1 " ‘Ndufo ikiinam mme ubobod abasi me usọsọi ñkpọ me adisana itiad inọ idem ndufo, ikiinyʌñ inịm ukakab itiad ke isọñ ndufo ituak iwuod inọọ anye. Ami ndo Abọọñ Abasi ndufo.

2 " ‘Inịm mme Sabad mmi inyʌñ inie ukpono inọ itieukpono mmi. Ami ndo Abọọñ.

3 " ‘Adieke ndufo ekeeneke mme mbed mmi enyʌñ ekpeme edinịm mme ewʌhọ mmi, 4 ami ñyaanọ edịm isọk ke akem ini, ndin isọñ ayaanwịm mbunwịm, mme eto enyʌñ enwịm mfịd ammọ. 5 Ini utịm abakpa ndufo adiisʌk ikaka iso tutu akem ini ukịppe kreb, ndin ini ukịppe kreb ayaakaa iso tutu ini utọ ñkpọ, ndin ndufo eyaedia afịd ndidia se ndufo eyem enyʌñ edʌñ ke ifuuro ke isọñ ndufo.

6 " ‘Ami ñyaanọ emem ke isọñ, ndin ndufo eyaesuuk enaa, ndin awo ndomokeed idinamma ndufo ekop ndịk. Ami ñyaasịññe mme afai unam ikọd mfep ke isọñ, ndin akañkañ idiiboiyoke ke isọñ idʌñ ndufo. 7 Eyaebịne mme asua ndufo, ndin ammọ eyaeduọññọ ke akañkañ ke iso ndufo. 8 Awo ndufo ition eyaebịne awo ikie, ndin awo ndufo ikie eyaebịne awo tọsịn duob, ndin mme asua ndufo eyaeduọññọ ke akañkañ ke iso ndufo.

9 " ‘Ami ñyaafọn ido ye ndufo ñnyʌñ idiọñ ndufo ñnyʌñ nnam ndufo enwịm uwak mfịd enyʌñ etọt ke ibad, ami ñyaanyʌñ nnam edioomo mmi ye ndufo asọọñọ ada. 10 Ndufo ediisʌk idiadia ñkpọ idọk isua ako ke ini ndufo ediiyeyem naña esịññe ammọ nọ itie aba anọ ufa. 11 Ami ñyaanịm itie idʌñ mmi* ke atu ndufo, ndiinyʌññọ isua ndufo. 12 Ami ñyaasaña ke atu ndufo ñnyʌñ ndo Abasi ndufo, ndufo enyʌñ edo ikọd mmi. 13 Ami ndo Abọọñ Abasi ndufo, a-akisioho ndufo ke Iyib mbaak ndufo idido ifʌn aba inọọ nditọ Iyib; ami ñkebuuñ mme ukwak akpọnọ ndufo ñnyʌñ nnam ndufo ekan esaña edịppe iwuod ke anyọñ.

14 " ‘Ado ndufo imiikpañña utọñ innọ miin inyʌñ inam afịd mme item ami, 15 ndufo ekpesịn mme ewʌhọ mmi enyʌñ esua mme mbed mmi, inamma mme item mmi ndin ato ke ado ndufo ebiat edioomo mmi, 16 ndin se ndiinam ndufo ado ami: Ami ñyaanam ndufo ekịt ñkpọ ndịk ke unana idodanyen, mben ndiọi udọñọ ye ufiobidem idot ndufo, ndin ammọ eyaetịp ndufo anyen enyʌñ ibọ ndufo inweek. Ndufo eyaetọ ñkpọ ke ikpu-ikpu, sia mme asua ndufo ediidia. 17 Ami ñyaawọññọ iso ikpọñ ndufo nọ ato do mme asua ndufo ikan ndufo; mbon se isua ndufo eyaikara ndufo, ndin ndufo eyaefeeñe ke ini awo ndomokeed imiibịneke ndufo.

18 " ‘Akpedo afịd ami atịppe ndufo isʌkkọ ikpañ utọñ innọ miin, ami ñyainọ ndufo ufen ke idiọọkñkpọ ndufo aboiyo utịme ñkentiaba. 19 Ami ñyaabuuñ nsọñiwuod ye iseri ndufo ñnyʌñ nnam ikpaanyọñ ndufo aba nte ukwak, isọñ ke idak ukod ndufo aba nte brọns. 20 Afịd adudu ndufo adiido ke ikpu-ikpu, sia isọñ ndufo idiinwịmme mme mbunwịm amọ, mme eto ke isọñ ndufo ñko idiinwịmme mfịd.

21 " ‘Ndufo ekpesʌk ekaiso eba ke ndusuara ye ami enyʌñ esịn adikpañ utọñ innọọ miin, ami ñyaanam ndutʌhọ ndufo awak akañ itiaba akan se ado idahami, naña idiọọkñkpọ ndufo adot. 22 Ami ñyaadọñ ndiọi unam ikọd inọ ndufo, ndin ammọ eyaibọi nditọ ndufo, esobo mme udịmenañ ndufo enyʌñ enam ndufo iwakka aba ke ibad tutu mme akpọusʌñ ndufo enaa ukpọk.

