1 हति साला ताङदे यर्दन चाङबोयि फारकानला यहुदियायि साला येशु पुइसोङ राङ मिझोमतेबा ख्युइ तेहा झोमसोङ, तेहि ख्युइ लुलाम च्वरा हतिबाला याङ ख्युइ छोइ पिन्सोङ।

2 फरिसितेबा ख्युइ लेप्ते खोला छोए ताइरे टिसोङ, "च्हि मि रेनयि रेँ केरमान ङ्याबो मिजे क्याइरे पेयाप ल हिनाइ?"

3 ख्युइ हतिबाला जवाक पिन्दे नाइसोङ, "मोशायि खेला च्हि आदेश पिपिना होतो?" 4 हतिबे नाइसोङ, "प्येयापयि पत्र झि टिरे मितेबे रेँ केरमान ङ्याबो मिजे क्याइरे पे ङ्युइकिन नाइरे मोशायि आङ पिपिना होतो।"

5 हिन्नाङ येशुयि हतिबाला नाइसोङ, "खि सम क्योङबो च्युच्युङाति चाला ख्युइ खेला धि आदेश टिरे पिन्सोङ। 6 हिन्नाङ कालबा छ्याने राङ ताङला कजसयुबायि खेला पिजा राङ पोमो सोसोइबा होतो।✝10:6 उत्पत्ति १:२७; ५:२ 7 ‘हतिचाला मितेबा रेँ आके राङ आमाला ताङदे रेँ केरमान ङ्याबो ढिक्ते तोकिन। ✝10:7 उत्पत्ति २:२४ 8 राङ हति ङिकार स्हु च्हि राङ हुन।’ हतिबा याङ ङि माना, हिन्नाङ स्हु चिराङ हुन। 9 हतिचाला कजसुबायि सुला च्हि सोइरे थुथुता होतो, मितेबे हतिला माभे।" 10 खिमला होतितुइना याङ लोब्टुबे धि भारेला येशुला टिसोङ। 11 ख्युइ हतिबाला नाइसोङ, "सुइ रेँ केरमान ङ्याबो मिजे क्याइरे प्येरे स्यान ङ्याबो मिजे किन, हति ख्युइ विरोधला पातार किन। ✝10:11 मत्ति ५:३२; १ कोरिन्थि ७:१०-११ 12 तेहि तेम्बारे पुमोयि रेँ ख्योबो ङ्याबो मिजे क्याइरे प्येरे स्यान ङ्याबो मिजे किना, हति पातार किन।"

13 मितेबे च्यिटा टिमातेबाला येशुयि छुइ क्यायोङ नोइबि सम क्याइरे ख्युइ तेहा ख्योसोङ, हिन्नाङ लोब्टुतेबे हतिबाला ङ्योइसोङ। 14 तेहि हति थोङदे येशुला स्येता लाँदु, राङ हतिबाला नाइसोङ, "च्यिटा टिमातेबाला ङाहि तेहा होङदु छ्यु, हतिबाला माघा, चिचालानाना कजसुबायि राज्य धिबे ना। 15 तेम्बारे ङा खेला नाज्याइ, सुइ कजसुबायि राज्यला च्यिटा टिमा झि च्वरा क्याइरे गह्रण मिकिता, हति च्हि क्याइरे याङ हति नाङला मिस्युबा।"✝10:15 मत्ति १८:३ 16 तेहि ख्युइ हतिबाला रेँ पाङला खेरते हति थोला रेँ लाक्पा पोरते हतिबाला च्यिनलाब पिन्सोङ।

17 येशु लामला ढुइतुइना, मि झि स्युरे लेप्सोङ राङ ख्युइ धुनला पुइमु चुसोङ, राङ खोला टिसोङ, "हे ल गुरु, नामयाङ मिसिनयापयि मिजे खुयापला ङाहि च्हि कि कोइ हुन?"

