1 " ‘Adieke awo adueghe ke adido anye akop naña ebo yak awo aditie ntiense me ata unwọñọ abaña se anye akịt me se anye adiọọñọ, ndin anye asịn, awo ado adot ufen.

2 " ‘Adieke awo ndomokeed adiọọñọke ke imọ imidue isob, adieke anye atuuho se imiisanake ke ndudue (me ado akpo ndedeghe unam ke ikọd me anye a-adʌññọ ke ufọk me ndedeghe unam a-anyọọnọ ke isọñ), ndin anye idiọọñọke ke ado anam nọ imọ ideghe, ado akema edidiọọñọ ndudue amọ; 3 me ke etuuho ndek awo (se adodo a-akpenamma nọ anye imiisanake) akpesʌkado anye imiikidiọọñọke, kpayeado anye adidiọọñọ abaña anye anyʌñ akịt ndudue amọ; 4 me awo asọp inua ata unwọñọ adinam ñkpọ akeedodo, me eti me idiọọk (ke ñkpọ ndomokeed a-awo akemeke adidat unwọñọ ke unana adikere) akpesʌkado anye imiidiọọñọke, akema anye adidiọọñọ anyʌñ akịt ndudue ammọ, 5 awo amaadidiọọñọ ke imidue isob ke mme ñkpọ ami, ana anye ayaara ndudue se anye anam. 6 Nte isob ke idiọọkñkpọ* a-anye anamma, ana anye asio uman ñyịn edọñ me ebod ke atu udịmedọñ adinọ Abọọñ nte uwa ufeen idiọọkñkpọ. Ndin aku ayaanam ñkpeubọk anọ anye ke idiọọkñkpọ ammọ.

7 " ‘Awo ndomokeed i-imiinieghe ukeme adinọ ñyịn edọñ anie adidat ibiom iba me nditọ abomoñkuku iba nsọk Abọọñ nte isob ke idiọọkñkpọ amọ, keed ado ake uwa idiọọkñkpọ, keed ado ake ufọfọb uwa. 8 Anye anie adiben mme ñkpọ ami nsọk aku, adiibem iso inam uwa idiọọkñkpọ. Anye anie adifiakka anye itọñ, ado ikpịkkeke isio ikpọñ idem, 9 ndin anie adisiime iyiib uwa idiọọkñkpọ ado ke mben akpokoro uwa; amaama anye aduọk se isʌhọ ke isọñ akpokoro uwa. Ami ado uwa idiọọkñkpọ. 10 Aku ndin ayaawa anye ako nte ufọfọb uwa naña mbed atemme, anyʌñ anam ñkpeubọk anọ anye ke idiọọkñkpọ a-anye akenamma, ndin eyaefeen enọ anye.

11 " ‘Akpedo anam anye inieghe ibiom iba me ñyịn abomoñkuku iba, yak anye adat eti ndomuyo mbaak keed ke itie duob efa* udomoñkpọ adi nte uwa ufeen idiọọkñkpọ amọ. Inaaha esịn adan ọlif me insensi ke esịd, sia ado uwa idiọọkñkpọ. 12 Anye anie adiben nsọk aku; aku ndin ayaawoppo ndomuyo ado ubọk keed nte ñkpọ aditoiyo, anyʌñ afọp ke akpokoro uwa ke anyọñ uwa ndidia e-enọọhọ Abọọñ. Ami ado uwa idiọọkñkpọ. 13 Ke utọ usʌñ ami ke aku adiinam ñkpeubọk inọ anye ke idiọọkñkpọ akeedodo a-anye anamma, ndin eyaefeen enọ anye. Mme enọ mbon se isʌhọ anie aku, ukem naña ado ke uwa ñkpasi.’ "

14 Abọọñ amaabo Moses ate: 15 "Ini a-awo ndomokeed imiinamma akpanikọ ke iso Abọọñ ke adinam idiọọkñkpọ i-imiidooho ñkoinnam ke abaña ndisana ñkpọ Abọọñ akeedodo, anye anie adidat akukịmedọñ ke atu udịmedọñ i-imiinieghe ndo, a-anyʌññọ akem ekọmudua ke silfa, akeene ekọmudua sekel* itieukpono ndi nte isob. Ami ado uwa ndudue. 16 Ana anye anọ usiene se anye atre adinam ke abaña ndisana ñkpọ, adian isob ke adikpe mbakka keed ke itie ition ekọmudua amọ, anyʌñ aben afịd ñkpọ ado anọ aku. Aku ayaaben akukịmedọñ anam ñkpeubọk anọ anye nte uwa ndudue, ndin eyaefeen enọ anye.

17 "Adieke awo adueghe, anyʌñ anam ñkpọ akeedodo a-mbed Abọọñ akpanna, akpesʌkado a-anye imiidiọọñọke, anye a-adue isob, ndin ana anye akpe utịb. 18 Anye anie adisio akukịmedọñ i-imiinieghe ndo, a-anyʌññọ akem nnen-nnen ekọmudua ke atu udịmedọñ nte uwa ndudue adat asọk aku. Ke utọ usʌñ ami ke aku adiinam ñkpeubọk inọ anye ke idiọọkñkpọ akeedodo a-anye akenamma ke unana adidiọọñọ, ndin eyaefeen enọ anye. 19 Anye ado ado uwa ndudue, sia anye amaanam ndudue ke iso Abọọñ."