aazoli, 14 Aazoli akaabheleka Azadoki, na Azadoki akaabheleka Aakimu, na Aakimu akaabheleka Aeliudi, 15 Aeliudi akaabheleka Aeleazali, na Aeleazali akaabheleka Amatani, na Amatani akaabheleka Ayakobo, 16 na jonojwe Ayakobo akaabheleka Ayusufu, na habha Ayusufu akibha hangwana bhabhe Amalia, na habha Amalia nga jwakaabheleka Ayesu, bhakemitwa Kilisto. 17 Bahi, penapo kukabhehe na ibhelei komi na ncheche kubhoka Aaibulahimu mpaka Adaudi, ibhelei komi na ncheche kubhoka Adaudi mpaka Bhayahudi chibhakatolekwa akaabhanda ku Babeli, na ibhelehi komi na ncheche kubhoka kutolekwa akaabhanda mpaka muda gwa kubhelekwa kwa Kilisto.