1 Ndin akpa akaaña amaanie mme mbed ukpono anyʌñ anie adisana itie ukpono amọ ke isọñ. 2 Emaebọp atayad; ndin ke esịd akpa ubeed emaedaaha ñkpọ udod utuenikañ, akpokoro ye adisana uyo. Ekekoot itie ado, Adisana Itie. 3 Ke edem ayọhọ afọñ ikpeghe iba amaaba ubeed e-ekekoodo Ataa Adisana Itie, 4 e-ekenịmme itie uwa a-kold ukama mfọp insensi ye akebe edioomo e-ekedatta kold efʌk. Atu kold mmana, esañ Erọn a-aketịppeke emịne, ye mme itiad ñwed edioomo ekedọñọ ke akebe ado. 5 Mme serubim Ubọọñ Abasi ekedoro ke anyọñ akebe ado enyʌñ efʌk ufʌkñkpọ adifeen usio isob, ado ñnyịn idiikanna itañ ibaña afịd ñkpọ ado idahami.

6 Ke emaekebono afịd ñkpọ ema, mme aku ekesidʌk akpa ubeed ndin-ndin enam utom ammọ. 7 Ado ekamba aku ikpọọñ akesidʌk esịd ubeed, ndin akesinam ntom akañ keed kpọd ke isua. Anye ikpikikanna inam ami ibọhọke anye asaña ye iyiib, a-anye akesinọọhọ ke iwuod amọ, anyʌñ anọ ke ntak nnamndue a-mme awo ekesinamma ke unana adidiọọñọ. 8 Ke adinam ntom ke Adisana Sịbidịd akeben awọt abo ke awo ikiyaarake usʌñ adisaña ndʌk Nsana Mma Adisana Itie adaña nte akpa atayad akesʌkkọ ababa. 9 Ami ado uwọdñkpọ e-enọọhọ idahami adiwọt ke mme enọ ye mme uwa e-ekesiwaaha ikikanna iyet esịd mme andikpono Abasi. 10 Mme ñkpọ ami ebaña ndidia ye ukọd ye mme nsio-nsio ndutʌm adinam asana ke anwa, e-edooho mme ndutʌm e-ekesinamma, e-enyʌññọ eyaak aba tutu ini ufa ubonoñkpọ adikem.

11 Ado ke ini Krais amaakedi nte akwa aku nti ñkpọ e-ebaahaba mi, anye amaaboiyo ke atayad a-akponno akan, anana ndo, idooho ubọkawo anam, a-awuọñọke ke idooho ñkpọ e-ekebottobot. 12 Anye ikiboiyoke idʌk ato ke iyiib ebod me ake abaakenañ; ado akekama iyiib amọ adʌk ke Nsana Mma Adisana Itie ini keed kpọd, anyʌñ abọ nsi-nsi ufak anọ afịd awo. 13 Iyiib ebod ye ñyaara enañ ye ntọñ abaak uman enañ e-ekesidatta esiime mbon i-imiisanake, amaanam ammọ esana ke ikpọkidem. 14 Die ndin ke iyiib Krais, a-akedooho ke ntak Sịbidịd nsi-nsi ke akeyaak idem amọ nte anana ndo adisana uwa anọ Abasi, imiidiiyette esịd ñnyịn isịññe mme adinam a-adatta aka ñkpa ifep, nọ ñnyịn ikan ikpono aduuwem Abasi!

15 Ke ntak ami, Krais ado akpe emem ke ufa edioomo nọ ato do mbon e-ekoodo ebọ nsi-nsi udeeme e-emaekenwọñọ, a-anye akpaaha nte andifak ammọ nsio ke mme ndiọiñkpọ e-ekenamma ke idak akpa edioomo.

16 Ke ñkpọ se ibaña ñwed edioomo adiaakpa, ana ewọt idiọọñọ ke andikinam ñwed ado ibaaha aba ke uwem, 17 sia esiben ñwed edioomo adiaakpa esịn ke adinam ke ini andikinam amaakekpa. Awo ikemeke adidat ñwed ado nsịn ke adinam ke ini andikiwed asʌkkọ ababa ke uwem. 18 Ami ado ntak a-awo i-imiikikamake akpa edioomo inam ñkpọ ndomokeed ibọhọke eduọk iyiib. 19 Ke ini Moses amaakekoot afịd ewʌhọ e-esịneke ke mbed anọ afịd awo, anye amaadat iyiib abaak enañ ye ake ebod, aben mmọọñ, ndad-ndad idededọñ ye ñkọk hisọb, asiime ke ñwed mbed ye afịd awo. 20 Anye amaabo, "Ami ado iyiib edioomo A-Abasi iwuuhọ ndufo abo enịm." 21 Ke ukem usʌñ ado, anye amaasiime iyiib ado ke atayad ye afịd ñkpọ e-ekesikamake enam usọrọ. 22 Ke adinekke ntañ, mbed ayem naña ekpedat iyiib enam afịd ñkpọ asana, ndin mfeennọ ndomokeed ibaaha ke iyiib imiiduọkkọke.

23 Awuọ akena edat mme uwa ami enam mme mbid ñkpọ e-ebaññake ke hefịn esaana, ado akena ekama uwa a-afọnnọ akan enam ataa mme ñkpọ e-ebaññake ke hefịn esaana. 24 Sia Krais ikidʌkkọ itie ukpono e-ekedatta ubọk awo enam a-akedooho mbid ataa itie ado; anye akedʌk hefịn ke idem amọ, nọ ato do anye awuọ ada inọ ñnyịn ke iso Abasi. 25 Anye ikinyʌññọ idʌk hefịn adiwa idem amọ mmaana ñwaa, naña ekamba aku akesidʌk Nsana Mma Adisana Itie kwa isua ye iyiib i-imiikidooho ake amọ. 26 Akpedooho ntoro, awuọ Krais akpekena abọ ufen uwak-uwak ini tọọñọ ke ini e-ekebotto ederimbod. Ado idahami anye amaadi ini keed kpọd anọ afịd awo ke mme utịd ini ami adiben idiọọkñkpọ mfep ke anye adiwa idem amọ. 27 Kpa naña ana nte awo akpa akañ keed kpọd ndin amaama anye ada ikpe, 28 kpa ntoro ke ekewaa Krais inikeed kpọd nọ aben ndiọiñkpọ uwak awo afep. Ndin anye ayaamaana adi ayọhọ akañ iba, idooho adidibiom idiọọkñkpọ, ado adididat adinyaaña nsọk mbon e-etieghe ebet anye.