1 येशु राङ ख्युइ लोब्टुबा गालिल छो छोम्मुवायि गेरासेनसयि मुलुला लेप्सोङ। 2 येशु डुङगाने फिला थोनसोङ छारते तुरने भाभा आत्मा काकालि मि झि खोला ठेसोङ। 3 हति तुरसाला राङ तोकिनलो। सुइ याङ खोला च्यालतायि तेम मिङ्युइबा। 4 चिचालानाना हति लाम्मा लेइराङ नेल राङ च्यालतायि तातामा होतोलो, राङ हचु हिन्नाङ ख्युइ च्यालतातेबा तुबु-तुबु सोइरे च्योकिनलो। मि सुइ याङ हति स्यु छेरा छेरे हतिला रेँ काबुला भोर मि ङ्युइबालो। 5 हति ङिन छान मेता बारतै तुरतेबा राङ रितेबाला क्ये धोनिन राङ रेँ राङला टोउयि तुबिन राङ ढुनलो। 6 तेहि जब ख्युइ येशुला घ्याबोने राङ थोङदे तहि हतितुइना स्युरते लेप्सोङ, राङ खोला छ्या चालसोङ। 7 तेहि क्ये छेया क्याइरे हति नाइसोङ, "हे पोरोले छेया कजसुबायि पिजा येशु, ख्युइ ङा ङ्याबो च्हि लाइ होतो? ङा कजसुबायि ना क्यालदे ख्योएला स्युवा क्याक च्याइ, कि ङाला तुका मातेर।" 8 चिचालानाना ख्युइ हतिला नाइसोङ, "ए भाभा आत्मा। हति मिने थोन्दे सअ।" 9 तेहि ख्युइ हतिला टिसोङ, "ख्युइ मिनला च्हि ना?" हति नाइसोङ, "ङाहि मिनला फौज ना, चिचालानाना ङे लेइराङ होतो।" 10 हति ढे आत्मातेबाला हति साने फिला माधोन नाइरे हति खोला सम तिङने स्युवा क्यापसोङ।

11 हति धुनयि रिला फायि तुम छोम्मुवा झि छुन ताताता धुलो। 12 हति ढेतेबे खोला जु नाइरे स्युवा क्यापसोङ, "ङेला फातेबे तेहा ढोरु छ्यु, राङ ङे हति नाङला स्यु च्याइ।" 13 हिन्नाङ ख्युइ हतिबाला आङ पिन्सोङ, राङ भाभा आत्मातेबा फिला थोन्दे फायि नाङला स्युसोङ हा:लाम तोङ ङि थाबि हति तुम थुरने छो छोम्मुवा यहला च्येरिन राङ पुइसोङ राङ छो छोम्मुवायि नाङला नुपते स्यिसोङ।

14 हति फा छोङानतेबा टोइरे पुइसोङ, राङ भजार राङ युल युलला लोन नाइसोङ। राङ खास च्हि च्युच्युङा ना नाइरे मितेबा हतिया तारु लेप्सोङ। 15 तेहि हतिबा येशुयि तेहा लेप्सोङ, राङ थोङसोङ कि हति ढे काकालि फौज मि ल च्युङदे कोहिला कोन्दे तेतु। हति थोङदे हतिबा झिरे। 16 तेहि सुइ हति थोङदे, हतिबे ढे काकालि मि राङ फाला च्हि च्युच्युङा ना सो स्येसोङ। 17 तेहि हतिबे साने क्यु नाइरे मितेबे येशुला स्युवा क्याकाला छेलसोङ। 18 खो डुङगाला स्युबितुइना हति ढे काकालि मिति खो ङ्याबो त्योच्याइ नाइरे स्युवा क्यापसोङ। 19 हिन्नाङ ख्युइ हतिला आङ मापिनालो, हिन्नाङ हतिला नाइसोङ, "ख्योए रेँ खिमला पुते ख्युइ रुवातेबाला प्रभुयि ख्युइ चाला क्याक्याइबि लाइ ल राङ ख्योएला तातानि ङिङ्च्ये छोम्मुवायि मनङि क्योप।"

20 तेहि हति मि पुइछारसोङ, राङ येशुयि ख्युइ छाला चोम छोम्मुवा लाइ क्याइरे सो डेकापोलिस काङ टाइक्ये किताला छेलसोङ, राङ मि पोरो हा:लाइसोङ।

21 जब येशु याङ डुङगाला छो छोम्मुवायि फारकानला पुते, हतितुइना तुम छोम्मुवा झि ख्युइ फाला छुलो खाँसोङ तेहि खो छो छोम्मुवायि नेमुला होतोलो। 22 यहुदि झोमसि खिमयि नाङयि आङकिङानबे नाङने याइरस नाङान मिझि ख्युइ तेहा लेप्सोङ, राङ खोला थोङदे ख्युइ काङबाला छ्या चालसोङ। 23 राङ जु नाइरे स्युवा क्यापसोङ, "ङा च्यिटा टिमा स्यिले क्ये धु, लेप्ते ख्युइ थोला ख्युइ लाक्पा पोर, राङ हति तारो कि राङ सोनरो कि।"

