1 Akpan ñkpọ a-ñnyịn itañña ibaña ado ami: Ñnyịn iminie utọ ekamba aku ado, a-akesuuhọ atie ke ubọk nnasia ebekpo Ubọọñ Andikara ke hefịn, 2 anyʌññọ anam utom ke adisana itie, atayad akpanikọ A-Abọọñ ke idem amọ akenịmme, idooho ñkaña awo.

3 Emek afịd akwa aku adinọ mme enọ ñnyʌñ ñwaa mme uwa. Ke ntoro akena anye ami ñko anyʌñ anie ñkpọ adinọ. 4 Adieke anye akpekebaaha ke ederimbod, anye ikpikidooho aku, sia mme aku ebaba e-enọọhọ mme enọ naña mbed atemme. 5 Ammọ enam utom ke adisana itie ukpono a-abitte anyʌñ ado ndukpọñ mme ñkpọ se iba ke hefịn. Ami ado ntak e-ekedʌttọ Moses utọñ idaha a-anye akebeeñeke idem adibọp atayad: "Kịt bo ke amenam afịd ñkpọ aba ukem-ukem nte se ekuwọt fiin ke anyọñ ekamba abod." 6 Ado ke akpanikọ ubiọñutom a-Yisọs abọọhọ a-akpon akan ake ammọ, kpa naña edioomo a-anye adooho atie ubiọñ akoñño akan akaan edioomo, sia ufa edioomo akọñọ ke mme enwọñọ e-efọnnọ ekan.

7 Sia adieke akpedooho akpa edioomo ado ikinieghe ndo; awo ikpikiyemme edioomo mfen. 8 Ado Abasi amaasua anọ mme awo amaanyʌñ abo:

"Mme usen esʌk edi, Abọọñ atañ,

a-ami ndiinam

ufa edioomo ye mbon Isrel,

ye mbon Yuda ñko.

9 Anyem idiibaaha nte

edioomo a-ami ñkenamma ye mme eteete

ammọ ke ini ami ñkemʌmmọ ammọ

ke ubọk ñwuọ ñkpọñ isọñ Iyib,

sia ammọ ikisọọñọke ida ke ewʌhọ mmi,

ndin ami mmaawọññọ ñkpọñ ammọ,

Abọọñ atañ.

10 Anye ami ado edioomo a-ami ndiinam ye mbon Isrel

ini ado amaaboiyo, Abọọñ atañ.

Ami ñyaasịn mme mbed mmi ke akikere ammọ,

ñnyʌñ ñwet ke esịd ammọ.

Ami ñyaado Abasi ammọ

ammọ eyaenyʌñ edo ikọd mmi.

11 Ammọ idiikpeebe mbọhọidʌñ ammọ aba,

me emọ-emọ ibo, ‘Diọọñọ Abọọñ,’

sia afịd ammọ eyaendiọọñọ miin,

tọọñọ ke andisịb ñkan tutu akewuọ andikpon ñkan.

12 Sia ami ñyaafeen mme ibak ammọ,

ndiinyʌññọ ntoiyo mme ndiọiñkpọ ammọ aba."

13 Ke anye adikoot akaaña ami "ufa," anye a-anam akpa akappa ado akaan, ndin se imaikikaana inyʌñ isọñ ayaasọp aboiyo afep.