1 Ke ntoro, sia enwọñọ adidʌk ke nduọkadudu amọ asʌkkọ ababa, yak ñnyịn ikpeme mbaak ndufo ndomokeed aditre adidʌk ke esịd. 2 Sia emaekwọrọ eti etob inọ ñnyịn ñko, kpa naña ekekwọrọ enọ ammọ; ado etob a-ammọ ekekoppo ikiwuọñọke ñkpọ inọ ammọ, sia ammọ ikiwuanake ke mbuọdidem mbon e-ekesuuhọ iwuod. 3 Idahami ñnyịn i-imaikinịm ke akpanikọ imidʌk ke nduọkadudu, ukem naña Abasi amaaketatañ:

"Ndin ke iyadesịd mmi ami mmaanwọñọ,

‘Ammọ idiidʌkkọ ke nduọkadudu mmi.’ "

Ado utom amọ amaakweeñe tọọñọ ke ini e-ekebotto ederimbod. 4 Sia a-aba itie a-atañña abaña ayọhọ usen itiaba ke mme ikọ ami: "Ndin ke ayọhọ usen itiaba Abasi amaaduọk adudu ke afịd utom amọ." 5 Ñko, ke se ñnyịn imaikikokoot anye a-atatañ abo: "Tutu amama ammọ idiidʌkkọ ke nduọkadudu mmi."

6 Ke ntoro sia adooho usʌk awo idʌkkọ kaña ke nduọkadudu ado, ndin sia mbon e-eketooho ekwọrọ eti etob enọ ikidʌkkọ ke esịd, ato ke ntịdutọñ, 7 Abasi amaamaana asio usen anịm, akoot "Mfịn," a-adooho ke anyan ini anye amaatañ ikọ ato inua Defid, kpa naña ewet ke itie ñwed e-emaekekokoot:

"Mfịn ami, adieke ndufo ekoppo uyio amọ,

ikiisọñ esịd ndufo."

8 Sia akpedo Yọsua amaanọ ammọ nduọkadudu, Abasi ikpikimaanake itañ ibaña usen mfen. 9 Ke ntoro, Sabad nduọkadudu a-asʌhọ anọ mbon Abasi; 10 sia awo akeedodo a-adʌkkọ ke nduọkadudu Abasi a-aduọk adudu ke utom ammọ, kpa naña Abasi akeduọk adudu ke utom amọ. 11 Ke ntoro, yak ñnyịn idomo afịd ukeme adidʌk ke nduọkadudu ado, mbaak awo ndomokeed adiduọ ke adikeene uwọdñkpọ unana ñkobitem ammọ.

12 Sia ikọ Abasi anie uwem anyʌñ anie adudu, asọp akan akankañ a-anieghe inua iba, anie adudu adiboiyo ndʌk esịd, tutu abakka ukpọñ ye sịbidịd, ñkikek idem ye ñkpadia akpọ. Anye akpe ikpe a-abañake akikere esịd ye edu unam ñkpọ ke esịd. 13 Ibaaha ñkpọ ndomokeed ke afịd se ekebot a-adịbeke ke anyen Abasi. E-efʌkkọ afịd ñkpọ enịm inwañ ke iso anye a-ñnyịn inieghe adinam ibad nnọọ.

14 Ndin, sia ñnyịn imainie Yisọs, Ayịn Abasi adooho ekamba aku a-amaakesaña aboiyo ke mme hefịn, yak ñnyịn itʌm imʌm akpanikọ ikama ke abaña mbuọdidem a-ñnyịn isọọñọke itañ ibaña. 15 Sia ñnyịn inieghe ekamba aku i-imiinieghe esịd mbọm ibaña mmemidem ñnyịn, ado inie anye a-adooho emaedomo anye ke afịd usʌñ naña enyʌñ idomo ñnyịn, ado anye ikinamma idiọọkñkpọ. 16 Yak ñnyịn ndin isaña uko-uko ikpere ebekpo mfọn Abasi, nọ ato do ñnyịn ibọ mbọm ye mfọn a-adiinyaaña ñnyịn ke ini nnananyen.