João 16

1 "ङा जेजन नैताइस्यु ऐङाढाचिऊ, कि जे बिस्वास ताराइच्यो लेस्यु, ईका छेन जेजन ङापानस्याचिऊ हो। 2 नकाङै जेजन आराधना झिमलन पलिईन्या लेचिरा। बास्तपलं ऐटाइन्या बेला रांज्याया, जब जेजन सएन्याले परमेस्वरलं सेवा ङाढाज्याङु ऐलेन्या यिङवा। 3 नकाङै ईका काम ढान्या लेरा, दानाङभन्या नकाङै बौजन शईस्यु मालेरदी, ओटन ङाजन बै मासहङरदी। 4 तर ईका छेन ङा जेजन पानस्यादुच्या, कि जब ना बेला रां, तब जेजन ङा नैति ङापानस्याचिऊ नका जेजन याद ताइन्यालेया। पहेला ङा जेजन ईका छेन मापानस्यादुच्या, दानाङभन्या ङा जेसै ङालज्याङु।"

पबित्र आत्माल काम

5 "ङा आब ङाजन परिङन्या लेऊदेए ङाहिनज्याङु, तर ‘नङ काङ नहिनज्यानु?’ ऐलेस्यु जे काङ्काईले ङाजन मागिन्दुङच्या। 6 ओटन बै ङा जेजन ईका छेन ङापानन्या कारन जेयिङ आतिज्याया। 7 ताहकन बै ङा जेजन सत्य छेन पानस्याच्या, ङा हिनङ्कन्ज जे नाल्ट चान्या ताहा। दानाङभन्या ङा माहिनङ्कन, सल्लाकार जेल्योङ रांन्यामाल्दी। तर ङा हिनङ्कन ओजन जेल्योङ परिङ्ङा। 8 ओटन जब ओ रां सत्यले निया बेला सङ्सारजन पाप दोसी ठहराइन्यालेया। 9 नकाङ ङाजन बिस्वास माढाङरदी, नैताइस्यु पापले गलत ठहरिवाङ, 10 जे सत्यताल बारेल गलत यिङच्या, ङा बौ लेऊदेए हिन्ङा, ओटन ङाजन फरि मारङ्ङचिदी। 11 दानाङभन्या सजाय यांन्या आग्याल बारेल ईका सङ्सारला शासकजन पैलाईज दोसी ठहराइस्युई लेया।"✝16:11 यहुन्ना १२:३१

12 "ङा जेजन अझै भ्याई छेन पानस्यान्या ताइज्याया, तर आकअ जे नका छेन सहिउ माढुदुचिदी। 13 जब ओ, सत्यल आत्मा अथाबा पबित्र आत्मा रां, तब ओले जेजन सोगलै सत्यताल डोऱ्याइचिवा। ओ आतरफङन छ्योङन्या माल्दी। ओले जो थटौ, नकाई छ्योङन्या लेया, ओटन ताइरांन्या छेनयाङ जेजन मुइन्या लेया। 14 ओले ङा महिमा ढान्यालेया, दानाङभन्या जो ङामि हो, ना ङाल्योङन हिनस्यु जेजन नाइ मुइन्या लेया। 15 जो बौ सकाए ले, ना ङामिइ ज्या। नैताइस्यु ङा पानङा, जो ङामि हो ना ङा हिनस्यु यांच्या, ओटन पबित्र आत्माङन जेजन पानस्याच्या।"

दुख सनर सुख

16 "तचिइ छिन्ट जे ङाजन फरि रङन्या माल्चिदी, ओटन ओलं छिन्ट ङाजन फरि रङन्या लेच्या।"

17 तब येशुल काङ्का-काङ्का सिइयाङै रारांल ऐलिज्यावाङ, "येशुले गेजन ईका नै आपानस्यायिउ? ‘तचिइ छिन्ट जे ङाजन रङन्या माल्चिदी, ओटन फरि तचिइ छिन्ट जे ङाजन रङन्या लेच्या,’ ओटन ‘दानाङभन्या ङा बौ ल्यौदेए हिनज्याङा।’" 18 नकाङै ऐलेवाङ, "ओले ‘तचिइ छिन्ट’ ओमनआलन्या नैति? ओले नै आपानौ नकाल अर्थ नैति गे मासन्दुया।"