18 येशुयि हतिला नाइसोङ, "ख्योए चिला ङाला ल नेन? कजसुबा चिक्पा झि अर्थात सुयाङ ल मेता। 19 खेला आदेशबाता छ्या होतो, अर्थात मिपसोए मिकियाप, पातार मिकियाप, कुम्मा मिकुयाप, चुन साछि मितेरयाप, ठगि मिकेयाप, रेँ आके राङ आमाला सम्मान कियाप।"✝10:19 प्रस्थान २०:१२-१६; व्यवस्था ५:१६-२०

20 तेहि ख्युइ हतिला नाइसोङ, "गुरुज्यु, धिबा पोरोता ङाहि स्यारा हति भेलाने राङ क्याक्याइबा होतो।"

21 येशुयि हतिला ताइसोङ राङ हतिला करि क्याइरे नाइसोङ, "ख्योए तरह ताम झिकि कोइबा धु। क्यु, राङ ख्योएला ख्युइ चोम होए हतिबा पोरो छो राङ टाङनातेबाला पिन, राङ ख्योएला तेङलाला सम्पति खुङान ना। तेहि लेप्ते ङाहि च्येला सअ।" 22 हिन्नाङ हति तामयि ख्युइ च्ये मुन्ना च्युङसोङ, राङ हति दुखि च्युङदे पुइ छारसोङ, चिचालानाना हतिला लेइराङ क्युइ नोर होतो।

23 तेहि फाला छुलो ताइरे येशुयि ख्युइ लोब्टुतेबाला नाइसोङ, "छुक्पोला कजसुबायि राज्यला स्युयाप चोम काबो धुइ।"

24 ख्युइ नानाइबि धि तामला लोब्टुबा लेइराङ हा:लाइरेलो। हिन्नाङ येशुयि याङ हतिबाला नाइसोङ, "चिटाबा, क्यु नोरयि थोला हिछे किङानला कजसुबायि राज्यला स्युयाप चोम काबो धुइ। 25 छुक्पो मिला कजसुबायि राज्यला सयुयापले ता बरु खापयि मिने उट स्युयाप लाइला हुन।" 26 हतिबा लेइराङ हा:लाइरे खोला नाइसोङ, "हचु हिन्नाङ सु क्योपते त्योए ङ्युकिन?"

27 येशुयि हतिबाला ताइरे नाइसोङ, "मियि चाला ता धि असम्भव ना, हिन्नाङ कजसुबायि चाला मेता, चिचालानाना कजसुबायि चाला पोरो राङ सम्भव होतो।"✝10:27 अय्युब ४२:२; लुका १:३७

28 पत्रुसयि खोला नाइसोङ, "तोइ, ङि पोरो राङ ताङदे, राङ ख्युइ च्येला लेलेबा होतो।"

29 येशुयि नाइसोङ, "तेम्बारे ङा खेला नाज्याइ, सुइ ङाहि चाला राङ लोन लयि चाला खिम वा आज्यो भाइ वा इझि भैनि वा आके आमा वा पिजा पोमु वा सा स्यिङ तुइ, 30 हतिला तुका ङ्याबो-ङ्याबो क्या झि गुणा खिम, आज्यो भाइ, इझि भैनि, आमा, पिजा पोमु राङ सा स्यिङ धि भेलाला राङ खुङान ना, तेहि होङानयि कालबाला नामयाङ मिसिनयापयि किप्पोयि मिजे। 31 हिन्नाङ लेइराङ ताङला होएतातेबा च्येला, राङ च्येला होएतातेबा ताङला होङान ना।"✝10:31 मत्ति २०:१६; लुका १३:३०

32 हतिबा यरुश्लेम यहला ढुइतुइना, राङ येशु राङ हतिबे ताङ ताङला डुन त्येतु। लोब्टुतेबा हा:लाइदु, राङ तेहि च्येला होङानतेबा झिदु। तेहि हतितुइना ख्युइ लोब्टु च्युनङि ङिबाला याङ यह चिला खेरते रेँ थोला होङानयि तामतेबा हतिबाला स्येसोङ। 33 ख्युइ नाइसोङ, "तोइ, हु यरुश्लेम यहला ढुन ताताता होतो। हतिया मियि पिजाला घोबा पुजारितेबा राङ शास्त्रितेबे तेहा टोएङान ना, राङ हतिबे खोला स्योएयापयि ङेबा तेरङान ना, राङ यहुदि मान्ते मितेबे लाला टोएङान ना। 34 तेहि हतिबे ख्युइ ना च्योएङान ना राङ खोला छिमा धेपङान ना, खोला च्यायि छेरमा क्याङान ना राङ खोला स्योएङान ना। हिन्नाङ ङिन सुमयि च्येला खो याङ सोम्बो च्युङदे लाँङान ना।"

