1 " ‘Akpedo uwa mfo ado uwa ewuana, ndin afo asio unam ke atu udịmenañ adi, me ado ayaara me ado uman, afo anie adinọ Abọọñ unam i-imiinieghe ndo. 2 Ana afo aben ubọk mfo adot ufene uwa ado ke iwuod, anyʌñ abak anye ke inuausʌñ atayad mbono. Ndin nditọ Erọn, mme aku, eyaesiime iyiib ado ekanna akpokoro uwa. 3 Ayaadat ubaak uwa ewuana ami adinọ Abọọñ nte uwa ndidia, ñkpọ esịd idịb ye afịd akpọñ se idọñọ ke esịd, 4 naña ekpuud iba ye akpọñ a-adianake ye ammọ, a-akpereke isịn, ye anyan udʌk a-ayịreke ke ati, a-afo adiisio ye mme ekpuud. 5 Ndin nditọ Erọn enie edifọp anye ke akpokoro uwa ke anyọñ ufọfọb uwa a-adoroke ke eboho ikañ; ado uwa ndidia, uwa a-anemme ufịk anọ Abọọñ.

6 " ‘Adieke afo asioho unam ke atu udịmedọñ anam uwa ewuana anọọ Abọọñ, ana afo anọ ayaara me uman i-imiinieghe ndo. 7 Afo ukpunọ ñyịn edọñ, ana aben enọ mfo adi ke iso Abọọñ, 8 dot ubọk mfo ke iwuod amọ, nyʌñ wot anye ke iso atayad mbono. Ndin nditọ ideen Erọn eyaesiime iyiib ado ekanna akpokoro uwa. 9 Ayaadat ubaak uwa ewuana ami adinọ Abọọñ nte uwa ndidia, akpọñ amọ, afịd isịm ado, wuọ isịn, ñkpọ esịd idịb ye afịd akpọñ se idudian ammọ ke idem, 10 naña ekpuud iba ye akpọñ a-adianake ammọ, a-akpereke isịn, ye udʌk a-ayịreke ke ati, afo uduusio keed ye mme ekpuud. 11 Aku ayaafọp ammọ ke akpokoro uwa nte uwa ndidia e-enọọhọ Abọọñ.

12 " ‘Akpedo uwa enọ mfo ado ebod, anie adiben anye ndi iso Abọọñ, 13 adot anye ubọk ke iwuod anyʌñ abak anye ke iso atayad mbono. Ndin nditọ Erọn eyaesiime iyiib ado ekanna akpokoro uwa. 14 Ayaadat ubaak enọ mfo adinọ Abọọñ nte uwa ndidia, ñkpọ esịd idịb ye afịd akpọñ se idudian ammọ ke idem, 15 naña ekpuud iba ye akpọñ a-adianake ammọ, a-akpereke isịn, ye anyan udʌk a-ayịreke ke ati, a-afo uduusio udian ye mme ekpuud. 16 Aku ayaafọp ammọ ke akpokoro uwa nte uwa ndidia, anemufịk ndidia. Afịd akpọñ ado anie Abọọñ.

17 " ‘Ami ado nsi-nsi ewʌhọ ke afịd emana ke ini iso, ke itie akeedodo a-andufo edʌññọ. Inaaha ndufo eta akpọñ ndomokeed, inyʌññọ ina enwọñ iyiib.’ "