19 सिइयाङै ङाजन गिनन्या इच्छ्या ढाज्यावाङ ऐलेन्या येशुजन थाह ताहौ, ओटन ओले ऐलेऊ, "तचिइ छिन्ट जे ङाजन रङन्या माल्चिदी, ओटन तचिइ छिन्ट ङाजन रङन्या लेच्या ऐङालन्या छेनल अर्थ नैति ईका बारेल नैति जे बहस जेढाज्याचिऊ। 20 मछ्यु ङा जेजन ऐढाच्या, जे व्‌रस्यु हिकंहिकं लेच्या, तर सङ्सार हेसाङा। जे आतिन्या लेच्या, तर जे आतिइ आनन्दल फिरिसिन्या लेया। 21 लुल जर्माइन्या बेला मेएमाले दुख डोएवा, दानाङभन्या नकाल बेला रा:स्यु लेया, तर जब नकाले लुल जर्माहौ, तब नाजन आस्याहूरलं यांका माताइदी दानाङभन्या सङ्सारलं तोलोअ लुलल जरम ताहौ ऐलेन्या छेनत नका हेसाङा।✝16:21 यशैया २६:१७; मीका ४:९ 22 ऐलेस्युजै आकअ जेजन आतिइभुतिइ ताहा, तर ङा फरि जेजन खिमन्या लेङा, ओटन जेयिङ आनन्दै ताहा। ओटन काङ्काले जेमि आनन्द जेल्योङन न्हानन्यामाल्दी। 23 जब नका दिन रांया, जे ङाजन नैज बै गिनन्या माल्चिदी। मछ्यु ङा जेजन ऐढाच्या, जे ङा मिनत बौसकाए जो नीच्यो, ओले ना जेजन यांन्याई लेया। 24 आकअ समन जे ङा मिनतन नैज नीस्यु माल्चिदी। नीचिते, ओटन जे डोएन्यालेच्या। ऐलेस्युजै जे आनन्द पुरा ग्याताइत्या।"

सङ्सारतन आझ्योङन्या

25 "ईका छेन जेजन ङा आहानङन पानस्याच्या। तर बेला रांज्याया, जब ङा जेसकाए फरि आहानङन छ्योङन्या मालेङदी, तर बौल बारेङन जेजन प्रस्टै पानन्यालेङा। 26 ना छिम्क जे ङा मिनतन नीन्या लेच्या। ङा जे नाल्ट बौसकाए बिन्ति ढास्याच्या ऐलेस्यु जेजन ऐमाढाचिदी, 27 दानाङभन्या बौले ओलजै जेजन मया ढाचिवा, ओटन जे ङाजन मया धाङच्या, ओटन ङाजन परमेस्वरलं तरफङन रांऔ ऐलेस्यु बिस्वास जेढाङचिऊ। 28 ङा बौ ल्योङन ङारांङु, ओटन सङ्सारलं रा:स्यु ङाल्ङु, ओटन फरि ङा सङ्सारजन राइस्यु बौलेऊदेए हिनज्याङा।"

29 येशुल सिइयाङै ऐलेवाङ, "आब नङ प्रस्टै छ्योङज्याना, आहानङन माङडी। 30 आब गे बुजिदुया, नङ सोगलै छेन सन्ना, ओटन नङ काङ्काईजन गिनन्या आबस्यक माल्दी। गे नैताइस्युई बिस्वास गेढोयिउ, कि नङ परमेस्वरङन नरानु हो।"

31 येशुले नकाङजन जबाक आयोवाङ, "नैति जे आब बिस्वास ढोच्या?✝16:31 यहुन्ना ८:२९ 32 ब्याएचिते, बास्तपलं बेला तापरादा, जब जे सेरासेट्ट ताइस्यु जे झिमलै हिनच्या ओटन ङाजन ङाबाठए बनाटङच्या। ताहकन बै ङा ङाबाठए मालेङदी, दानाङभन्या ङासकाए बौ लिज्याया। 33 ङा जेजन ईका छेन नैताइस्यु ङापानस्याचिऊ, कि ङात जेजन शान्ति ग्याताइत्या। सङ्सारलं जेजन दुख ताइन्यालेया, तर साहस ढोचिते, ङा सङ्सारजन झ्योङस्यु लेङा।"