यहुन्ना 15

अङ्गुर टुङ सनर हाङ्गाङ

1 "ङा मछ्युका अङ्गुर टुङ ङा हो, ओटन ङा बौ किसान लेया। 2 ओटन ङात लेन्या सोगल हाङ्गा जोले जाए माशशहौ ओले नकाजन छेल्वा ओटन शई शशैन्या सोगल हाङ्गाजन झन्जै भ्याई शई ग्याशैत्या लेस्यु ओले छान्टिवा। 3 ङा जेजन ङापानस्यान्या बचनले जे हादेए जै चोखा ताइस्यु लेच्या। 4 जे ङात लिज्याचिते, ओटन ङा जेत लिज्याङा। जोमनलेस्यु अङ्गुर टुङत आहाङ्गा मालिज्याकन नकाले ओलजै शई शशहौ माढुदुऊदी, नैताइस्यु जे बै ङात मालेच्योकन माढुदुचिदी।"

5 "ङा अङ्गुर टुङ हो, जेकने हाङ्गाङ हो। यदि काङ्काई ङात लिज्यादा भन्या, सनर ङा नकात लिज्यादुङा भन्या, नकाले तबर शई शशैवा, दानाङभन्या ङातन बाठए ताइस्यु जे नैज ढाऔ माढुदुचिदी। 6 काङ्काई रु ङात मालज्यादा भन्या, नका हाङ्गामन बाहेर मिल्काइसिया, ओटन ना ऐराङ। नैताइन्या हाङ्गाङ रुयाङै दुउरा ओटन मील क्याइरा, ओटन नकाङ हिप्सिरा। 7 जे ङात लिज्यादुच्या भन्या, सनर ङा बचन जेल्योङ लिज्यादा भन्या, जेजन जो इच्छ्या लागि नीचिते, ओटन ना जे नाल्ट ढान्यालेसिया। 8 जे तबर शई शशैस्यु ङा सिइयाङ ज्या ऐलेन्या प्रमानित जाएच्योकन आकातै ङा बौल महिमा ताइन्यालेया।"