1 Ke mme usen edem, Abasi amaatañ ikọ anọ mme ete ñnyịn ato inua mme prọfed ke uwak-uwak ini ye ke nsio-nsio usʌñ, 2 ado ke mme akpatre usen ami anye a-atañ ikọ inọ ñnyịn ato Ayịn amọ, a-anye amaakemek adiaakpa afịd ñkpọ, a-adooho ekenam ekondo eto ke anye. 3 Ayịn ado uyama ubọọñ Abasi ye ataa mbid idem amọ a-amʌmmọ afịd ñkpọ akama ke adudu ikọ amọ. Ke anye amaakenam awo asana ke adiyet idiọọkñkpọ nsio, anye amaasuuk atie ke ubọk nnasia Andikara ke hefịn. 4 Ndin anye amaakappa akoñ akan mme enyere sia anyịñ a-anye abọọhọ akoñ akan ake ammọ.

5 Sia akee ke atu mme enyere ke akenam Abasi abo,

"Afo ado Ayịn mmi;

mfịn ami mmekappa ubon fiin"?

Me adibo,

"Ami ñyaado Ete amọ,

ndin anye ayaado Ayịn mmi"?

6 Ndin ñko, ke ini Abasi abenne akpa ayịn amọ adi ederimbod, anye ate,

"Yak afịd mme enyere Abasi ekpono anye."

7 Ke aditañ ikọ mbaña mme enyere anye ate,

"Anye anam mme enyere amọ edo sịbidịd,

anyʌñ anam mbon utom amọ edo mme edeme ikañ."

8 Ado ke abaña Ayịn anye abo,

"Ebekpo mfo, O Abasi, ayaaba ke nsi-nsi, nsi-nsi;

esañ unen adiido esañ abioubọọñ mfo.

9 Afo amema adinenido, anyʌñ asua ukwañ ido;

ke ntoro Abasi, Abasi mfo, u-udịppe fiin abọhọ mme

nsaña mfo ke aduyet fiin adan inemesịd."

10 Anye amaana abo,

"Ke aditọọñọ, O Abọọñ, afo akesịn itiad idakisọñ ederimbod,

mme hefịn edoñño utom ubọk mfo.

11 Ammọ eyaetak, ado afo asʌk abaaba;

ammọ eyaetaha nte afọñ.

12 Afo ayaafʌt ammọ nte afọñ;

eyaekpʌhọ ammọ nte afọñ.

Ado afo asʌk aba ukem-ukem

ndin mme isua mfo, tutu amama, idiinieghe utịd."

13 Akenaanam akee ke atu mme enyere ke Abasi abo,

"Tie ke ubọk nnasia mmi,

tutu ami nnam mme asua

mfo ekappa edo ifịm udodukod mfo"?

14 Nte mme enyere Abasi idooho mme sịbidịd nsaña utom e-esioho edọñ adinam ñkpọ nnọọ mbon e-ediibọ adinyaaña?