1 ✝ 1:1 मलाकि ३:१ कजसुबायि पिजा येशु ख्रिष्टयि लोन ल सुरु च्युच्युङा। 2 यशैया ङोन्सेखिलङानयि किताबला धि च्वरा टिटिबा धु: "तोइ, ङा ङाहि तेङलायि लोन खेरङानला ख्युइ ताङताङला चोङ ज्याइ, सुइ ख्युइ लाम तयार सुन।✝1:2 मलाकि ३:१ 3 च्याङ मेते साला क्ये धोन्ङान झि, ‘कजसुबायि लाम तयार सोइ, ख्युइ लाम थारका सोइ।’"✝1:3 यशैया ४०:३ 4 बप्तिस्मा तेरङान युहान्ना तिक्पा झँयापयि बप्तिस्मा टाइक्ये कितु च्याङ मेते साला थोङसोङ। 5 यहुदियायि देश पोरो राङ यरुश्लेमला त्योएङान पोरो ख्युइ तेहा थोन्दे लेप्सोङ। राङ हतिबे राँ राँसि तिक्पा खेलेनकिन राङ ख्युइ चिने यर्दन चाङबोने बप्तिस्मा खेरतेलो। 6 युहान्ना उटयि पुने सोसोइबि कोहिला कोन्किनलो, राङ केप्पाला पाबुइ कारा छिङिन, राङ पानापाना राङ झङगलयि राङ सेनलो।✝1:6 २ राजा १:८ 7 ख्युइ जु नेन राङ टाइक्ये क्याइसोङ, "सुते ङाहि च्येला हुन खो ङाले च्येला ना, तेहि घो कुँरे ख्युइ पौलायि ताना क्यायापयि लायकयि याङ मेता। 8 ङाहि खेला छुयि बप्तिस्मा पिपिना होतो, हिन्नाङ ख्युइ खेला पवित्र आत्मायि बप्तिस्मा तेरङान ना।"

9 तेहि हति ङिनला येशु गालिलयि नासरतने लेप्सोङ, राङ युहान्नाने यर्दन चाङबोने बप्तिस्मा खेरसोङ। 10 छ्युने थोनि पाल्ला ख्युइ तेङला पेपे राङ पवित्र आत्माला ङोम्मुयि धोला रेँ थोला पापते होङान थोङसोङ। 11 तेहि तेङलाने धि च्वरा क्ये झि लेप्सोङ, "ख्योए ङाहि करि पिजा ना, ख्योए ङ्याबो ङा लेइराङ काका होए।"

12 पवित्र आत्मायि खोला हतितुइना राङ च्याङ मेते साला खेरसोङ। 13 तुइने छोए तेन राङ खोल ङिन खलङि च्याङ मेते साला तातेलो। खो झङगलयि तुढोतेबा ङ्याबो तातेलो, राङ तेङलायि लोन खेरङानतेबे खोला स्यापच्यि स्युइसोङ।

14 तेहि युहान्ना झ्याल्ला थेप छारते कजसुबायि लोन ल टाइक्ये लकिनराङ येशु गालिलला लेप्तेलो। 15 ख्युइ नाइसोङ, "भेला पुरा च्युङ छारते, राङ कजसुबायि राज्य धुनला लेप छाछारा धु। घ्योप्पा कि, राङ लोन लला हिछे कि।"

16 गालिलयि नेमु नेमुला ढुइतुइना ख्युइ सिमोन राङ ख्युइ भाइ अन्‍द्रियासला छो छोम्मुवाला जालि झुयिन ताताता थोङसोङ। चिचालानाना हतिबा जाल चुरे ङ्या सुङानयि मितेबा हिना। 17 येशुयि हतिबाला नाइसोङ, "ङाहि च्येला सअ, राङ ङा खेला मितेबाला झाल क्याङान सो ज्याइ।" 18 हतिबे हतितुइना राङ रेँ झाल ताङदे, राङ ख्युइ च्येला लेप्सोङ। 19 तेहि टिझि फाला पुते ख्युइ जब्दियायि पिजा ङि याकुब राङ युहान्नाला डुङगाला ताते झालि ढुइङान थोङसोङ। 20 ख्युइ हतिबाला हतितुइना राङ क्ये ताङसोङ, राङ हतिबे रेँ आके जब्दियाला ज्यामिबा ङ्याबो डुङगाला राङ ताङदे ख्युइ च्येला लेप्सोङ।

21 तेहि हतिबा कफर्नहुमला पुइसोङ, राङ हतितुइना राङ ङालसुइ ङिनला यहुदि झोमसि खिमला स्युरे ख्युइ छोइ लोबाला छेलसोङ। 22 तेहि हतिबा ख्युइ छोइ थोङदे हा:लाइसोङ। चिचालानाना ख्युइ हतिबाला शास्त्रिबा च्वरा माना, हिन्नाङ आङ राङ ङ्याबो लाप्सोङ।✝1:22 मत्ति ७:२८-२९ 23 हति भेलाला राङ हति यहुदि झोमसि खिमला ढे भाभा काकालि मिझि धुलो। 24 ख्युइ जु नेन राङ क्ये तोन्सोङ, "ए नासरतयि येशु, ङेला ख्योए ङ्याबो च्हि सरकार? च्हि ख्योए ङेला मासि लोङदु लेलेबा हिनाइ? ङाहि ख्योएला ङोस्येयिन, ख्योए कजसुबायि पवित्र मिझि ना।"

