1 "तेङलायि राज्य सायि ताक्पो झि च्वरा ना, सु जब थरह रेँ अंगुरयि भारिला लाइकिङानतेबाला खला ला लाइ फातु फिला थोन्सोङ। 2 लाइकोङानबाला खुँयायि ङिन झिकि ङुलयि सिक्का झि पिन्दे ख्युइ हतिबाला रेँ अंगुरयि भारिला चाँसोङ।" 3 "जब खो नौ बजे झोमला फिला थोन्दे, ख्युइ स्यानतेबाला भजारयि चोकला लाइ मेला लाँरे ताताता थोङदे। 4 राङ ख्युइ हतिबाला नाइसोङ, ‘खे याङ अंगुरयि भारिला लाइ कितु क्यु, राङ काङ ल होतो हति ङा खेला तेरच्याइ।’" 5 तेहि हतिबा पुतेलो। "याङ ख्युइ च्युनङि बजे ना माला राङ ङिमा झारायि तिन बजेना माला फिला थोन्दे हति च्वरा क्याइसोङ। 6 ख्युइ पाँच बजेना माला फिला थोन्दे स्यानतेबा लाङ लाँरे ताताता ठेसोङ, राङ हतिबाला नाइसोङ, ‘खे ङिन खेरे लाइ मेला चिला लाँरे तोकिन?’" 7 "हतिबे खोला नाइसोङ। ‘सुइ याङ ङेला खला पिन्दे लाइ कोकोइबा मेता।’" "ख्युइ हतिबाला नाइसोङ, ‘खे याङ अंगुरयि भारिला क्यु राङ लाइ कि।’" 8 "जब कमु च्युङदे, हतितुइना अंगुरयि भारियि ताक्पोयि खुरि लाइ किङानतेबाला नाइसोङ, ‘लाइ किङानबाला क्ये ताङदे च्येस्युवा होङानने क्याइरे ताङला होङान थुला हतिबे खला पिन।’" 9 "पाँच भजेला लाइला लेलेबातेबा याङ लेप्सोङ, राङ हतिबा पोरोयि ङिन झिकि ङुलयि सिक्का खुसोङ। 10 जब ताङला ङुलयि सिक्काला खेखेरातेबा लेप्सोङ, तेहि हतिबे धिले याङ मा खुकिन नाइरे विचार क्याइसोङ, हिन्नाङ हतिबा पोरोला ङि झिकि खला खुरेलो। 11 खला खुरे सायि ताक्पोयि विरोध्रला हतिबा फा ताम नाला छेलसोङ। 12 हतिबे नाला छेलसोङ, ‘धिबा च्येला घण्टा झि मात्रा लाइ क्याइसोङ, हिन्नाङ ख्युइ हतिबाला ङे ङिन खुरबो खुरङान राङ ङिमा छाला लेइराङ तुरि क्याइरे।’"

13 "हिन्नाङ ख्युइ हतिबे नाङने चिला जवाक पिन्सोङ, ‘रुवा,’ ङाहि ख्युइ थोला अन्य रच्चिया क्याक्याइबा मेता। च्हि ख्युइ ङा ङ्याबो पुरा ङिन झिकि खलाला लाइ कियाप ङ्याङ्याना माना च्हि? 14 ख्योएला खुयापयि आलाइ खुरते खिमला क्यु। धि च्येमे मिते लाङ ख्योएला पिपिना चोम ङा तेर सोम होए। 15 ङाहि चोम होतो, हति ङारि धोप्पा क्याक्याइबा च्वरा कि मिङ्युबाइ? ङाहि आलाइला ख्योए चिला ठाधो किन?"

