1 तेहि ख्युइ हतिबाला नाइसोङ, "तेम्बारे ङ ख्योएला नाज्याइ, ङिहा लाँलाँबि नाङने रेन-रेन धु, सुइ कजसुबायि राज्यि शक्तिला लेलेबा माथोङ थु च्हिरु क्याइरे याङ कालयि टोप्ला मि ङ्योङा।"

2 हति ङिन टुयि च्येला येशुयि पत्रुस, याकुब राङ युहान्नाला खो ङ्याबो खेरते रि थो छेया झिला खेरसोङ। हति हतिबा मात्रा धु, तेहि हतिबे धुनला ख्युइ धो कुरु च्युङसोङ। 3 तेहि ख्युइ कोहिला होए भारङान राङ लेइराङ कारबो च्युङसोङ, धि थु कि पिरथिविला सुइ याङ टुइरे झोम कारबो सो मिङ्युइबा। 4 हतिया हतिबे तेहा एलिया राङ मोशा थोङसोङ, राङ हतिबा येशु ङ्याबो ताम नेन त्येतु। 5 पत्रुसयि येशुला नाइसोङ, "गुरुज्यु, ङे ङिहा होएता ल च्युङसोङ। हु ङिहा कुर सुम सुवा, च्हि ख्युइ चाला, च्हि मोशायि चाला राङ च्हि एलियायि चाला।" 6 हतिबा लेइराङ झिझिबाति चाला च्हि नायाप ना ख्युइ हा:माको सोङ।

7 तेहि मुक्पा झि लेप्ते हतिबाला कापसोङ, राङ मुक्पाने क्ये झि लेप्सोङ, "धि ङाहि करि पिजा ना, खे ख्युइ वचन ङ्योन।" ✝

8 तेहि हो:प्तामेला फाला छुला ताइरे हतिबे खोराङ ङ्याबो येशुला अर्थात स्यान सुलाङ माथोङसोङ।

9 हतिबा रिने थल्ला पुबितुइना येशुयि हतिबाला "मियि पिजा स्यिरे मालाँ थु हतिबे च्हि थोथोङा होतो हति सुलाङ माना नाइरे आदेश पिन्सोङ।"

10 हतिबे धि तामते रेँ समला पोरसोङ, हिन्नाङ स्यिस्यियाने सोम्बो च्युङदे लाँयाप नाइरे च्हिना नाइरे रेँ नाङला ताम नारे क्याइसोङ। 11 तेहि ख्युइ हतिबाला जु नाइरे टिसोङ, "ताङला एलिया होङकोइ हुन नाइरे ठिमयि शास्त्रिबा चिला नेन?"✝

12 येशुयि नाइसोङ, "तेम्बारे राङ, एलिया ताङला हुन, राङ पोरो राङ ताङलि च्वरा हुन। हिन्नाङ मियि पिजायि लेइराङ तुका ङ्योङदे मितेबाने अल होङान ना नाइरे च्हिरु क्याइरे पवित्र शास्त्रला टिधुइ? 13 तेहि ङा खेला नाज्याइ, एलिया लेब छाछारा धु, राङ ख्युइ भारेला टिटिबा च्वरा खोला च्हि सम ठे हतिबे हचु राङ क्याइसोङ।"

14 हतिबा स्यान लोब्टुबे तेहा लक्ते हुइतुइना हतिबाला तुम छोम्मुवा झिकि कोरे क्यापते पोपोरा राङ हतिबा ङ्याबो शास्त्रिबा नारे किन ताताता हतिबे थोङसोङ। 15 मियि तुम पोरोयि हतिबाला थोङि पाल्ला लेइराङ हा:लाइसोङ, राङ ख्युइ तेहा स्युरते पुते खोला नामास्ते नाइसोङ। 16 ख्युइ हतिबाला टिसोङ, "खे धिबा ङ्याबो च्हि नारेकिन?"

