1 Amunya abɛ zǝ Kristi, abaŋ ndi Arik ne zhɔ ba, izhin bǝ duŋ asusun amin abɛ yi ben Yesɔ, iwaŋ ndi Arik ne duŋ abɛ yi ngɔŋ ne na ndum ne Akaba ndi ta ne tanyɛme ne wu. 2 Ne na izub ne ti kɛ Arik, ir keŋ ndi Musa ne na zub ne ndum maa ne kɔb Arik. 3 Ner waŋ ndi amɛ kɔb ata ngɔŋ anaŋ ikɔbɔ. ina yi anenen ben Yesɔ ayi ngɔŋ anaŋ Musa. 4 kɔte ikɔb takɛ aye aner anuŋ ne mee kɛ, ama Arik wa ne mee kiki bɔbɔk. 5 Musa ane yi igen nena zub ne ndum maa ne ikɔb Arik, ne bla ikiki yiŋ ndi Arik atei blai ne ti. 6 Ama Kristi ana zub ne ndum maa ne ikɔb Arik. taba tayi ikɔb kɛ mee maa ate yi ndi tate kli mgbamgbaŋ tena nek atu ne ki shur ayi mɔr.

7 Fena, ndi Izhu tsetser ne di:

<<Aliŋe, izhin te wɔ kɔr kɛ Arik,

8 Kǝr izhin bǝ kpa asusun amin ba, ir keŋ ndi atsintsim amin ne kyak wɔ lɛ kɛ Arik,

Ndi ne yi ne zizik ne mkpaŋ keŋ ndi ne tsa ru.

9 Arik adi, atsintsim amin ne tsar te na wɔb me ne akla,

Ne yik iki yiŋ ndi Mne naa ba ase sɔk nas.

10 Neme Mne te mfu ne kab ŋli yuŋɔ,

Te ndi, <<Asusun amene ne te gbagbaŋ ben abɛm,

Te na kyak zǝ ilɛ muŋ.>

11 Fe Mne te mfu te na she arim te ndi,

<Batei yir amkpa waŋ ndi ne tei nek ba te abɛ sɔŋ asik ge ba.>>>

12 Amunya abɛ zǝ Kristi, izhin bǝ te zee kǝr inuŋ ne miŋ mine abɛ yi ne susun mimin ba, te yaŋ tanyɛme te kam goŋ anǝk Arik waŋ ndi ayi tsitsir ba. 13 Nǝ yiŋɛ, kǝr nuŋ ne miŋ min abɛ duŋ zumimin lɔmu tǝ bɛ kpa susun, izhin bǝ lɔk akpa mine kɔte bɛr tayi, ndi nkanlɛ <<Iye aliŋ>> ndi ilɛ kɛ Arik iblaa ta. 14 Te ta ne biŋ bɔbɔk ben Kristi ate yi ndi tate kli mgbamgbaŋ te gar klɛtu ndi tate nek asusun amɔr ne kuti. 15 Waŋa ayi ki yiŋ ndi ilɛ kɛ Arik ne di:

<<Aliŋe, izhin te wɔ lɛ kɛ Arik,

Kǝr izhin bɛ kpa asusun amimin ba

Ir keŋ ndi atsintsim amin ne kyak zǝ lɛ kɛ Arik.>>

16 Ne yi ane ŋɔɔ ba ndi ne wɔ kɔr kɛ Arik te kyak ke? Ba bɔbɔk mǝne Musa ne Gli ba rumɔ ne Masar ka? 17 Ane ŋɔɔ ba Arik ne te mfu ben abɛba ase sɔk nas? Ba neyi abɛ na zumimin, abaŋ ndi ane azhaku aku ne zizik. 18 Ndi Arik ne kpa nyak, <<Ba atei yir amkpa awaŋ ndi Mbǝ nek ba sɔŋ sik>> alɛ ben ane ŋɔi? aye abaŋ ndi ne kyak zǝ lɛ kɛ Arik. 19 Fe ta yik, ba ne yir amkpa ma ba, te ne kyak tanyɛme.