16 "धि च्वरा क्याइरे च्येमा ताङला होङान ना राङ ताङमा च्येमा होङान ना।"✝20:16 मत्ति १९:३०; मर्कुस १०:३१; लुका १३:३०

17 यरुश्लेम यहला ढुइतुइना येशुयि लोब्टु च्युनङिबाला करुला खेरते हतिबाला लामला नाइसोङ, 18 "हु यरुश्लेम यहला ढुन होतो। ता मि पिजा घोबा पुजारितेबा राङ शास्त्रितेबे लाला स्योएङान ना, राङ हतिबे खोला स्योएयापयि ङेबायि दोषि सोङान ना। 19 ख्युइ नाच्योङान, च्यायि छेरमा क्याङान, राङ क्रुसला धयाप नाइरे हतिबे खोला स्यान यहुदि मान्ते मितेबे लाला स्योएङान ना, राङ ङिन सुभाला खो सोम्बो च्युङदे लाँङान ना।"

20 तेहि जब्दियायि केरमानयि रेँ पिजाबाला ङ्याबो खेरते ख्युइ धुनला पुइमु चुरे खोला स्युवा क्यापतेलो। 21 ख्युइ मोला टिसोङ, "ख्योए च्हि धोप्पा किन?" मुइ खोला नाइसोङ, "आदेश छ्यु राङ ख्युइ राज्यला, ङाहि धि पिजा ङि नाङने च्हि ख्युइ लाक्पा याइ यहला, राङ स्यानते ख्युइ योन यहला तोच्याइ खु।" 22 हिन्नाङ येशुयि जवाक पिन्सोङ, "खे च्हि लोङिन सो छ्यामेता। काङ भोटो ङा थुङाला छेछेला होए, च्हि ख्योए हति थुङ ङ्युकिनाइ?" हतिबे नाइसोङ, "ङ्युइकिन।" 23 ख्युइ नाइसोङ, "ङाहि भोटो खे थुङान ना, हिन्नाङ ङाहि याइ राङ योन यहला तोतु झुयापयि ताम ङाहि लाला मेता। धि सा हतिबे ना, सुइ चाला ङाहि आकि तयार क्याइ छारते।" 24 धि थोइरे लोब्टु च्यु गार हति भाइ ङि ङ्याबो ठोइरेलो। 25 हिन्नाङ येशुयि हतिबाला पोरोला रेँ चिना क्ये ताङदे नाइसोङ, "खेला छ्या राङ मेति, कि यहुदि मान्ते मि आङकिङानबे हतिबे थोला कडा आङकिन, राङ छ्येछ्येतेबे हतिबे थोला आङ किन।✝20:25 लुका २२:२५-२६ 26 खि उइला हति च्वरा मिहा, हिन्नाङ सु खि नाङने छ्ये होङयापयि धोप्पा किन, हति खि स्यापच्यि होङ कोयिन।✝20:26 मत्ति २३:११; लुका २२:२६ 27 सु खि नाङने ताङस्युवा होङयापयि धोप्पा किन, हति खि यक्पुवा होङकोइ हुन, 28 च्हिरु क्याइरे मि पिजा याङ स्यापच्यि खुयापला माना हिन्नाङ स्यापच्यि स्युरु राङ थारथोनयापयि तोनयि चाला रेँ उ तेरतु लेलेबाना।"

29 येशु राङ ख्युइ लोब्टुबा यरिहोने ढुइतुइना, मि झोमयि तुम छेया झि ख्युइ क्यापला लेप्सोङ। 30 लामयि धुनला ताताति मि काना ङि येशु हति लामने डुनदु ना थोइरे जु नेनगा क्ये तोनसोङ, "हे प्रभु, दाउदयि पिजा, ङाहि थोला ङिङ्च्ये।" 31 मि झोमयि हतिबाला च्यामाना त्योए नाइरे ङारसोङ, हिन्नाङ हतिबा जु नेन राङ झन क्ये छेया क्याइरे क्ये तोन्देलो, "हे प्रभु, दाउदयि पिजा, ङि थोला ङिङ्च्ये।" 32 तेहि येशु कुरेलो राङ हतिबाला क्ये ताङदे नाइसोङ, "खे च्हि धोप्पा किन? ङा खि चाला च्हि किच्याइ?" 33 हतिबे खोला नाइसोङ, "हे प्रभु, ङि मि फेया।" 34 येशुयि ङिङच्येरे हतिबे मिला घुलसोङ राङ हतितुइना राङ थोङान च्युङसोङ राङ हतिबा ख्युइ च्येला पुइसोङ।