मर्कुस 6

येशुयि तोङ ङाला स्यास्यामा

30 तेहि लोब्टुतेबा येशुयि तेहा झोमसोङ, राङ हतिबे च्हि क्याइ राङ लालाबा होए, हतिबा पोरो खोला मनङि क्यापसोङ। 31 ख्युइ हतिबाला नाइसोङ, "खे राङ याङ ङा ङ्याबो च्याङ मेते साला सअ, राङ हतिया ङाल सोइ।" चिचालानाना ङिहा होङान ढोङान लेइराङ धु, राङ हतिबाला सायापयि फुरसद याङ मि धु।

32 तेहि हतिबा डुङगाला च्यामाना सुहुङ मिते साला पुइसोङ। 33 मि लेइराङयि खो ढुन ताताता थोङसोङ, राङ लेइराङयि खोला ङोस्येसोङ, तेहि पोरो भजारने काङबि राङ स्युरते जुला लेप्सोङ, राङ हतिबा पोरते ताङला क्योपसोङ। 34 जब खो नेमुला क्योपते हतितुइना ख्युइ हतिया तुम छोम्मुवा झि थोङसोङ, राङ ख्युइ हतिबाला ङिङच्येसोङ। चिचालानाना हतिबा रच्चिया मेते लुतेबा च्वरा धु। राङ ख्युइ हतिबाला लेइराङ ताम लोबाला छेलसोङ।✝6:34 गन्ति २७:१७; १ राजा २२:१७; २ इतिहास १८:१६; इजकिएल ३४:५; मत्ति 35 तेहि न कुमु होङाला छेलाराङ तेहि ख्युइ लोब्टुबा ख्युइ तेहा लेप्ते नाइसोङ, "धि च्याङ मेते सा धु, राङ ता कमु हुवाला छेलदु। 36 मितेबाला बिदा पिन, राङ हतिबे फाला छुलुइ त्योएसातेबा राङ युलतेबाला पुते रेँ चाला सायाप चिगा ङ्योयोङ।"

37 हिन्नाङ ख्युइ हतिबाला नाइसोङ, "खे राङ हतिबाला चिगा सायाप पिन।" हिन्नाङ हतिबे खोला नाइसोङ, "च्हि ङे पुते ङि क्या दिनारयि लोटा ङ्योइरे हतिबाला सायापला तेर च्ये च्हि?" 38 येशुयि हतिबाला नाइसोङ, "खेला लोटा चोम होतो? पुते तोइ।" तेहि हा:को छारते हतिबे नाइसोङ, "लोटा ङा राङ ङ्या ङि।"

39 तेहि ख्युइ मितेबाला टिरे थाङला तुम-तुम सोइरे ङोम्बो चायि त्योएयापयि आदेश पिन्सोङ। 40 हतिबा क्या-क्या राङ ङोपच्यु ङोपच्युयि तुम सोइरे त्येसोङ। 41 ख्युइ हति लोटा ङा राङ ङ्या ङि खेरते तेङला यहला ताइरे च्यिनलाब पिन्सोङ राङ हति लोटाबा च्यासोङ तेहि मितेबे धुनला पोरोङ नाइरे लोब्टुबाला पिन्सोङ, राङ हति ङ्या ङिबो याङ ख्युइ पोरोला कोइसोङ। 42 तेहि पोरोयि साइसोङ, राङ टोपा ढासोङ। 43 तेहि च्येला लोब्टुबे लोटा राङ ङ्या लुलुइबा फुगो च्युनङि तुइसोङ। 44 लोटा साङान पिजातेबा तोङ ङा धु।