* 1 Abọọñ amaabo Moses ate: 2 "Adieke awo anamma idiọọkñkpọ inyʌññọ inam akpanikọ ke iso Abọọñ ato ke adibiaña mbọhọidʌñ amọ ke abaña ñkpọ se ekenọọ anye nọ anịm me se ekenọọ ke ubiọñ, me ke abaña ñkpọ se ekeyịp, me adieke anye anamma ñwo ye mbọhọidʌñ amọ, 3 me adieke anye akịtte ñkpọ se ikisop ndin akañ, me anwọñọ unwọñọ nsu abaña idiọọkñkpọ akeedodo a-awo anamma, 4 anye amaadue ke utọ usʌñ ami ndin akema edikịt ndudue amọ, ana anye aben se ekeyịp me se ekebọọ ke ñkanubọk, me se ekenọọ ebo enịm, me se ikisop nọ ekịt, atịmme adinọ, 5 me ñkpọ keed akeedodo a-anye akenwọñọke unwọñọ nsu abaña. Ana akoono mme ñkpọ ado atịmme adinọ ayọhọ-ayọhọ, amaana adian mbaak keed ke itie ition ekọmudua ñkpọ ado ayaak afịd anọ andinie ke usen a-anye anọọhọ uwa ndudue. 6 Ñko nte uwa ndudue, ana anye adat akukịmedọñ ke atu udịmedọñ i-imiinieghe ndo, a-anyʌññọ anie nnen-nnen ekọmudua, asọk aku, ado ado, adinọ Abọọñ. 7 Ke utọ usʌñ ami ke aku adiinam ñkpeubọk inọ anye ke iso Abọọñ, ndin eyaefeen enọ anye ke mme ñkpọ akeedodo a-anye akenamma nte ndudue."

8 Abọọñ amaabo Moses ate: 9 "Nọ Erọn ye nditọ amọ mbed ami: ‘Mme ewʌhọ ufọfọb uwa ado ami: Ufọfọb uwa ana adoro ke ebʌkikañ akpokoro uwa afịd akonayio, tutu ayio asiere, ñko ana ikañ asak ke akpokoro uwa. 10 Aku ndin ayaasịne linen afọñ amọ, ye linen afọñ idakidem ke esịd, ndin asio ntọñ ufọfọb uwa i-ikañ amaaketa ke akpokoro uwa anịm ke mben akpokoro uwa. 11 Amaama ado ana anye asio afọñ mbon ado ke idem anyʌñ aben mfen asịne, ndin anye aben ntọñ ado awuọ ke itie nnaa akaa itie se isana. 12 Ana ikañ ke akpokoro uwa asʌk asasak; inaaha anịme. Kwa ubakusen aku ana adisịn ifia anyʌñ aneeñe ñkpọ ufọfọb uwa adoot ke ikañ anyʌñ afọp akpọñ uwa ewuana adot ke anyọñ ado. 13 Ana ikañ ke akpokoro uwa akaka iso asak; inaaha anịme.

14 " ‘Mme ewʌhọ uwa ñkpasi ado ami: Nditọ Erọn ana eben enọ edi iso Abọọñ, ke iso akpokoro uwa. 15 Aku anie adiwoppo ataa eti ndomuyo se inekke ifọn ye adan ọlif, adian ye afịd insensi ke uwa ñkpasi, ndin afọp nte ñkpọ aditoiyo ke akpokoro uwa anọ Abọọñ nte anemufịk uwa. 16 Erọn ye nditọ amọ eyaedia se isʌhọ, ado enie edidia uyo se yiis imiisịneke, enyʌñ etie ke esịd itieukpono ke ini ediaha anye; enie edidia anye ke akwere atayad mbono. 17 Inaaha esịn yiis esañ anye; ami mmenọ ammọ anye ado nte udeeme ammọ ke uwa ndidia se edat ensọk. Ado adisana, ukem nte uwa idiọọkñkpọ* ye uwa ndudue. 18 Afịd nditọ ideen ke ubon Erọn ekeme edidia anye. Ke afịd emana, anye ado nsi-nsi ewʌhọ udeeme uwa ndidia amọ a-atooho ke se edat esọk Abọọñ. Se adodo a-atuuho ammọ ayaakappa ado adisana.’ "

19 Abọọñ amaamaana abo Moses ate, 20 "Uwa se Erọn ye nditọ amọ ediiben isọk Abọọñ ke usen se ediiyet anye adan ado ami: ataa eti ndomuyo, mbakka amọ keed ke itie duob ke udomoñkpọ efa* nte uwa ñkpasi e-enamma ke ini ke ini, ubaak keed ubakusen ye ubaak keed ndubiayio. 21 Ana esịn adan ke esịd usan ukwak esañ anye; eyaenekke ewuak anye afọn enyʌñ ebʌñ anye ñkeñe-ñkeñe eben edinọ nte anemufịk uwa a-anemme Abọọñ esịd. 22 Ayịn awodeen amọ adiidat itie amọ nte aku eyette adan adiinam ñkpọ ami. Ado udeeme Abọọñ ke nsi-nsi ewʌhọ ndin ana efọp anye afịd-afịd. 23 Ana efọp afịd uwa ñkpasi aku afịd-afịd; inaaha edia anye."

24 Abọọñ amaabo Moses ate, 25 "Dọkkọ Erọn ye nditọ amọ ate: ‘Mme mbed e-ebañake uwa idiọọkñkpọ ado ami: Ana ewot uwa ufeen idiọọkñkpọ ke iso Abọọñ ke itie e-ewotto ufọfọb uwa; anye ado ataa adisana. 26 Aku a-anamma uwa ami adiidia anye; ana edia anye ke itieukpono, ke akwere atayad mbono. 27 Se adodo atuuhọ abʌk amọ ayaakappa ado adisana, ndin iyiib ado akpetiamma ke nsiine, ana eyet anye ke akwere itieukpono. 28 Ana ebom ako usiọñ ekedatta etem unam ado; ado akpedo ekekama ako brọns etem, yak etʌk anye enyʌñ edaara ke mmọọñ. 29 Awodeen akeedodo ke ubon aku akeme adidia; anye ado ataa adisana ñkpọ. 30 Ado inaaha eta uwa ufeen idiọọkñkpọ ndomokeed e-ebenne iyiib amọ edʌk atayad mbono adinam ñkpeubọk ke Adisana Itie; ana efọp anye esio.