1 Abọọñ amaabo Moses ate, 2 "Ben Erọn ye nditọ amọ ideen, nsiine ammọ, adan udodubọk, ayaaraenañ uwa idiọọkñkpọ,* akukịmedọñ iba ye akpasa a-adọñọke uyo se yiis imiisịneke, 3 nyʌñ koono afịd esob bok ke inuausʌñ atayad mbono." 4 Moses amaanam naña Abọọñ akenọọ uyio, ndin mbon esob emaeboho ke inuausʌñ atayad mbono.

5 Moses amaabo esob ate, "Se Abọọñ anọ uyio abo yak enam ado ami." 6 Ndin Moses amaasio Erọn ye nditọ ideen amọ adi anyʌñ ayet ammọ ke mmọọñ. 7 Anye amaaben tunik asịn Erọn, abọp anye ubọbisịn, asịn anye afọñidem, anyʌñ aben afọñ aboditọñ akọọñ anye. Anye ñko amaaben uyaiya mbọbọisịn akpaha adian ke aboditọñ abọp anye. 8 Anye amaaben mbana ikpanesịd akọọñ anye anyʌñ asịn Urim ye Tumịm ke mbana ikpanesịd ado. 9 Ndin anye amaaben afọñiwuod adot Erọn ke iwuod, ndin ke iso afọñiwuod ado anye amaadian usan kold, a-adooho adisana idiọọñọ, kpa naña Abọọñ akebo Moses anam.

10 Ndin Moses amaaben adan unịm idiọọñọ anyʌñ ayeet ke tabanakịd ye ke afịd ñkpọ se idọñọ ke esịd, anyʌñ anam ammọ esana. 11 Anye amaasiime ibio adan ado ke akpokoro uwa akañ itiaba, anyʌñ ayet ke akpokoro uwa ye afịd ñkpoduoho amọ, ye besịn ye ukod amọ, adinam ammọ esana. 12 Anye amaaben ubaak adan unịm idiọọñọ ado aduọk Erọn ke iwuod, ayet anye nọ anam anye ado adisana. 13 Ndin anye amaasịññe nditọ ideen Erọn adi, asiin ammọ tunik, abọọp ammọ mbọbọisịn anyʌñ aben itam ayaat ammọ, kpa naña Abọọñ akedọkkọ Moses.

14 Ndin anye amaadat ayaaraenañ uwa idiọọkñkpọ adi, ndin Erọn ye nditọ ideen amọ emaedot anye ubọk ke iwuod. 15 Moses amaawot ayaara enañ ado, ndin adat iyiib ado ke nnuunubọk amọ ayeet ke afịd nnʌk akpokoro uwa nọ anam akpokoro uwa asana. Anye amaanwañña iyiib se ikisʌhọ aduọk ke isọñ akpokoro uwa. Ke ntoro anye amaanam anye ado adisana nọ ato do anam ñkpeubọk anọ itie ado. 16 Moses amaanyʌñ asio afịd mme akpọñ e-edianake ke mme ndido esịd idịb, anyan nsia ikọñesịd ye atiesịd, ye mme ekpuud iba ado ye akpọñ ammọ, anyʌñ afọp ke akpokoro uwa. 17 Ado ayaaraenañ ado ye ikpa amọ ye abʌkunam ye nsia anye amaafọp ke esiin itie nnaa, naña Abọọñ aketemme Moses.

18 Ndin anye amaaben akukịmedọñ ufọfọb uwa adi, ndin Erọn ye nditọ ideen amọ emaedot anye ubọk ke iwuod. 19 Ndin Moses amaawot akukịmedọñ ado anyʌñ asiime iyiib amọ akanna mme mben akpokoro uwa. 20 Moses amaakpok akukịmedọñ ado mbai-mbai anyʌñ afọp iwuod, mme mbai amọ ye akpọñ. 21 Anye amaayet ñkpọ esịd idịb ye ukod ke mmọọñ anyʌñ afọp afịd akukịmedọñ ado ke akpokoro uwa. Anye akedo ufọfọb uwa, anemufịk, uwa ndidia e-enọọhọ Abọọñ, naña Abọọñ akedọkkọ Moses.

