Lucas 21

Nǝk yi wakɔ

1 Ndi Yesɔ ne lik tu te yik aner abɛ yi adudunki ne azǝn shur azɔb ne mgbo yi shur azɔb ne Akabakɔŋ. 2 Ne na yik wakɔ ne anyɛ shur anini me yaa. 3 Fe Yesɔ adi ba, <<M bla zhin lɛ didik,>> <<te ki yiŋ ndi wakɔ waŋa ne nege ne naŋ ki yiŋ ndi abɛ adudunki ne nege. 4 Bɔbɔk aneshir abaŋa nɛ nǝk ne min kɛ adudunki amen ,ama iwakɔ waŋ ne yaa maa ne nǝk bɔbɔk iki yiŋ ndi yi ma vuŋ kɛ li kili maa.>>

Ngir mkpaŋ kɛ klɛtu

5 Fe anuŋ ne min kɛ abɛ zǝ Yesɔ azǝn tɔ ir keŋ ndi ne mee Akabakɔŋ ne Mkpaŋ didik yi laŋ, ben kiki yiŋ ndi ne nek Arik ne yi. Ama Yesɔ adi, 6 <<Atei iki yiŋ ndi izhin zen tɔi ma, mkpaŋ tei nyɛ ndi ba mkpaŋ ndi tei sɔŋ nǝ nuŋ ndi ba tei varǝ ba.>>

7 Aneshire arib Yesɔ te di,<<Ine tsar,>> <<ayi atǝnta iki yiŋɛ tei na? Tǝ anii tei tsar ta ngir ndi kiki yiŋɛ tei na?>>

8 Fe Yesɔ asaga: <<Hria zhin ayi kǝr nuŋ abɛ lɔm zhin ba. Tǝ aneshir tetɛk atei nyɛ ne sak muŋ, te di zhin, <ŋgam myi wa,> te, mkpaŋa iyi gbahir.> Duŋ zǝ zhine ba ba. 9 Fena adi ba, izhin te wɔ a tei kum ben gaaŋa, duŋ te zhin sisik ba, te kiyiŋɛ itei na fe mkpaŋ kɛ klɛ tu bane zen ye ba.>>

10 Fe Yesɔ adi, <<Ntun ngɔŋ itei wɔb mgbu ben ntun ngɔŋ, fe ikɔb ŋgɔŋ itei wɔb mgbu ben kɔb ŋgɔŋ. 11 Izhaŋ gɔnmimi ngɔŋ itei yime, ijɔŋ bǝn yik iya itei na yime ne mkpǝmkpa tetɛk, a tei na kiki yi nek sisik bǝn ki ngɔngɔŋ yi rɛ shu.

12 <<Ama ndi ki yiŋɛ te tei na, atei vu zhin tei sak zhin iyah. Atei Gli zhin te nek ne akaba ben jaru, te vu zhin te gar ben atum ben angɔŋgɔŋ abɛ Gli aneshir, ne tu yi sak muŋ. 13 Waŋa tei yi zhin ankɔŋ ane bla ba lɛ didik. 14 Ama izhin bɛ kpa susun min, duŋ di zhin anii ta tei bla te ta atu amɔr shur. 15 Ai nga M tei nek zhin mgbyamgbyaŋ kɛ lɛ ben zhi lɛ ndi abɛ zor amin ba tei klɛ te gaaŋa bene bɛ zhin ba. 16 Ane tetɛɛ min atei baŋ zhin lɛb, a muŋ zumin, aner abǝ kɔ min, ben akpǝkpa min, atei vuŋ zhin te ŋlɔk anuŋ ne min mine. 17 Aneshir atei kyak zhin ne tɔ yi sak muŋ. 18 Ama fumfuk tu min zhiin ba tei tun. 19 Ne kli mgbamgbaŋ min iyi itei gli zhin gli rumɔ.

20 <<Izhin tei yik abɛ te ikum akam aku Urshelima, izhin tei zhi mkpaŋ kɛ kam ku maa ne nyɛ. 21 Abaŋ ndi ayi ne ntun yi Yahudiya, abɛ klu kɔmɔ ne atu mkpaŋ, abɛ na yi ne min ntun mɔtsɔtsɔb atei ru, abɛ yi ne ntun abɛ duŋ yir min ntun ŋgɔŋ ba. 22 Waŋa ayi mkpaŋ kɛŋ ndi atei yik iya ndi ne mǝne cɛr. 23 Iya tei yi kikin ne bǝn ben amba abɛ ane, ben abɛ so amumun ne mkpaŋ yuŋɔ, iyah ngɔŋ itei vuŋ gɔnmimi ben mfu kɛ Arik ben aneshir abaŋa. 24 A tei ŋlɔk anuŋ ne kab tena vuŋ anuŋ te kɔmɔ ne amkpa ane sak yaa ne tuntun bɔbɔk. Abɛ yaŋ zǝ Arik a tei caŋ Urshelima kɔmɔ ne Amkpaŋ kɛ klɛ tu.

25 <<Atei yik ngir ne arik, ihwa ben cinces. Nǝ gɔnmimi, aneshir abɛ tuntun atei te sisik tena wɔ igɔ ben gwu nek ngɔŋ. 26 Alulum atei ku asǝ ne sisik, ben ku azhizhi ne kiki yiŋ ndi zen nyɛ ne gɔnmimi, te ki goŋgɔŋ iyi gbarshu itei jaŋ. 27 Nǝ mkpaŋ yuŋɔ ateishe yik Izu Neshir anyɛ ne min kɛ ngungu ben mgbyamgbyaŋ bǝn ngɔŋ tetɛk. 28 Ndi kiki yiŋɛ zǝn na, lu klɛ te nab zhin atu, te ta zhin zhɔk ne ka nyɛ gbahir.>>

29 Yesɔ abla ba nkanlɛ yiŋɛ: <<Tɔ zhin tiŋ nglǝnglǝ bǝn a tiŋe kuŋkun bɔbɔk. 30 Izhin te yige atɔ amgba, izhin tei yik kiki min te zhi ikus ne te gbahir. 31 Neme ndi zhin te yik kiki yiŋɛ na me, izhin bǝ zhi nyɛ Arik ne te gbahir.

32 <<Mbla zhin lɛ didik, mkpaŋ kǝŋe ba tei klɛtu ba, se kiki yiŋɛ nena baliŋ. 33 Igbarshu bǝn gɔnmimi tei klɛtu, ilɛ muŋ ba tei klɛtu ba.>>

34 <<Zhin bǝ shur kpa, te asusun min atei kɔmɔ ne kiki yi tik ayi, amkpa ane so ki rǝrǝ ben kiki yi men yi gɔŋmimi, te bɛr yuŋɔ itei nyɛ ku zhin nyak ndi agamdi. 35 Iyi ndi atsitaŋ. Tǝ tei nyɛ ne tu abaŋ ndi akɔ sɔŋ ne ti kɛ gɔnmimi bɔbɔk 36 kɔte mkpaŋ takɛ izhin bɛ blɛ, tena ben Arik ndi zhin tei gli atu amin rumɔ ne kiki zen na yiŋɛ, te zhin bǝ kli ne tii kɛ Izu Neshir.>>

37 Kɔte bɛr tayi Yesɔ azǝn tsar ne Akabakɔŋ, fe kɔte amgbalu atawa ana te kur ne mkpaŋ yiŋ ndi azhɔi te mkpaŋ yi Zetun, 38 fe amblimblɛ bib aneshir bɔbɔk ne nyɛ bene bɔu ne Akabakɔŋ te zen wɔu.