यहुन्ना 5

21 दानाङभन्या जोमनलेस्यु बौले सिन्याङजन जिङदा जाटौर ओटन नकाङजन जिबन योंवर, नैलेस्युज ज़ाले बै जोजन इच्छ्या ढोव, नकाजन जिबन योंवा। 22 दानाङभन्या बौले काङ्काईल निया माढोवदी, तर सोगलै निया ढान्या काम आज़ाजन यांस्यु नाएवा, 23 जोमनलेस्यु नकाङै बौल आदर रांढोव। नैलेस्युजै सोगलैले ज़ाल आदर ग्याढोरत्या, ज़ाल आदर माढान्याले ओलजन परिङन्या बौल बै आदर माढोरदी।" 24 "मछ्यु, ङा जेजन ऐढाच्या, जोले ङा बचन थटौ ओटन ङाजन परिङन्याल यर्त बिस्वास ढोव, नका सकाए अनन्त जिबन लेया। ना नियाल मारांडी, तर सिइकालतन नका जिबनल रा:स्यु लेया। 25 ङा जेजन मछ्यु, ऐढाच्या, नका बेला रांदा, ओटन ना बेला आकै ज्या, जब सिन्याङै परमेस्वरलं ज़ाल ग़ा थएर, ओटन थएन्याङ बान्चिन्या लेरा। 26 दानाङभन्या जोमनलेस्यु बौ ओलसै जिबनल ले, ओमनलेस्युज बौले आज़ाजन बै आल्योङै जिबनल स्रोट ताइन्या अढिकार यांस्यु नाएवा। 27 ओटन ङाजन ङा बौले नियाल निर्नय ढान्या अढिकार यांस्यु नाटङवा, दानाङभन्या ङा रुल ज़ा हो। 28 ईकात अचम्म तामानिच्यो, दानाङभन्या बेला रांज्याया, जब ऊईल लिज्यान्याङ सोगलैले ओलं ग़ा थएन्या लेरा, 29 ओटन ऊईलन बाहेर पलिईस्यु रारां सुकर्म ढान्याङ जिबन पुनरुत्थानल नाल्ट, सनर कुकर्म ढान्याङ सजायल आग्या पुनरुत्थानल नाल्ट जिङदा सोन्यालेरा।"✝5:29 दानियल १२:२

येशुल गवाइ

30 "ङा ङाईज नैज ढाऔ माढुदुङदी। जो ङा परमेस्वरङन थटङ, ङा नैताइन्याई निया ढोङा, सनर ङा निया ठिक ठहरिया, दानाङभन्या ङा इच्छ्या मारोकङदी, तर ङाजन परिङन्याल इच्छ्या पुरा ढाऔ चाहिङा।"

31 "यदि ङा ङाबारेल बयन योंङकन ङा गवाइ सत्य माताइदी।