Mateus 8

Ayesu annamia akolo jumo bha manyemba jwa ku Lumi

5 Ayesu paakahika pannyini ku Kafalanaumu, akolo jumo bha manyemba ga ku Lumi akaajendelela na kwaapembelela anyangatile. 6 Kongo abhi kulobhola, "Hangwana, antumichi jwangu atekugoloka kaaja atamwa muno na atekupola."

7 Ayesu akaalobholela, "Mbakuhika kwaalamia."

8 Jonojwe akolo bha manyemba ga ku Lumi akaalobholela Ayesu, "Hangwana, ngapalikwa mwenga nnyingile mu nyuumba jangu. Nambo nlagie tu lilobhole limo na antumichi jwangu apakulama. 9 Kwa kubhee nenga na mwene nga mundu nibhekitwe pahi ja mamulaka, ngweti manyemba pahi jangu. Handa mbakwaalobholela hojojo, ‘Nnyaule,’ na jonojwe apakujaula. Na jongi handa naalobholile, ‘Nhike,’ jonojwe atenda kuhika. Na handa mbakwaalobholela antumichi jwangu, ‘Npangane henela,’ na jonojwe apakungana."

10 Ayesu paakajoha genago, akakangacha muno, akabhalobholelanga bhandu bhabhakibha bhaakagula, "Ndendakunnobholelanga kweli, nangapata kummona mundu joa jola mu chilambo cha ku Isilaeli jwakuhobhalela muno handa jonojwe. 11 Bahi ndendakunnobholelanga yakubhee bhandu bhajingi bhapakuhika kubhoka kuulabho na kuuwelo, na bhenaangota bhapakutamanga ili bhalyee pamo na Aaibulahimu, na Aisaka, na Ayakobo mu Umwenye gwa kunani kwa Annoongo. 12 Nambo jonijola yakubhee Umwenye gonogwe gwa Annoongo nga gwabhenji bhapakwaajeha panja, palubhendu, konokwe bhapakugutanga na kuyaga mino." 13 Kubhoka penapo Ayesu akaalobholela jonojwe akolo bha manyemba ga ku Lumi, "Nnyaule kwaachinu na ibhee handa chinhobhalile."

Na antumichi bhabhe akalama muda gogogo.