1 Mbed ado ndukpọñ kpọd anọ mme nti ñkpọ se idi ke iso, idooho ataa mme ñkpọ ado ke idem ammọ. Ke ntak ami, ukem uwa e-ewaaha ke isua ke isua ikanna iyet mbon e-esañake ekpere adikpono Abasi nọ afọn ama. 2 Ekpekekanna, nte awo ikpikitreke adiwa ammọ? Sia ekpaekenam mme andikpono Abasi esana akañ keed kpọd, esịd ammọ ikpibiommo ammọ ikpe ibaña ndiọiñkpọ ammọ aba. 3 Ado mme uwa ado ekappa edo ñkpọ adidat ntoiyo ukwañ ñkpọ ke isua ke isua. 4 Iyiib ñyaara enañ ye ebod ikemekekeme adiyet mme idiọọkñkpọ mfep.

5 Ke ntak ami, Krais amaakedi ke ederimbod, anye amaabo:

"Uwa ye enọ, afo ukuyemme,

ado afo amaatʌm itie ikpọkidem annọ miin;

6 esịd ikunemme fiin ibaña ufọfọb

uwa ye mme enọ uben mme ndiọiñkpọ mfep.

7 Ndin ami mmaabo, ‘Se ami mi, e-ewet ke ikpañwed embaña miin.’

Ami mmedi adinam uduak mfo, O Abasi mmi."

8 Ke akpa ifed anye amaabo, "Afo ukuuyemme mme uwa ye mme enọ ye ufọfọb uwa ye mme enọ uben ndiọiñkpọ mfep, ammọ ikinyʌññọ unem fiin esịd" (akpesʌkado a-mbed akeyemme enam mme ñkpọ ado). 9 Ndin anye amaabo, "Se ami mi, ami mmedi adinam uduak mfo." Ndin anye a-aben akpa uwa afep nọ ayọhọ iba asọọñọ ada. 10 Ato ke ntak uduak ado, e-enam ñnyịn isana ato ke adiwa ikpọkidem Yisọs Krais akañ keed kpọd.

11 Ke usen ke usen, aku keedekeed e-esida enam utom Abasi ammọ; enam emaana enam, ewa mme ukem uwa, a-adooho ikemekekeme iben mme ndiọiñkpọ mfep. 12 Ado ke Krais amaakewa uwa keed ke abaña mme ndiọiñkpọ, uwa a-akedooho nsi-nsi uwa, anye amaasuuk atie ke ubọk nnasia Abasi. 13 Tọọñọ ke ini ado anye asʌk abet tutu enam mme asua amọ ekappa edoñño ifịm udodukod amọ. 14 Sia amaato ke uwa keed anye anam mbon e-eyette esana efọn ema ke nsi-nsi.

15 Adisana Sịbidịd anyʌñ atie ntiense inọ ñnyịn abaña akpa edioomo. Ke akpa ifed anye ate:

16 "Ami ado edioomo se ami ndiinam ye ammọ

ke ini ado amaaboiyo, Abọọñ atañ.

Ami ñyaasịn mme mbed mmi ke esịd ammọ,

ñyaanyʌñ ñwet ke akikere ammọ."

17 Ndin anye adian do:

"Ami ndiitoiyoke ndiọiñkpọ ye mme ubiad mbed ammọ aba."

18 Ndin emaefeen afịd mme ñkpọ ami, ufọn uwa idiọọkñkpọ ibaaha aba.

19 Ke ntoro nditọeka ke Krais, sia ñnyịn imainie nsọọñọnda adidʌk ke Nsana Mma Adisana Itie ato ke iyiib Yisọs, 20 ato ke ufa usʌñ uwem e-ekʌkkọke eboiyo ke afọñ anyenusʌñ inọọ ñnyịn a-adooho abʌkidem amọ, 21 ndin sia ñnyịn iminie akwa aku a-akamake ufọk Abasi, 22 yak ñnyịn isaña ikpere Abasi ye esịd akpanikọ ke ayọhọ mbuọdidem, sia emaekekama mmọọñ a-asanake esiime ke esịd ñnyịn, enam ñnyịn isana inana ubiomikpe ke akikere ñnyịn, ñko sia emaekeyet ñnyịn idem nọ isana. 23 Yak ñnyịn isọñ ubọk imʌm idodanyen a-ñnyịn itañña anwa-anwa ibaña ikama, ikiidunyeeñe, sia anye a-akenamma enwọñọ ye ñnyịn ado anam akpanikọ. 24 Ñko, yak ñnyịn ikere naña ikpikan isọọñọ keed aken idem ke adiwọt ima ñnyʌñ nnam nti ñkpọ. 25 Yak ñnyịn ikiisịññe idem ikpọñ adisiboho itie keed, nte usʌk awo esinamma, ado yak isọọñọ idem, akpan-akpan nte ndufo ekịtte ke usen asʌk akpere.

26 Adieke ñnyịn ikoiyokoi ikaiso adinam idiọọkñkpọ ke imaikibọ ifiọk akpanikọ, uwa idiọọkñkpọ ibaaha aba, 27 ibọhọke adibeeñe idem ye ndịk mbet ubiideikpe ye ikañ iyadesịd a-adiita mme asua Abasi. 28 Awo ndomokeed a-akesịnne mbed Moses amaakpa ke unana mbọm ke emaekekop ito inua ntiense iba me ita. 29 Die ndin ke afo akere ke a-adot adikpimia awo a-asọnnọke Ayịn Abasi ke ukod ufen, awo a-adatta iyiib edioomo a-akenamma anye asana nte ndedeghe ñkpọ, a-anyʌññọ asọñ Sịbidịd mfọn anyen? 30 Sia ñnyịn imidiọọñọ andikibo: "Usiene annie miin: Ami ñyaasio usiene," mfen ñko, "Abọọñ ayaakpe ikpe ikọd amọ." 31 Ado ataa ekamba ñkpọ ndịk adiduọ ndʌk ke ubọk ndu-ndu Abasi.

32 Itoiyo akpa ini a-ndufo ekebọọhọ unwana, ini a-ndufo ekefiighe eda ke akpọsọñ ukuud. 33 Usʌk ini emaesinam ndufo ebọ usọñanyen ye ndutʌhọ anwa-anwa. Ke mme ini mfen ndufo emaeda keed ye mbon e-ekebọọhọ mme ukuud ami. 34 Ndufo emaekop mbọm enyʌñ ebọ ufen ye mbon e-esịneke ke ufọk ñkpakọb, ñko ke ini e-ekesikoonoke mme inie ndufo, ekesibọ ke inemesịd, sia emaediọọñọ ke ndufo emaenie mme inie e-efọọnọ ekan, e-ediinyʌñ ikpeene ke nsi-nsi. 35 Ke ntoro, ikiitop nsọọñọnda ndufo iduọọk, sia ndufo eyaebọ utịb ekamba-ekamba.

36 Ana ndufo esọọñọ eda esịn idem nọ ato do ke ini emaenam uduak Abasi, ndufo ebọ se anye akenwọñọ. 37 Sia,

"Ke ataa etək-etək ini,

anye a-anaaha adi

ayaadi, idiikpeeneke."

38 Ñko,

"Ado adinen awo mmi adiidu uwem ke mbuọdidem.

Ndin ami ñkoppo inemesịd ye anye a-atịmmeke edem."

39 Ñnyịn isịneke ke atu mbon e-etịmmeke edem enyʌñ ebọ nsobo, ado isịne ke atu mbon e-enieghe mbuọdidem enyʌñ ebọ adinyaaña.