23 " ‘Akpedo anam kpa ye afịd ñkpọ ami ndufo inyịmmeke item mmi, ado ekaa iso ke ndusuara ye ami, 24 ami ke idem mmi ñyaaba ke ndusuara ye ndufo ñnyʌñ itʌkkọ ndufo ke mme idiọọkñkpọ ndufo awak akan akañ itiaba. 25 Ñyaanyʌñ nnam akañkañ adʌk atu ndufo nọ asio usiene ubiad edioomo mmi. Emaetịmme enyọñ mme abio ndufo, ñyaadọñ idiọọk udọñọ nsobo ke atu ndufo, ndin eyaeyaak ndufo esịn ke ubọk mme asua. 26 Ami mmaatre adinọ ndufo uyo, ibaan duob eyaesañ uyo ke usañ uyo keed, enyʌñ edodomo uyo inọ ndufo. Eyaeta ado idiikoppo uyʌkkọ.

27 " ‘Akpedo anam kpa ye afịd ñkpọ ami ndufo isʌkkọ ikpakpañ utọñ innọ ado ekaa iso ke ndusuara ye ami, 28 ke iyadesịd mmi ami ñyaaba ke ndusuara ye ndufo, ndin ami ke idem mmi ñyaimia ndufo ufen ke mme idiọọkñkpọ ndufo utịme ñkentiaba. 29 Ndufo eyaeta abʌkidem nditọ ideen ndufo ye ake nditọ ibaan ndufo. 30 Ami ñyaasobo mme ñkoñ-ñkoñ itie ndufo, ñkpok mme akpokoro uwa insensi ndufo nduọñọ ñnyʌñ ntañ akpo ndufo* ndoot ke idem mme ananauwem ubobod ñkpọ ndufo, ndin ami ñyaisua ndufo. 31 Ñyaawuut mme abio ndufo ñnyʌñ nnam mme ndisana itie ndufo ekappa ndoon, ndin ndiikoppo inemesịd ke mme inemufịk uwa ndufo. 32 Ami ke idem mmi ñyaanam isọñ ndufo akappa ndoon, nọ ato do idem akpa mme asua ndufo se idʌñ do. 33 Ñyaisuan ndufo ke atu mme idịd ñnyʌñ nsio akañkañ mmi ibịne ndufo. Isọñ ndufo ayaakappa ndoon, ndin mme abio ndufo eyaewuuro. 34 Ndin isọñ ayaakop inem ke mme isua sabad amọ ke afịd ini a-anye anaaha ukpọk, nọ ndufo eba ke isọñ mme asua ndufo; ndin isọñ ayaaba ke emem anyʌñ akop inem mme sabad amọ. 35 Ke afịd ini a-anye anaaha ukpọk, isọñ ayaanie nduọkadudu a-anye imiikinieghe ke mme sabad a-ndufo ekedʌññọ do.

36 " ‘Amaado mbon esʌhọke ke atu ndufo, ñyaasịn ammọ ndịk ke esịd ke isọñ mme asua ammọ tutu uyio mfañ a-afịm anyeeñeke ayaanam ammọ efeeñe. Ammọ eyaefeeñe nte ebo ke efeeñe akañkañ, ndin ammọ eyaeduọññọ, akpesʌkado awo ndomokeed imiibịneke ammọ. 37 Ammọ eyaeduọññọ etọọñ idem ammọ nte ebo ke efeeñe akañkañ, akpesʌkado awo ndomokeed imiibịneke ammọ. Anam ndufo idiikanna ida ke iso mme asua ndufo. 38 Ndufo eyaetak ke atu mme idịd; isọñ mme asua ndufo ayaidia ndufo. 39 Ndufo mbon se isʌhọ eyaekpañña etak ke isọñ mme asua ndufo ke ntak idiọọkñkpọ ndufo; ñko eyaetak ke ntak idiọọkñkpọ mme eteete ammọ.

40 " ‘Ado ammọ ekpeyaara mme idiọọkñkpọ ammọ ye ake mme eteete ammọ, unana akpanikọ ammọ ye naña ammọ esaña ke ndusuara ye ami, 41 a-akenamma ami ñnyʌñ mba ke ndusuara ye ammọ nọ mbịn ammọ ndọñ ke isọñ mme asua ammọ, ndin ke esịd ammọ emaekedoro ufiọn emaesuuhọ nọ ammọ ekpe utịb idiọọkñkpọ ammọ, 42 ñyaatoiyo edioomo mmi ye Yekọb, ye edioomo mmi ye Aisik, ye edioomo mmi ye Ebraham, ndin ñyaatoiyo isọñ ado. 43 Sia ammọ eyaekpọñ isọñ ndin isọñ ayaakop inem sabad amọ ke ammọ emaekpọñ nọ anye ana ukpọk. Ammọ eyaekpe utịb idiọọkñkpọ ammọ sia ammọ emaesịn mme mbed mmi enyʌñ esua mme ewʌhọ mmi. 44 Ado kpayeado, ke ini ammọ ebaaha ke isọñ mme asua ammọ, ami ndiisịnne ammọ ndiinyʌññọ nsua ammọ nọ akedo se nsobo ammọ afịd-afịd, nọ mbiat edioomo mmi ye ammọ mfep. Ami ndo Abọọñ Abasi ammọ. 45 Ado ke ntak ammọ ami ñyaatoiyo edioomo mmi ye mme eteete ammọ a-ami ñkesioho ke Iyib ke iso mme idịd, nọ ndido Abasi ammọ. Ami ndo Abọọñ.’ "

46 Ami ado mme ewʌhọ, mme mbed ye mme item A-Abọọñ akenịmme ke Abod Sainai ke ufọọd idem amọ ye nditọ Isrel ato ubọk Moses.