24 तेहि येशु हति ङ्याबो पुइसोङ। तुन छोम्मुवा झि ख्युइ च्येला लेप्सोङ, राङ मितेबा ख्युइ फाला छुलो च्येररे किताला छेलसोङ। 25 तेहि लोन च्युनङियि ताङलाने ठा ढोङान पुमो झि हतिया धुलो। 26 हति लेइराङ अमज्यिबे लाने तुका खुँरे राङला होएता क्यु समप्ति पोरो खर्च क्याइरे याङ माटाका झन हतिले याङ नाप्पा थुवा च्युङदु। 27 येशुयि भारेला हति थोथोइबा धु, राङ तुमतेबे क्यापने लेप्ते ख्युइ कोहिला हति चुइ क्याइसोङ। 28 चिचालानाना मुइ समयि नाङ नाङला नाइसोङ, "ङाहि ख्युइ कोहिला मात्रा छुइ क्याइ ना याङ ङा टाकिन।"

29 तेहि हतितुइना राङ हति ठा क्युयाप घासोङ, राङ रेँ स्हुयि नाझा टाटाका हति हा:कोदु। 30 रेँ चिने शक्ति फिला थोथोना हो:प्तामेला येशुयि हा:कोरे तुमला क्याला ताइरे टिसोङ, "सुइ ङाहि कोहिलाला छुइ ल क्याइरे?"

31 लोब्टुतेबे खोला नाइसोङ, "मियि तुमयि च्येररे क्याक्याइबा ता ख्युइ थोथोङा होतो," राङ याङ ख्योए नेन्दु "सुइ ङाला छुइ क्याइरे?"

32 हिन्नाङ तेहि ख्युइ छुइ क्याङान सु ना नाइरे ख्युइ फाला छुलो पोरोला ताला छेलसोङ। 33 तेहि राङ च्हि च्युच्युङा होए हति हा:कोरे हति पुमो झिरे धारकिन राङ लेप्ते येशुयि धुनला घो कुरे, राङ खोला तेम्बा ताम पोरो नाइसोङ। 34 तेहि ख्युइ हतिला नाइसोङ, "ए पोमु, ख्युइ हिछेयि ख्योएला टाक्तु च्युच्युका ना। शान्ति राङ ङ्याबो क्यु। ख्युइ नाझा टावार सअ।" 35 को ताम नेतुइना, आङकिङानयि खिमने मितेबा लेप्ते नाइसोङ, "ख्युइ पोमुता स्यिसोङ। गुरुज्युला ता तरह चोम तुक तेरिन?" 36 हिन्नाङ हतिबे क्याक्याइबि तामला ध्यान मापिना येशुयि यहुदि झोमसि खिमयि आङकिङानबाला नाइसोङ, "माझि, हिछे मात्रा कि।" 37 तेहि येशुयि पत्रुस, याकुब राङ याकुबयि भाइ युहान्नाला अर्थात स्यान सुला याङ होङयापयि आङ मापिन्सोङ। 38 हतिबा यहुदि झोमसि खिमयि आङकिङानयि खिमला लेप्सोङ, तेहि ख्युइ ठुझि किङान, ङुङानतेबा राङ क्ये छेया ङुङानतेबा थोङसोङ। 39 नाङला स्युरे ख्युइ हतिबाला नाइसोङ, "खे चिला खैला बैला कि राङ ङुन? पुमो स्यिस्यिया मेता, हिन्नाङ ङ्याङ्याला धु।" 40 हिन्नाङ ख्युइ तामला कोतेलो। तेहि ख्युइ हतिबा पोरोला फिला तोन्देलो, राङ पोमुयि आके राङ आमा राङ खो ङ्याबो होएतातेबाला ङ्याबो खेरते पोमु होएते साला पुइसोङ। 41 तेहि पोमुति लाक्पा सुङदे ख्युइ हतिला नाइसोङ, "तालिता कुमि," काङति खुँ ना, "ए च्यिटा, ङा ख्योएला नाज्याइ, ल्हँ।" 42 तेहि पोमु हतितुइना राङ लाँसोङ, राङ फाला छुला ढुवाला छेलसोङ। हति लो च्युनङियि हिना। हति तुइना राङ हति हा:लाइसोङ। 43 ख्युइ हतिबाला धि सुइयाङ हा:माको नाइरे कडा आदेश पिन्सोङ। तेहि च्यिटाकातेबाला चिगा सायापला पिन नाइरे हतिबाला नाइसोङ।