1 Ke ntoro, ana ñnyịn itʌm ikpañ utọñ inọ se ñnyịn ikop mbaak ñnyịn idiyooñ ikpọñ usʌñ. 2 Sia, adieke etob a-mme enyere eketañña akebọppọ mme awo, ndin ubiaat etob ami ye ntịdutọñ edat ufen a-akedotto esọk mme awo, 3 die ke ñnyịn idiibọkkọ adieke ñnyịn isịnne utọ ekamba adinyaaña ami? Adinyaaña ami ado se Abọọñ ke idem amọ akebem iso asian, ndin mbon e-ekekoppo enyʌñ esọọñọ inọ ñnyịn. 4 Abasi amaanyʌñ anọ ikọ ntiense abaña ñkpọ ami ke mme idiọọñọ, mme utịppeñkpọ, mme utom adudu ye mme enọ Adisana Sịbidịd e-ekedeemeke nte asañake akekem ke udọñ amọ.

5 Idooho mme enyere ke anye ayaak ederimbod a-adiidi anọ, a-ñnyịn itañña ibaña. 6 A-aba itie a-awo abooho:

"Nsoo ido ubonawo a-afo akereke ñkpọ abaña anye,

ayịn awo a-afo aseeghe ñkpọ abaña anye?

7 Afo akenam ammọ esuuhọ etək-etək ekan mme enyere;

amaayat ammọ anyanya ubọọñ ye ukpono,

8 anyʌñ asịn afịd ñkpọ ke idak ñkpad ammọ."

Ke adisịn afịd ñkpọ ke idak ammọ, ibaaha ñkpọ se Abasi miikiyaaha isịn ke idak ammọ. Kpayeado idahami ñnyịn ikịtte afịd ñkpọ e-esịneke ke idak ammọ. 9 Ado ñnyịn imikịt Yisọs, e-ekenamma asuuhọ etək-etək akan mme enyere. Idahami, e-eyat anye anyanya ubọọñ ye ukpono sia anye amaabọ ndutʌhọ ñkpa nọ ato do, ke mfọn Abasi, anye akpa ñkpa ke iwuood afịd awo.

10 Ke adikoono uwak nditọ ideen ye ibaan ndʌk ubọọñ, amaadot Abasi, a-adooho ke anye, anyʌñ ato ke anye afịd ñkpọ aba, adinam andisiak usʌñ adinyaaña ukpọñ afọn ama ato ke ndutʌhọ a-anye akebọọhọ. 11 Ammọ naña iba, anye a-anamma awo asana ye mbon se enam esaana, esịne ke ubon keed. Ke ntoro, abuud imʌmmọ Yisọs adikoot ammọ nditọeka.* 12 Anye ate,

"Ami ñyaayaara anyịñ mfo nnọ mme nditọeka mmi ideen ye ibaan;

ami ñyaakwọ itooro mfo ke atu esob mbon Abasi."

13 Mfen ñko,

"Ami ñyaabuọt idem mmi ye anye."

Anye amaana abo:

"Se ami mi, ye nditọ A-Abasi annọọhọ miin."

14 Sia nditọ e-enie abʌk ye iyiib, anye ñko amaawana ke uduud awo, nọ ato ke ñkpa amọ anye abiat anye a-akamake adudu ñkpa, a-adooho, andidiọọk, 15 ndin anyʌñ atat mbon a-ndịk ñkpa akesịnne ifʌn ke afịd ayio uwem ammọ. 16 Sia ke akpanikọ idooho mme enyere ke anye anyaaña, ado ado ubon Ebraham. 17 Ke ntak ami akena enam anye aba nte ammọ, nte awo ke afịd usʌñ, nọ ato do anye akappa ado ekamba aku Abasi a-anieghe mbọm anyʌñ asọọñọ ada ke mbuọdidem ke utom Abasi, nọ ato do anye afeen mme idiọọkñkpọ awo. 18 Sia adooho anye ke idem amọ amaabọ ndutʌhọ ke ini ekedomoke anye, anye a-anie ukem adinyaña mbon e-ebaaha ke idomo.