25 हिन्नाङ येशुयि हतिला जु नेन राङ ङ्योइसोङ, "च्यामाना त्योए, राङ हतिने थोन्दे क्यु।" 26 हति मिला लछार पछार किन राङ हति ढे भाभाते क्ये छेया धोनिन राङ हति मिने थोन्दे पुइसोङ।

27 तेहि पोरो हा:लाइसोङ राङ, तेहि हतिबे जु नेन राङ रेँ नाङला ढिरे किताला छेलसोङ, "धि च्हि ना? धि नि छोइ सारबा हिना। धि ता आङ राङ ङ्याबो भाभा ढेला याङ आदेश तेरिनदु, राङ हतिबा याङ ख्युइ आदेश ङ्यानकिन्दु।" तेहि घ्यबो राङ येशुयि क्याक्याइबि लाइ गालिलयि फाला छुलुइ सा पोरोला टाइक्ये हुवाला छेलसोङ। 28 तेहि घ्यबो राङ येशुयि लाइ गालिलयि छेत्र फाला छुला पोरोला टाइक्ये च्युङसोङ।

29 तेहि खो हतितुइना राङ यहुदि झोमसि खिमने थोन्दे याकुब राङ युहान्ना ङ्याबो सिमोन राङ अन्‍द्रियासयि खिमला स्युसोङ। 30 सिमोनयि इबि छ्याबा फोक्ते नाप्पा धुलो, राङ हतिबे हो:प्तामेला खोला मुइ भारेला नाइसोङ।✝1:30 लुका १२:७ 31 खो धुनला लेप्ते मुइ लाक्पा सुङदे मोला लाँङदेलो, राङ छ्याबायि हतिला ताङ छारसोङ। तेहि मुइ हतिबे स्यापच्यि स्युइरेलो।

32 हति कोमु ङिमा टे छारते मितेबे ख्युइ तेहा नाप्पा मितेबा राङ ढे काकाला पोरोला ख्योसोङ। 33 पोरो भजारयि मि राङ हति कोला झोम्दे तेतु। 34 कुरु नाझि तुतुइबा लेइराङ नाप्पातेबाला ख्युइ टाक्तु च्युसोङ राङ लेइराङ ढे काकालातेबाला ढे तोनसोङ, हिन्नाङ ढेतेबे खोला ङोस्येस्येबाति ख्युइ हतिबाला ता नारु मा च्युका।

35 नामे साल्बो होङयापले लेइराङ ताङला खोला लाँरे फिला च्याङ मेते साला पुइसोङ, राङ हतिया मोनलाम क्यापसोङ। 36 सिमोन राङ खो ङ्याबो होएतातेबा खोला फाकिन् राङ पुइसोङ। 37 खोला ठे छारते हतिबे नाइसोङ, "पोरो ख्योएला फाकिन्दु।"

38 तेहि ख्युइ हतिबाला नाइसोङ, "सअ, हुइ धुनला होएते स्यान भजारला ढो, राङ हति याङ ङाला टाइक्ये किच्याइ खुहोङ, चिचालानाना धि चाला राङ ङा लेलेबा ना।" 39 तेहि गालिल पोरो राङ हतिबे यहुदि झोमसि खिमतेबाला टाइक्ये किन राङ-राङ ढेतेबाला धेकिन राङ खो पुतेलो।

40 तेहि लाक्पा काकामि नाझा होएता झि ख्युइ तेहा लेप्ते पुइमु चुरे जु नाइरे स्युवा क्यापसोङ, ख्युइ धोप्पा होएना ङाला टाक्तु झ्यु ङ्युइकिन।

41 तेहि ङिङच्येयि खाँरे रेँ लाक्पा क्याङदे हतिला घुलदेलो, राङ हतिला नाइसोङ, "ङ सम किच्याइ, ख्योए टारो कि।" 42 हतितुइना राङ ख्युइ लाक्पा काकामि नाझा हतिने मेता च्युङदेलो, राङ हति टा छारसोङ। 43 तेहि ख्युइ हतिला कडा आदेश पिन्दे जु नेन राङ चाँरेलो, 44 "तोइ, ख्युइ धि सुलाङ माना, हिन्नाङ पु रेँ राङला पुजारिबे तेहा तोन राङ ख्योए टाटाकाति चाला मितेबे साछियि चाला मोशायि आदेश च्वरा भोल क्यापते फुल।"✝1:44 लेवि १४:१-३२ 45 हिन्नाङ हति थोन्दे पुइसोङ, तेहि धि भारेला मिसाँबा टाइक्ये किताला छेलसोङ, राङ येशु याङ भजारला खुलास्ता ढो माङ्युबा, राङ च्याङ मेते साला तातेलो, हिन्नाङ मितेबा फाला छुलो पोरोने ख्युइ तेहा लेप्सोङ।