1 Mbuọdidem ado nsọọñọnda ke se ñnyịn idot anyen ibaña, inyʌññọ inie eyighe ibaña se ñnyịn imiikịtte ke anyen. 2 Ami ado se eketooro mme ñkpisọñ esed ebaña.

3 Mbuọdidem anam inwaña ñnyịn ke ekebot ederimbod ato ewʌhọ Abasi; ke ntoro awo ikibotto mme ñkpọ se ñnyịn ikịt ito mme ñkpọ se ekekịt ke anyen.

4 Ke mbuọdidem Ebeel amaanọ Abasi uwa a-akefọnnọ akan ake Keen. Ke mbuọdidem emaetooro anye nte adisana awo, ke ini Abasi amaaketañ eti ikọ abaña mme enọ amọ. Ñko, ato ke mbuọdidem ke Ebeel aka iso atañ ikọ akpesʌkado a-anye amaakekpa.

5 Ke mbuọdidem emaeben Inọk esio ekpọñ uwem ami, ke ntoro anye ikikpaaha ñkpa. "Awo ikikịtte anye, sia Abasi amaaben anye asio." Sia mbemiso ekeben anye esio, emaesọọñọ etooro anye nte awo a-akenemme Abasi esịd. 6 Ñko, awo i-imiinieghe mbuọdidem ikemekekeme adinem Abasi esịd, sia awo ndomokeed a-adiighe abịne anye ana anịm ke akpanikọ ke anye mmọdo, ñko ke anye ado andinọ mbon e-eyemme anye ke afịd esịd utịb.

7 Ke mbuọdidem, Nua, ke ini emaekewuuk anye ebaña mme ñkpọ a-anye imiikikịtte ke anyen, ke adisana mbaak, anye amaabọp ubom a-akenyaañake ufọk amọ. Ke mbuọdidem anye amaabiom ederimbod ikpe, amaanyʌñ akappa ado adiaakpa adinenido asañake ye mbuọdidem.

8 Ke mbuọdidem Ebraham, ke ini ekekoodo anye ebo aka itie a-anye adiikappa idat inie nte udeeme amọ, amaakop item anyʌñ akaa, akpesʌkado a-anye imiikidiọọñọke nte aka. 9 Ke mbuọdidem anye amaabọp ufọk ke isọñ enwọñọ nte asenawo ke asen idịd; anye akedʌñ ke atayad nana Aisik mme Yekọb ekedʌñ, e-ekedooho mme akpa adiaakpa ye anye ke ukem enwọñọ ado. 10 Sia anye akesʌk abek anyen anọ abio a-anieghe mme itiad idakisọñ, a-andikidomo ñnyʌñ mbọp adooho Abasi. 11 Akpesʌkado ini uman ayịn amaakeboiyo Sera, anye amaanie ukeme adiman nditọ sia anye amaadiọọñọ ke andikinam enwọñọ ado anam akpanikọ. 12 Ke ntoro amaato ke awo keed, a-aketieghe nte awo ñkpa, mme nditọ-nditọ emaemana e-ekewakka nte ntantaafiọñ ke ikpaanyọñ enyʌñ enana ibad nte ntan ke mben akpa mmọọñ.

13 Afịd ibon ami ekesʌk edu uwem ke mbuọdidem tutu ini a-ammọ ekekpaññake. Ammọ ikibọọhọ mme ñkpọ se ekenwọñọ, ado ekedaada ekịt mme ñkpọ ado ke anyan usʌñ, enyʌñ enyịmme ammọ. Ammọ emaenyʌñ enyịmme ke mmimọ idoñño mme adọdʌñ ye isenawo ke ederimbod. 14 Mbon e-etañña mme ñkpọ ntom e-ewọt ebo ke mmimọ isʌk iyeem abio a-adooho ake mmimọ. 15 Adieke ammọ ekpekekereke ebaña abio a-ammọ ekedakkake ekpọñ, ammọ ekpaekenie ufañ aditịmme ñkaa. 16 Utu ke ado, ammọ ekesʌk enie udọñ ebaña abio a-afọnnọ akan, a-abaaha ke hefịn. Ke ntoro, abuud inamma Abasi adikere Abasi ammọ, sia anye a-anam itie idʌñ anịm anọ ammọ.

17 Ke mbuọdidem Ebraham, ke ini Abasi akedomoke anye, amaayaak Aisik anọ nte ñkpọ uwa. Anye a-amaakebọ mme enwọñọ amaabeeñe idem adiwa ukweeñe ayịn amọ, 18 akpesʌkado A-Abasi amaakebo anye, "Adiito ke Aisik ke ubon mfo adiisakka." 19 Ebraham amaadiọọñọ ke Abasi akeme adinam akpañkpa aset, ndin ke aditañ ke usʌñ mfen nte uwọdñkpọ, anye amaamaana abọ Aisik ye uwem asio ke ñkpa.

