1 Icɛr yiŋɛ ire bǝn nga Bulus, igen ayou Kristi Yesɔ ne zeu ndi Arik ne hriam te zhɔm te mbǝ na ndum kɛ du lɛ didik kɛ Arik.

2 Ilɛ didik keŋ ndi Arik ne amene kpa kɛ aŋyak ne anu akɛ ne du lɛ maa nkanlɛ maa yi tsetser. 3 Ilɛ didik kǝŋe iyi netu akɛ Izu maa, Ngɔŋ Yesɔ Kristi amɔr: Ne zi tu maa, ne ŋliu ne nga kɛ Doda; 4 ndi Arik ne yaŋ lalɛ, ne tsa ru mgbyamgbyaŋ maa kɛ Izu Arik ne lu maa Yesɔ Kristi ne bɛ. 5 Nǝ tu kɛ Kristi, Arik ne na didik maa ne nǝm mkpaŋ te duŋ mbǝ yi izhiin ne abɛ na ndum maa ne sak kɛ kristi, te mgli aneshir abɛ gɔŋmimi te vuŋ abaŋ ndi ba yi ŋli Yahudawa ba abɛ tanyɛmɛ ne lɛ kɛ Arik te na zǝ kɛ 6 Neme iyiŋɛ ne duŋ azhi izhin abɛ yi ne Roma, abaŋ ndi Arik ne zhɔzhin abɛ zǝ Yesɔ Kristi.

7 Fena nga Bulus Mcɛr zhin aner abɛ Roma abaŋ ndi Arik anyɛr zhin tena zhɔzhin te zhin bǝ yi aner amaa:

Duŋ Arik Tetɛɛ amɔr ben Ŋgɔŋ Yesɔ kristi bɛ nek zhin ita zhɔk ben sik susun.

8 Nǝ kuti, me nyɛr Arik amuŋ ize ben Yesɔ Kristi netu min bɔbɔk, te aner abɛ gɔŋmimi azǝn wɔ tanyɛmɛ min. 9 Arik ne zhi iki yiŋ ndi mblai ai lɛ didik; Arik waŋ ndi mzekuru ne susun muŋ te na du lɛ kɛ men kɛ Yesɔ Izu maa. Arik ne zhi me shuzhin zhin 10 kɔte mkpaŋ takɛ mben Arik amuŋ. Mǝ mben Arik te ndi ne miŋ kɛ kiki didik yi na maa abɛ nǝm mkpaŋ kɛ gar ben abɛ zhin. 11 Tǝm te izhɔŋ yi yik zhin, tem bla zhin kiki yi nek izhu tsetser te zhin bǝ klik. 12 Iki yiŋ ndi yi ne susun muŋ izhineba ben nga Bulus abɛ lɛk ta mkpaŋ zhin, ne tanyɛme min ben muŋ.

13 Izhin bǝ shuzhi, amunya, me lǝlɛ kɛ gar bǝn abɛ zhin mkpaŋ tetɛk, ama kiki nuŋ yar mma, ir keŋ ndi mne na bǝn abaŋ ndi ba yi ŋli Yahudawa ba. 14 Tǝ ihru kɛ abɛ yi Mgbemgbeb bǝn abaŋ ndi ayi abliblik, ben abɛ zhi ki bǝn abɛ yaŋ zhi ki 15 Ne me, Mǝ yaŋ susun kɛ du ilɛ kɛ men ben zhineba ndi zhin yi ne Roma.

16 Mǝ yi ne mgbyamgbyaŋ kɛ du lɛ kɛ Arik; ayi mgbyamgbyaŋ kɛ Arik ben abaŋ ndi ne tanyɛme, ne kuti Yahudawa fe ben abaŋ ndi ba yi ŋli kɛ Yahudawa ba. 17 Fe ilɛ kɛ men kǝŋe tsar aneshir ankɔŋ ane tɔ shak ayi ne ti kɛ Arik: ai ankɔŋɔ ane tanyɛme ibaŋ rɛ kuti te gar klɛtu. Ir keŋ ndi lɛ kɛ Arik ne di <<Iner ne tsǝn anenen ben Arik ne tanyɛme atei lieru.>>

18 Mfu kɛ Arik ne rurɛ shu, te zhaku ne atu aneshir abɛ lalɛ ben zumimin te atsi lɛ didik kɛ Arik aku ne zumimin men. 19 Ndi iyeme Arik asak ba iyah, te neka zhi ilɛ kɛ Arik ire kukub, Arik ne tu maa ne bla ba. 20 Nak men rǝ mkpaŋ keŋ ndi Arik ne na gɔŋmimi, kiki yi na maa ne naŋ zhi, a yik Arik bɔbɔk ne kiki yi na maa ne me aneshir abɛ na kiki iyiŋɛ ba tei lieru ba! 21 Ne zhi Arik, ama ba nǝgu ŋgɔŋ maa ba, ba na nye ru ba. Ndi amɛ, izhu yi asusun mǝne ayi isha, asusun amene akɔkur sha zumimin ne shak asusun. 22 Ne me atsar te aba yi abɛ zhi, ama ayi kpukpur; 23 Ndi ai bɛ zǝ Arik waŋ ndi ba ku te abɔ ba, akyak te kama zǝ kiki yi na aneshir ben aŋliŋlɔ, inarum ye abɛm, bǝn inarum yi gbur ne mimi.

24 Fe Arik ne duŋ abɛ na kiki yi te bubu ne asusun amen, te na kiki yi shisha ne akpa men. 25 Ne sen lɛ didik kɛ Arik netu ayi timu; te kama zekur iki yiŋ ndi Arik ne nai te duŋ waŋ ndi ne na gɔŋmimi me, iwa nɛrɛ te abɛ zikuru mla ne klɛ tu! Bǝ yi amɛ.

26 Ama nena ki yiŋɛ, Arik ne duŋ ba nena kiki shisha men. Tǝ vuŋ mbǝmba men ne duŋ kur ben alulum amen te kama kur ne akpa men. 27 Ne ankɔŋ azhiin awaŋa alulum ne duŋɔ ankɔŋ ane kur ben amba te kam akur ne akpa men. Alulum nena ki yi shisha ne akpa men ki yi na mǝne ne duŋ asak ba iyah ne ki yiŋ ndi ne nai.

28 Ndi aneshire abaŋa ne kyak tanyɛme ne lɛ kɛ Arik ne asusun amen, Arik ne nek ba susun kɛ na ki mimin, te abɛ na ki yiŋ ndi ba ne rɛ abɛ nai ba. 29 Asusun amene ne shaga ne kiki mimin, zumimin, ite bubu, ina ki mimin, iruk abɛm, iŋlɔk aneshir, ite antam, ishɔk mgbu, ilɔm aner. Te ter 30 te lɛ kiki mimin ne akpa men; ba ne tanyɛme bǝn Arik ba, abɛ na zumimin, abɛ klik atu, abɛ tei atetɛ men mla; 31 abaŋ ndi bane zhi ki ba; ba zǝ lɛ bla men ba, ba na ki didik bǝn lɔ susun yi anuŋ ba. 32 Ne zhi te lɛ kɛ Arik ne di anere abaŋ ndi ana kiki yiŋɛ ne mla te abɛ ku. Neme bane nai ankyak ba ayi ne miŋ kɛ nai ma, ama azǝn bla te di anuŋ anai.