17 मियि तुमने चिकि खोला जवाक पिन्सोङ, "गुरुज्यु, ङाहि पोमुला ताम ना मिङ्युइङानयि ढे जि ताइदु, राङ ख्युइ तेहा ख्योख्योबा होए। 18 धि ङाहि पोमुला सुङितुइना, मोला साला ढिमिन्दु, राङ हति खाने भुवा थोन्दु झ्युकिन्दु, राङ हति सो चेरु झ्युकाला छेलदु झ्युकिन्दु, राङ हति उ तोङयाप राङ मेता सुन्दु। ङाहि ख्युइ लोब्टुबाला हति ढे थोन नाइरे स्युवा क्यापते, हिन्नाङ हतिबे धोन मा ङ्युइसोङ।"

19 तेहि ख्युइ हतिबाला जवाक पिन्सोङ, "ए हिमिछे किङानयि पालि, ङा चोम थु खे ङ्याबो हुन? खेला चोम सहि किच्याइ? हतिला ङाहि तेहा ख्याला।" 20 हतिबे हति पिजाला ख्युइ तेहा ख्योसोङ। येशुला थोङि पाल्ला हति ढेयि पिजाला फटेफटे चेरु च्युसो, राङ साला टोम्दे खाने भुवा थोनिन राङ फटेफटे चियाला छेलसोङ। 21 ख्युइ हति आकेला टिसोङ, "नामने धिला धि च्वरा च्युच्युङा ना?" ख्युइ नाइसोङ, "च्यिटा होतितुइने राङ। 22 धिला मासि लोङयापयि चाला लाम्मा लेइराङ हति ढेयि धिला मे राङ छुला याङ टिटिमा होतो। तेम्बारे ख्युइ चिगा कि ङ्युइना, ङेला ङिङच्येरे रुवा किरो कि।"

23 येशुयि खोला नाइसोङ, "‘ख्युइ ङ्युइकिन!’ नाइरे च्हि नानाइबा ना? हिछे किङानयि चाला पोरो राङ सम्भव होतो।" 24 तेहि हो:प्तामेला पिजायि आकि क्ये तोन्दे नाइसोङ, "ङा हिछे किन। ङाहि हिमिछेला ङाला रुवा कि रो कि।"

25 तेहि मियि तुम ङ्याबो स्युरते लेलेबा थोङदे येशुयि हति भाभा ढेला जु नाइरे ङारसोङ, "ए ताम ना मिङ्युइङान राङ नामज्यो मि थोइङान ढे, ङा ख्योएला आदेश तेरच्याइ, हतिने थोन्दे सअ, राङ पाङ हति नाङला नामयाङ मास्यु।" 26 तेहि क्ये तोन्दे हतिला फटेफटे चेरु च्युक्ते हति ढे थोन्सोङ, राङ हति पिजा स्यिस्यिया च्वरा च्युङोसोङ, धि थु कि लेइराङयि ता खो स्यि छारते नाइबा क्याइसोङ। 27 हिन्नाङ येशुयि हति लाक्पा सुङदे लाँसोङ, राङ हति लाँसोङ।

28 तेहि खो खिमला लक्ते पुते हतितुइना ख्युइ लोब्टुबे फाला खोला जु नाइरे टिसोङ, "ङि खोला चिचाला धोन माङ्युइबा?"

29 ख्युइ हतिबाला नाइसोङ, "धि च्वरायि मोनलामयि अर्थात स्यान च्हिरु मोनलाम क्यापयि च्युइयि याङ हति ढे धे मिङ्युइबा।"

30 तेहि हतिने थोन्दे हतिबा गालिलयि लाम्ला पुइसोङ। हति ताम सुइ यिङ हा:माको नाङानयि सम खो किन्दु, 31 चिचालानाना खो खुरि लोब्टुबाला छोइ लोबिन राङ धु। ख्युइ हतिबाला नाइसोङ, "मियि पिजा मियि लाला टोएङान ना, राङ हतिबे खोला सोएङान ना, राङ खो स्यि छारते ङिन सुमयि च्येला याङ सोम्बो च्युङदे लाँङान ना।"

32 हिन्नाङ ख्युइ नानाइबि धि ताम हतिबे हा:माकोसोङ, राङ खोला ढियापला झिसोङ।

33 हतिबा कफर्नहुमला लेप्सोङ, राङ खिमला होतितुइना येशुयि लोब्टुबाला टिसोङ, "लाम्ला खे च्हि नारे किन?"

