Mateus 26

Chikomiti cha kulolea ndela ja kwaakoma Ayesu

1 Ayesu pabhakajomola kulobhola genago goa, akaalobholelanga bhabhachijigana bhabhe, 2 "Mmanyanga kubhee pagapakupeta machobha gabhele kupakubhee na lichobha likolongwa lya Pasaka, na Amwana bha Amundu bhapakugalukwa ili bhabhambwe panchalaba."

3 Gono muda Akaakung’i akolo na akanachilongola bha Bhayahudi bhakakongana pamo paluwani lwa nyuumba ja Akayafa jwaakibha Akung’i Amwenye. 4 Bhakakongolelana ndela ja kunkamula Ayesu kwa kuhiiya ili bhaakome. 5 Nambo bhakalobholanga, "Chikubho chenecho chikotokubhee mu lichobha likolongwa lya Pasaka, ili gukotokupetela ukomo nkati ja bhandu."

Ayesu bhakuchulilwa mahuta kono ku Betania

6 Ayesu pabhakibha ku Betania, kaja kwa Asimoni, jwakibha na matana, 7 mwikege jumo jwakibha na chupa chichitwelile mahuta ga kunungila ga bei ngolongwa, bhakahika penipala Ayesu pabhatenda kulyee chakulya, bhakaakuchulila gena mahuta mmutwe. 8 Bhabhachijigana bhabhe pabhakabhona genago bhakachimwanga, bhakalobholanga, "Janiki achala jenjeni? 9 Kwa kubhee mahuta gangani nga ga bei ngolongwa, hikakombolike kuhuchwa na yene mbiha bhakaapekiinge akaahocho."

10 Ayesu akagamanya chibhaganikia, bhakaalobholela, "Mboni ntendakunhabhuanga mwikege hojo? Jonojwe atekutenda chikubho chammbone. 11 Akaahocho mmi nabho machobha goa, nambo nenga mbakubheehopo pamo na mwangota machobha goa. 12 Hojo mwikege bhatekunguchulila mahuta gakunungila ili kumeka tayali kwa kunjika. 13 Nannobholelanga kweli, poa pala pachilambo pabhapakutangachiwanga jenje Ngani Jammbone, chikubho chaachitendite hojo mwikege chipakulongoleka kwa kwaakombokela bhenabho."

Ayuda atendakoonda kwaagaluka Ayesu

14 Ngapena jumo jwa bhenibhala bhabhachijigana komi na bhabhele, bhakemitwa Ayuda Isikaliote, bhakajaula kwa Akung’i Akolo, 15 bhakaakonyanga, "Mpakumbee chilebhe niki handa mbakwaagaluka Ayesu kwaachinu?" Bhakaalangia hipande makomi gatatu ga maganga gagakemitwa mbiha. 16 Kubhoka penapo Ayuda bhakibha bhalolea ndela ja kwaagaluka Ayesu.

Ayesu bhalyee chakulya cha Pasaka pamo na bhabhachijigana bhabhe

17 Lichobha lya kujemeka tangu ja lichobha likolongwa lya mikate jangalekelwa chilongo, bhabhachijigana bhakaajendela Ayesu akaakonya, "Mpala tumpanganikie koji chakulya cha lichobha likolongwa lya Pasaka?"

18 Ayesu akaajangulanga, "Nnyaulange kunnyini kwa analome teno, mkaalobholele, ‘Bhannyigana bhalobhola, muda gwangu guikite, kwaachinu mbakulyee chakulya cha Pasaka pamo na bhabhachijigana bhangu.’"

19 Bhabhachijigana bhakatendanga handa Ayesu chibhakaalagia, bhakaapanganikia chakulya cha Pasaka.

20 Pajikahika kimuho Ayesu na bhabhachijigana bhabhe komi na bhabhele bhakatama kulyee chakulya. 21 Pabhatendita kulyee, Ayesu akalobhola, "Ndendakunnobholelanga kweli, jumo gwinu bhapakung’aluka."

22 Bhabhachijigana ikaabhinanga muno mu mitima jabhenji, kila jumo akajemeka kwaakonya, "Hangwana! Bholi, nga nenga?"

23 Ayesu akajangula, "Jwapakutobhela mkate pamo na nenga mu libakuli nga jwapakung’aluka. 24 Amwana bha Amundu apakujomoka handa chigalobhola Majandiko ga Annoongo, nambo apakulaga mundu jola jwapakwaagaluka Amwana bha Amundu! Jikibha mbaya kwa mundu jonojwe handa akibha angabhelekwa."

25 Ayuda, jonijola jwaagaluka, akaakonya, "Bhannyigana, bholi, nga nenga?"

Ayesu akajangula, "Handa chinnongile,"

Chakulya cha Hangwana

26 Pabhatendita kulyee, Ayesu akatola nkate, akaachukulu Annoongo, akagumetula, akaapekea bhabhachijigana bhabhe abhikulobholo, "Ntolange nlyangange, gongo nga mmele gwangu." 27 Ngapena bhakatola chikombe cha divai, bhakachukulu Annoongo, bhakaapekea bhabhachijigana babhe bhabhikulobhola, "Nng’wangange mwabhoa mu chikombe chenjeni. 28 Kwa maana jenje nga mihai jangu jijilangia lilagano, jijijitika ligongo lya bhandu bhajingi ili kwaabhokea mabohu.