20 Ke mbuọdidem, Aisik amaadiọñ Yekọb ye Isọ ke abaña ini iso ammọ.

21 Ke mbuọdidem Yekọb, ke ini a-ñkpa ammọ akekeme, amaadiọñ nditọ Yosef keedekeed anyʌñ abere ke iwuod esañ amọ anọ Abasi ukpono.

22 Ke mbuọdidem Yosef ke ini amọ amaakekpere, amaatañ ikọ abaña nditọ Isrel adiwuọ ke ufʌn ñkpọñ Iyib, anyʌñ anọ uyio abaña naña ediibuuk akpọ amọ.

23 Ke mbuọdidem, ete ye eka Moses emaedịp anye afiọñ ita ke anye amaakemana, sia ammọ emaekịt ke anye ikidooho ñkaña nsekayịn, ammọ ikinyʌññọ ibaak ewʌhọ adidem.

24 Ke mbuọdidem, Moses, ke anye amaakekpon amaasịn adikere ayịn adiaha Fero. 25 Anye amaamek adikeene ubon Abasi mbọọ ufen utu ke adikop inem ke idiọọkñkpọ. 26 Anye akedat adibọ asuenne ke ntak Krais nte ñkpọ a-asọññọ udua akan mme nsọñudua inie isọñ Iyib, sia anye akewuuk anyen ase se idiido ñkpọ ayịnutom amọ ke ini iso. 27 Ke mbuọdidem, anye amaakpọñ Iyib, ikereke ibaña ifiobesịd adidem. Anye amaasịn ifịk, sia anye akesak iso ase anye a-awo imiikịtte ke anyen. 28 Ke mbuọdidem anye amaanịm Usọrọ Nsaña Mboiyo ye adisiime iyiib, nọ ato do andikiwoot akpa nditọ ideen adituuk akpa nditọ ideen Isrel.

29 Ke mbuọdidem mme awo emaesaña eboiyo ke ufọọd Ndad-Ndad Akpainyañ nte esaña ke nsaad isọñ, ado ke ini mbon Iyib ekedomoke adikeene nnam ntoro, ammọ emaedeñ.

30 Ke mbuọdidem mme ndibene Yeriko emaeduọññọ, ke ubon Abasi emaekesaña ke udịm ekanna usen itiaba.

31 Ke mbuọdidem, Rehab, awonwaan akpara, sia anye amaakefọn ido ye mbon uyeb, awo ikiwotto anye idian ye mbon i-imiikikoppo item.

32 Nsoo mfen ke ami ndiitañ? Ufañ ibaaha ami aditañ mbaña Kidiọn, Barak, Samsịn, Yefta, Defid, Samwel ye mme prọfed, 33 a-aketooho ke mbuọdidem ammọ enwana ekan mme abioubọọñ, ekpe unen ikpe enyʌñ ebọ se emaekenwọñọ; mbon e-ekekʌppọ mme ekpe inua, 34 eniime ifiobesịd mme edemeikañ; enyʌñ ebọkkọ akañkañ; mbon e-ekenamma mmemidem ammọ akappa adudu; e-ekekappake edoñño mme akop adudu ke ekọñ, enyʌñ esuan mme udịmekọñ mme asen idịd. 35 Ibaan emaemaana ebọi mbon ammọ e-emaekekpa esịn ke uwem. Mbon mfen emaaeba e-eketọtʌkkọke enyʌñ esịn adibọ ñkpọkñyak, nọ ato do ammọ enie adised ke ñkpa a-afọnnọ akan. 36 Usʌk ekebọ nsaha ye umia, ke ini ekebọppọ mbon mfen ke ñkpọnọ ukwak, enyʌñ esịn ammọ ke ufọk ñkpakọb. 37 Emaetọọñ usʌk ke itiad ewot. Ekeyọọyọọk usʌk ekpịkke iba, enyʌñ ewot usʌk ke akañkañ. Ammọ ekesiine ikpaedọñ ye ikpaebod nte afọñ, eba ke unana enyʌñ ebọ ndutʌhọ. 38 Ederimbod ikidotto adinie ammọ. Ammọ emaeyooñ ke mme akpautatan ye mme ikpọabod ye ke mme ukpe ye mme adu ke isọñ.

39 Emaetooro afịd mbon ami ebaña mme ntiense mbuọdidem ammọ, kpayeado ibaaha awo ammọ ndomokeed a-akebọọhọ se ekenwọñọ, 40 sia Abasi amaakeduak ñkpọ se ifọn ikan inọ ñnyịn, nọ ato ke adidiana ye ñnyịn enam ammọ afọn ama.