35 जब्दियायि पिजा ङितेबा, याकुब राङ युहान्ना ख्युइ तेहा लेप्ते नाइसोङ, "गुरुज्यु, ङि खेला च्हि लाँ ख्युइ ङि चाला कि नाङान ङे सम किन होए।" 36 ख्युइ हतिबाला टिसोङ, "खि चाला ङाहि च्हि कि नासोम खे किन?" 37 हतिबे खोला नाइसोङ, "ख्युइ छे धेयाप ङि नाङने च्हि ख्युइ याइ यहला राङ स्यानते ख्युइ योन यहला तोच्याइ खुयापयि आङ ङेला नाङ।"

38 हिन्नाङ येशुयि हतिबाला नाइसोङ, "खे च्हि लुइ सो खेला छ्या मिधु। काङ भोटो ङा थुइ च्हि खि थुङ ङ्युइकिनाइ? अथवा काङ बप्‍तिस्‍मा ङाहि खेखेरा होतो, हति बप्‍तिस्‍मा खि खेर ङ्युइकिन नाइ?"✝10:38 लुका १२:५०

39 हतिबे खोला नाइसोङ, "ङि ङ्युइकिन।" येशुयि हतिबाला नाइसोङ, "काङ भोटोला ङा थुइ हति खि थुङान ना, राङ काङ बप्‍तिस्‍मा ङाहि खेखेरा होतो हति बप्‍तिस्‍मा खे खेरङान ना। 40 तेहि ङाहि याइ यहला राङ ङाहि योन यहला त्योएङान ङाहि तेरयाप माना, धि ता सुगे-सुगे चाला तयार च्युच्युङा होतो, हतिचाला राङ ना।"

41 धि थोइरे लोब्टु च्युगार याकुब राङ युहान्ना ङ्याबो स्येताङ क्याइसोङ। 42 तेहि येशुयि हतिबाला रेँ क्ये ताङदे नाइसोङ, "खेला छ्या होतो कि यहुदि मान्ते मितेबे थोला आङकिङानयि हतिबे थोला अख्तियार चला किन। तेहि हतिबे छेया छेयातेबे हतिबे थोला आङकिन।" ✝10:42 लुका २२:२५-२६

43 "खेला धि च्वरा मिहा। हिन्नाङ खि नाङने सु छेया होङयापयि सम किन, हति खि स्यापच्यि स्युङान होङ कोयिन। ✝10:43 मत्ति २३:११; मर्कुस ९:३५ 44 तेहि खिला सुइ ताङस्युवा होङयापयि सम किन, हति पोरोयि यक्पुवा होङ कोइ राङ हुन। 45 चिचालानाना मियि पिजा स्यापच्यि खुयापला माना, हिन्नाङ लेइराङ थारथोनयापयि घोङयि चाला रेँ उ तेरतु लेलेबा ना।"

46 हति च्येला हतिबा यरिहोला लेप्सोङ, राङ खो रेँ लोब्टुबा ङ्याबो तुम छोम्मुवा ङ्याबो यरिहोने थोनितुइना तिमैयि पिजा बारतिमै, मि काना टाङना झि, लामयि नेमुला ताताता धु। 47 जब खो नासरतयि येशु हिना नाङान थोइरे, हतितुइना क्ये क्याइरे हति नाला छेलसोङ, "हे येशु, दाउदयि पिजा, ङाहि थोला ङिङ्च्ये।"

48 तेहि लेइराङयि खोला च्यामाना त्योए नाइरे ङारसोङ। हिन्नाङ हति झन क्ये छेया क्याइरे क्ये धोनाला छेलसोङ, "हे दाउदयि पिजा, ङाहि थोला ङिङ्च्ये।" 49 तेहि येशु कुसोङ राङ नाइसोङ, "हतिला क्ये तोङ।" तेहि हतिबे हति कानाला जु नाइरे क्ये ताङसोङ "हिम्मत कि, ल्हँ, ख्युइ हतिला क्ये तुइदु।" 50 तेहि रेँ कोट टिम्दे हति ल्हाँसोङ राङ येशुयि तेहा लेप्सोङ। 51 येशुयि हतिला नाइसोङ, "ख्योए च्हि धोप्पा किन, ङा ख्युइ चाला च्हि किच्याइ? हति मि कानायि नाइसोङ?" हति मि कानायि खोला नाइसोङ, "रब्बि, ङाला थोङान सोइ।" 52 तेहि येशुयि हतिला नाइसोङ, "ख्युइ लामला स्यु। ख्युइ हिछेयि ख्योए टाक्तु च्युसोङ, राङ लाम्ला येशुयि च्येच्येला लेप्सोङ।"