1 याङ च्येला छो छोम्मुवायि नेमुला ख्युइ छोइ तेराला छेलसोङ। ख्युइ फाला छुलो पोरोला मियि तुम झोम छोम्मुवा च्युङसोङ कि खो हति छो छोम्मुवाला होएता डुङगा झिला स्योनसोङ राङ हतिला त्येसोङ। मितेबा छो छोम्मुवायि नेमु थाङला ताताता धु। 2 तेहि ख्युइ हतिबाला प्येला लेइराङ ताम लेप्सोङ। तेहि ख्युइ रेँ छोइला हतिबाला जु नाइसोङ:।

3 "ङ्योन! तोइ, सावोन धेपङान मिझि सावोन झुतु पुइसोङ। 4 तेहि झुबितुइना सावोन रेन लामला छारसोङ, राङ हति सावोन च्याचिउ लेप्ते साइ छारसोङ। 5 सावोन रेन टोउ होएते साला छारसोङ, काँहा साबे लेइ मिधु, राङ सा तिङ रिङमुवा मेताति हति घ्यबो राङ क्येसोङ। 6 ङिमा छा स्यार छारते च्येला टुमा क्येक्येबातेबा काम छारसोङ, प्हारा माक्येबाति हति स्यि छारसोङ। 7 सावोन रेन छेरमायि उइला छारसोङ। छेरमातेबा छारसोङ, राङ बोटितेबा थोन्सोङ, तेहि हतिला ढेबु मा छ्यासोङ। 8 हिन्नाङ सावोन रेन साला छारसोङ, राङ किन राङ छारकिन पुते गुणा सुम, खलसुम गुणा राङ क्या झि गुणा ढेबु पिन्सोङ।" 9 तेहि ख्युइ नाइसोङ, "सुला ङ्यानयापयि नामज्यो होतो, हति ङ्योन।"

10 जब खो चिक्पा च्युङदे, तेहि लोब्टु च्युनङि लोब्टुतेबा राङ ख्युइ फाला छुलो होएतातेबे खोला प्येयि भारेला टिसोङ। 11 ख्युइ हतिबाला नाइसोङ, "कजसुबायि राज्यि फाला होएते ताम खेला पिपिना होतो, हिन्नाङ फियितेबाला नाना ताम पोरो प्येला नेन, 12 कि हतिबा ताज्याइ ता तेन्दु, हिन्नाङ मिथोङा, ङ्यान ज्याइ ता ङ्यानिन्दु हिन्नाङ हा:मिकुवा स्यान अर्थात हतिबे तिक्पा झयापयि घ्योप्पा किङान ना, राङ हतिबे तिक्पा माप होङान ना।"✝

13 ख्युइ हतिबाला नाइसोङ, "खि धि प्येयि खुँ हा:मिकुवा? हचु हिन्ना स्यान प्ये पोरोयि खुँ च्हिरु क्याइरे हा:को ज्याइ? 14 सावोन धेपङानयि वचन धेबिन। 15 मि रेन लाम्ला छाछारि सावोन च्वरा ना। जब हतिबे वचन ङ्यान किन, हतितुइना राङ तुइ हुन, राङ हतिला ताताबि वचन खेर छारकिन। 16 हति च्वरा क्याइरे टोउला तातातेबा हति बाराङ ना, काङति जब वचन ङ्यानकिन हतितुइना केन राङ हति खाला ङ्यानकिन। 17 हिन्नाङ हतिबे रेँ प्हारा माक्ये बाति हति टिझि थु मात्रा त्योए ङ्युइकिन। हिन्नाङ जब वचनयि चाला दशा वा तुका खुकिन, हतिबा हतितुइना राङ घेलिन। 18 छेरमि उइला ताताबा हति राङ ना, काङति वचन ङ्यानकिन, 19 हिन नाङ धि संसारयि समतु राङ क्युयि लोभ राङ स्यान चिगे समना क्याइरे वचनते मासि सुन। हति ढेबु छ्यायाप मिहा। 20 हिन्नाङ सा लला ताताबा हति राङ ना, काङति वचन ङ्यानकिन, राङ खाला ङ्यानकिन, राङ ढेबु तेरिन सुम च्यु गुणा, खलसुम गुणा राङ क्याझि गुणा।"