34 हिन्नाङ हतिबा च्यामाना त्येसोङ, चिचालानाना लामला हतिबे "ङि नाङने पोरोले छेया सुना?" नाइरे खोरे नाङला नारे किन ताता होतो।✝

35 तेहि खो त्येसोङ, राङ च्युनङि गारला क्ये ताङसोङ, राङ हतिबाला नाइसोङ, सुइ मियाङ ताङला हो सोम किना, "हति पोरोले च्येसुवा राङ पोरोयि स्यापच्यि स्युङान होङकोइ हुन।" ✝ 36 तेहि च्यिटा टिमा झिला खेरते ख्युइ हतिला हतिबे उइला पोरसोङ, "राङ हतिला पाङला खेरते ख्युइ हतिबाला नाइसोङ, 37 सुइ धि च्वरा चिटातेबे नाङने च्हि ला ङाहि मिनला खाला ग्रहण किन हति ङाला ग्रहण किन, राङ सुइ ङाला ग्रहण किन हति ङाला माना, हिन्नाङ ङाला चोँङानतेला ग्रहण किन।"✝

38 युहान्नायि खोला नाइसोङ, "गुरुज्यु, मिजि कि ख्युइ मिनला ढेतेबा धोनङान ङि थोङसोङ। ङि हतिला हचु माके नाइरे-नाइरे, चिचालानाना हति हुइ च्येला होङान मि माना।" 39 हिन्नाङ येशुयि नाइसोङ, "हतिला माके माना, चिचालानाना ङाहि मिनला शक्तियि लाइ किङानयि थाल्ला राङ ङाहि विरोधला अल मिना। 40 चिचालानाना सु हुइ विरोधला मे, हति हुइ छहला होतो।✝ 41 चिचालानाना सुइ खेला ख्रिष्टयि हिना नाइरे खेला ङाहि मिनला भोटो झि छ्यु थुङदु च्युयोङ ङे, तेम्बारे ङा खेला नाज्याइ, हति च्हिरु क्याइरे याङ रेँ ख्योइमा मेता मिसुवा।" ✝

42 "सुइ ङाहि थोला हिछे किङान धि टिमाबे नाङला चिला पारछे किन, हतिचाला ता बरु लाकोर छोम्मुवा झिकि टोउ झिङबाला तारे हतिला छो छोम्मुवाला ढिमयाप ल ना।"

43 तेम्बारे ख्युइ लाक्पि ख्योएला पारछे किना हतिला तुप्ते टिम। लाक्पा ङि च्युङदे ङ्यालबायि नामयाङ मिसियापयि मेयि नाङला ढुइपु ढुडिया च्युङदे मिजेला स्युयाप ख्युइ चाला ल ना। 44 ङ्यालबाला ता न भु स्यिन, न मे राङ स्यिन। 45 ख्युइ काङबि ख्योएला पारछे किना हतिला तुप्ते टिम। काङबा ङि च्युङदे ङ्यालबाला ढिमि पु त काङबा ढुडिया च्युङदे मिजेला स्युयाप ख्युइ चाला ल ना। 46 ङ्यालबाला न भुस्यिन, न मेराङ स्यिन। 47 तेम्बारे ख्युइ मियि ख्योएला पारछे किना हतिला तोन्दे टिम। मि ङि च्युङदे ङ्यालबाला ढिमि पुत मि च्हि च्युङदे कजसुबायि राज्यला स्युयाप ख्युइ चाला ल ना।✝ 48 ङ्याबाला ता न भु स्यिन, न मे राङ स्यिन।✝

49 चिचालानाना पोरोला मेयि राङ छायि क्युरमु सुन। 50 "छा ल ना, हिन्नाङ छायि टोप्ला च्युङना हतिला चियि टोप्ला होएता सोज्याइ? खे खिरि नाङला छा पोर, राङ रेँ नाङला शान्तिला त्योए।" ✝