1 Esio afịd ekamba aku ke atu mme awo, enyʌñ emek anye ebo ada ke iwuod mme awo ke mme ñkpọ a-abañake Abasi, ke adinọ mme enọ ye adinam mme uwa ke ntak mme idiọọkñkpọ. 2 Anye a-akan ayọ mbon unana ifiọk e-ewakkake ekpọñ usʌñ, sia anye ke idem amọ ado awo a-anieghe mmemidem. 3 Ami ado ntak a-anaaha anye anam mme uwa ke ntak mme idiọọkñkpọ amọ ye ake mbon mfen. 4 Ndin awo ndomokeed idatta ukpono ami inọ idem amọ, ibọhọke Abasi akoot anye naña ekekoot Erọn.

5 Kpa ke ukem usʌñ ado, Krais ikinọọhọ idem amọ ubọọñ adido ekamba aku. Ado Abasi akebo anye:

"Afo ado Ayịn mmi;

mfịn ami mmekappa ubon fiin."

6 Ndin anye abo ke itie mfen ate:

"Afo ado aku ke nsi-nsi

ke ukem ndaha Melkisedek."

7 Ke mme usen uwem Yisọs ke ederimbod, anye amaabọñ akam anyʌñ abeeñe mme ebeeñe ke akpọsọñ uyio, ye mmọọñayịd anọ anye a-akpekenyaañake anye asio ke ñkpa, ndin emaekop enọ anye ato ke nsuukidem ammọ. 8 Akpesʌkado a-anye akedooho Ayịn, anye amaakpeep ñkobitem ato ke mme ukuud a-akesịmme anye, 9 ndin ke emaekenam anye afọn ama, anye amaakappa ado usʌñ nsi-nsi adinyaaña anọ afịd mbon e-ekoppo item enọ anye. 10 Ndin Abasi amaamek anye nte ekamba aku ke ukem ndaha Melkisedek.

11 Ñnyịn iminie uwak ñkpọ se ikpitañ ibaña ñkpọ ami, ado asọsọñ adinam nọ inwaña ndufo sia ñkpọ mmisọppọ inwaña ndufo aba. 12 Akpesʌkado, ke aditʌm ntañ ndufo ekpekap edo mme andikpeeb, ado idahami ado se awo amamaana atọọñọ ikpeep ndufo akpa ntọọñọ ukpeebñkpọ a-abañake ikọ Abasi. Ndufo edo se enọ mmọọñeba, idooho nsọọñ ndidia! 13 Awo akeedodo a-anwọññọ mmọọñeba nọ ato do anye adu uwem, ke ntak asʌkkọ ado nsekayịn, imegheke ye ukpeebñkpọ a-abañake adinenido. 14 Ado nsọọñ ndidia ana anọ mme adiọọñọidem awo, a-adooho ke adidia afịd ini, ammọ ekpeep idem ammọ adidiọọñọ ukpʌhọde eti ye idiọọk.