21 ख्युइ हतिबाला नाइसोङ, "च्हि सुगे बत्ति च्येते फकटिन हअला वा खाटि हअला पोर नाइरे नाङला ख्युहि नाइ? च्हि सामदानयि हअला पोर नाइरे मानाइ च्हि? 22 च्याङ भाइरे भोर मिङ्युइबा काङ ता मितोना, तेहि च्याङ फाला मेता काङ ते होएला मिख्युवा। 23 तेम्बारे सुला ङ्यानयापयि नामज्यो होए हति ङ्योन।"

24 येशुयी हतिबाला याङ नाइसोङ, "खि च्हि ङ्यानकिन, हतिला ध्यान पिन। चिचालानाना काङ चे क्यापते खे तेरिन हति छेला राङ खेला खुकिन। राङ खेला झन महा तेरङान ना। 25 चिचालानाना सुला होए हतिला तेरङान ना, राङ सुला मे हतिला होएता याङ हतिने ठरे खेरङान ना।"

26 ख्युइ नाइसोङ, "कजसुबायि राज्य धि च्वरा ना मि झिकि साला सावोन झुकिन। 27 तेहि खो ङ्याल ना याङ ङिन छान मेता लाँरे त्ये ना याङ हति सावोनते किन छारिन, हिन्नाङ हति च्हिरु क्याइरे छारिन, सो ख्युइ हा:मिकुवा। 28 सा खुरि क्येरु झ्युकिन, ताङला स्हु, हति च्येला ङिमा, तेहि ङिमाला ढु छ्यायिन। 29 हिन्नाङ जब साइ छोयिन, हतितुइना हति सोरा तुबाला छेलिन, चिचालानाना तोन तुइयापयि भेला लेप छाछारा हुन।"

30 येशुयी याङ नाइसोङ, "कजसुबायि राज्य काङ ङ्याबो थुकच्याइ? अर्थात काङ प्येला धि मनङि क्याक च्याइ? 31 धि ता रोयायि सावोनयि ढेबु च्वरा ना। काङते साला धेबिन। पृथ्‍वी नाङला पोरो छुवा च्युङ नाङ 32 जब धि धेबिन, तेहि हति किन, राङ सागपात पोरोले हति छेया हुन, राङ हतिला ढाला छेया-छेया किन, राङ पान्नाङयि च्याचिउतेबे हति ढालातेबाला छाङ सुन।" 33 हतिबे हो: को चोम ख्युइ धि च्वरा लेइराङ प्ये नाइरे हतिबाला वचन स्याते। 34 प्ये मेताला ख्युइ हतिबा ङ्याबो ताम मानाइबा, हिन्नाङ रेँ अल लोब्टुबाला ख्युइ फाला पोरोयि खुँ ल क्याइरे नाइसोङ।

35 हति ङिन छाम्मु च्युङ छारते ख्युइ लोब्टुबाला नाइसोङ, "सअ, हु फारकानला ढो।" 36 तेहि मियि तुमने बिदा च्युङ छारते, ख्युइ ताङला ताताति रिला हतिया रेँ लोब्टुबा लाङ खेरसोङ। राङ स्यान डुङगातेबा याङ हतिया राङ धु। 37 त तेहि हतिया हुरबो छोम्मुवा-छोम्मुवा क्यापसोङ, भाल्लापतेबा डुङगाला क्ये धोनाला छेलसोङ, धि थु कि डुङगा छुयि खाँला छेलसोङ। 38 को खोराङ डुङगायि क्यापयि भागला ङाइ झि च्युक्ते ङ्याङ्याला धु। ख्युइ हतिबाला जु नेन राङ ङि सातु च्युसोङ, "गुरुज्यु, ङे नुबाला छेलसोङ नाङानला च्हि ख्योएला वास्ता मेताइ?" 39 तेहि खो ङि स्येसोङ, राङ हुरबो छोम्मुवाला आदेश, राङ छो छोम्मुवायि भाल्लापतेबाला नाइसोङ, "खु चुमे त्योए! छ्याक्ते त्योए!" तेहि हुरबो छोम्मुवा छ्यासोङ राङ छोम्मुवा खुचुमे च्युङसोङ। 40 येशुयी लोब्टुबाला नाइसोङ, "खे चिला धि च्वरा क्याइरे झिकिन? खेला हिछे मेताइ?"

41 हतिबा लेइराङ झिसोङ राङ रेँ नाङला नारे क्याइसोङ, "धि सुना? हुरबो छोम्मुवा राङ छो छोम्मुवायि याङ धि आदेश ङ्यानकिन्दु।"