1 Abọọñ amaabo Moses ate, 2 "Tañ dọkkọ nditọ Isrel nyʌñ bo ammọ: ‘Ami ndo Abọọñ Abasi ndufo. 3 Inaaha ndufo enam naña enam ke isọñ Iyib a-ndufo ekesidʌññọ, inaaha enyʌñ enam naña mbon Kenan enam ke isọñ Kenan, a-ami ibenne ndufo ndʌk. Ikiikeene se ammọ enam. 4 Ana enịm mme mbed mmi enyʌñ ekpeme adisaña ke mme ewʌhọ mmi. Ami ndo Abọọñ Abasi ndufo. 5 Ndufo inịm mme ewʌhọ ye mme mbed mmi, sia awo se inịm ammọ adiidu uwem akeene mme mbed ami. Ami ndo Abọọñ.

6 " ‘Inaaha awo ndomokeed anie ewuana ye ayakka amọ. Ami ndo Abọọñ.

7 " ‘Kuusuenne ete mfo ke adinie ewuana ye eka mfo. Anye ado eka mfo; kuunie ewuana ye anye.

8 " ‘Kuunie ewuana ye anwaan ete mfo; ado ayaasuenne ete mfo.

9 " ‘Kuunie ewuana ye ayịneka mfo awonwaan, me ado anye e-ete mfo abonno me anye e-eka mfo amanna, me anye akemana ke ukem ufọk keed ye afo me akemana ke itie mfen.

10 " ‘Kuunie ewuana ye ayịn ayịn mfo awodeen me ye ayịn ayịn mfo awonwaan; ado adiido asuenne unọ fiin.

11 " ‘Kuunie ewuana ye ayịn anwaan ete mfo, emanna enọ ete mfo; anye ado ayịnete mfo awonwaan.

12 " ‘Kuunie ewuana ye ayịneka ete mfo awonwaan; anye ado ayakka ete mfo.

13 " ‘Kuunie ewuana ye ayịneka eka mfo awonwaan, sia anye ado ayakka eka mfo.

14 " ‘Kuusuenne ayịneka ete mfo awodeen ke adinie ewuana ye anwaan amọ; anye ado anwaan ayịneka ete mfo.

15 " ‘Kuunie ewuana ye anwaan ayịn mfo. Ado anwaan ayịn mfo; kuunie ewuana ye anye.

16 " ‘Kuunie ewuana ye anwaan ayịneka mfo; ado ayaasuenne ayịneka mfo.

17 " ‘Kuunie ewuana ye eka ye ayịn amọ awonwaan. Kuunie ewuana ye ayịn awonwaan ayịn amọ awodeen me ye ayịn awonwaan ayịn amọ awonwaan; ammọ edoñño ayakka amọ. Ibak ado ado.

18 " ‘Kuuben ayịneka anwaan mfo udọ nte anwaan ufịb unyʌñ unie ewuana ye anye ke ini anwaan mfo abaaha ke uwem.

19 " ‘Kuukeene awonwaan ke ini anye anieghe itieisọñ a-anamma anye isanake unyʌñ unie ewuana ye anye.

20 " ‘Kuunie ewuana ye anwaan mbọhọidʌñ mfo unyʌñ usappa idem mfo ye anye.

21 " ‘Kuuben ayịn mfo ndomokeed unọọ nọ ewa uwa enọ Mọlek, sia inaaha asịn anyịñ Abasi mfo ke ndek. Ami ndo Abọọñ.

22 " ‘Kuunie ewuana ye emọ-emọ awodeen nte naña awodeen anie ye awonwaan; anye ado ado ataa mbubiam adinam.

23 " ‘Kuunie ewuana ye unam unyʌñ usappa idem mfo ye anye. Inaaha awonwaan aben idem amọ anọ unam nọ anie ewuana ye anye; ado ataa mbubiam adinam.

24 " ‘Ndufo ikiisappa idem ndufo ke mme utọ usʌñ ami, sia naña mme idịd a-ami mbooho mbịne nsio ke iso ndufo ekenam adodo esappa idem ammọ. 25 Emaesappa kpa isọñ ke idem amọ; anam ami mmaanọ isọñ ufen ke idiọọkñkpọ amọ, ndin isọñ amaakọk mme andidʌñ ke esịd asio. 26 Ado ana ndufo enịm mme ewʌhọ ye mme mbed mmi. Inaaha mme amanaisọñ ye mme asenawo edʌñọ ke atu ndufo enam mme mbubiam ñkpọ ami ndomokeed, 27 sia mbon se ikibem ndufo iso idʌñ ke isọñ ami emaenam afịd mme ñkpọ ami, ndin ato ke ntak ado emaesappa isọñ. 28 Ndin ndufo ekpesappa isọñ, anye ayaikọk ndufo asio naña akekọk mme idịd ekedʌññọ mbemiso ndufo.

29 " ‘Afịd awo se inam mme mbubiam ñkpọ ami ndomokeed ana ebịne utọ mbon ado esio ke atu mbon abio ammọ. 30 Inịm mme ewʌhọ mmi, ikiinyʌñ ikeene mme mbubiam eduuwem e-ekebaaha ke isọñ ami mbemiso ndufo edi, ikiinyʌñ isappa idem ndufo ye ammọ. Ami ndo Abọọñ Abasi ndufo.’ "