22 Anye ndin amaaben akukịmedọñ anye ako adi, akukịmedọñ udodubọk, ndin Erọn ye nditọ ideen amọ emaedot anye ubọk ke iwuod. 23 Moses amaawot akukịmedọñ ado anyʌñ adat ubaak iyiib ado atọi Erọn ke mben utọñ nnasia, ke akpan nnuunubọk nnasia ye ke ekamba nnuunukod nnasia. 24 Ñko Moses amaasịññe nditọ ideen Erọn adi anyʌñ atọi ammọ ubaak iyiib ado ke mben utọñ nnasia ammọ, ke akpan nnuun ubọk nnasia ye ke ekamba nnuun ukod nnasia ammọ. Ndin anye amaasiime iyiib ado akanna akpokoro uwa. 25 Ke amaakema ado, anye amaasio akpọñ, isịm, afịd akpọñ a-adianake ke ñkpọ esịd idịb, anyan udʌk a-ayịreke ke ati, mme ekpuud iba ado ye akpọñ ammọ ye ifʌkkọ nnasia. 26 Ndin anye amaasio ndodoppo uyo keed, ndodoppo uyo keed ewuaha adan ọlif, ye mfefeere uyo keed ke akpasa uyo se yiis imiisịneke, a-akenaaha ke iso Abọọñ, ndin anye amaaben ammọ adot ke mme akpọñ ye ke ifʌkkọ nnasia. 27 Anye amaaben afịd ami asịn Erọn ye nditọ amọ ke ubọk, ndin ammọ emaekama efʌñ ke iso Abọọñ nte ufọfʌñ uwa. 28 Ndin Moses amaabọi ammọ mme ñkpọ ado anyʌñ afọp ke akpokoro uwa ke anyọñ ufọfọb uwa nte uwa udodubọk mme aku, anemufịk, uwa ndidia e-enọọhọ Abọọñ. 29 Moses ñko amaaben ikọñesịd, a-akedooho udeeme amọ ke akukịmedọñ udodubọk mme aku, anyʌñ afʌñ ke iso Abọọñ nte ufọfʌñ uwa, naña Abọọñ akewuuk Moses.

30 Ndin Moses amaadat ubaak adan udodubọk ye ubaak iyiib ke akpokoro uwa asiime Erọn ye nsiine amọ anyʌñ asiime nditọ ideen amọ ye nsiine ammọ. Ke ntoro anye amaanam Erọn ye nsiine amọ ado adisana, ñko nditọ Erọn ye nsiine ammọ ado adisana.

31 Ndin Moses amaabo Erọn ye nditọ ideen amọ ate, "Item unam ado ke inuausʌñ atayad mbono inyʌñ ita anye ke ndo ye uyo a-atooho akpasa enọ udodubọk mme aku, naña ekennọọ ewʌhọ: ‘Erọn ye nditọ ideen amọ enie edita anye.’ 32 Ndin ifọp unam ye uyo se isʌhọ. 33 Ikiinyʌñ idaaña ke inuausʌñ atayad mbono ke idak usen itiaba, tutu usen udodubọk ndufo akweeñe, sia udodubọk ndufo adiidat usen itiaba. 34 Se enam mfịn ami ado se Abọọñ akenọọ uyio, nọ ato do enam ñkpeubọk inọ ndufo. 35 Ana eba ke inuausʌñ atayad mbono uweemeayio ye akonayio ke usen itiaba enyʌñ enam se Abọọñ ayem, mbaak ndufo idikpa; sia ewʌhọ se ekennọọ ado ado."

36 Ke ntoro Erọn ye nditọ amọ emaenam afịd se Abọọñ akeboiyo ke Moses atañ.