1 Abọọñ amaabo Moses ate, 2 "Dọkkọ afịd esob nditọ Isrel ate: ‘Ndufo ido adisana sia ami Abọọñ, Abasi ndufo, ndo adisana.

3 " ‘Awo keedekeed ana akpono eka ye ete amọ, ana enyʌñ enịm mme Sabad mmi. Ami ndo Abọọñ Abasi ndufo.

4 " ‘Ndufo ikiikeene mme ubobod abasi, ikiinyʌñ inam mme Abasi ukwak inọ idem ndufo. Ami ndo Abọọñ Abasi ndufo.

5 " ‘Ndufo imaiwa uwa ewuana inọ Abọọñ, iwa anye ke usʌñ se adiinem nọ ebọ anye ke iwuod ndufo. 6 Ediidia anye kpa ke usen se ewa anye me ke edem usen; ana efọp se isʌhọ iwuọ ayọhọ usen ita. 7 Adieke ediaha anye ndomokeed ke ayọhọ usen ita, anye ado ndedeghe ndin awo idiibọọhọ. 8 Awo akeedodo a-adiaha anye ayaabiom ukwaññkpọ amọ sia ammọ ebiat se ido adisana inọ Abọọñ; ana ebịne ammọ esio ke atu mbon ammọ.

9 " ‘Ke ini edọkkọ ñkpọ inwañ ndufo, ikiidọk ñkpọ se iba ke adaña inwañ, ikiinyʌñ ikoono se ibọkkọ iduọññọ ke isọñ ke ini edọkkọ. 10 Kuukịppe afịd mfịd ke inwañ fain mfo umaa, kuunyʌñ ukoono mfịd fain se iduọññọ ke isọñ. Kpọñ anye ado nọ mme uweene ye mme asenawo. Ami ndo Abọọñ Abasi ndufo.

11 " ‘Kuuyịp inọ.

" ‘Kuusʌhọ nsu.

" ‘Kuubiaña emọ-emọ.

12 " ‘Kuunwọñọ enwọñọ nsu ke anyịñ mmi unyʌñ ubiat anyịñ Abasi mfo. Ami ndo Abọọñ.

13 " ‘Kuutʌk mbọhọidʌñ mfo, kuunyʌñ uyịp ñkpọ amọ.

" ‘Kuunịm akʌk utom awo afo akpeeghe utom nọ ayio asiere.

14 " ‘Kuusueñ inan, kuunyʌñ unịm nnan ñkpọ iduọ ke iso, ado baak Abasi mfo. Ami ndo Abọọñ.

15 " ‘Kuukpe ukwañ ikpe; kuutʌk uweene, kuunyʌñ uteeñe ekamba awo anyen, ado kpe ikpe mbọhọidʌñ mfo ke unen.

16 " ‘Kuusaña ubia mbia ke atu mbon ndufo.

" ‘Kuunam ñkpọ ndomokeed a-akemeke adidat uwem mbọhọidʌñ mfo. Ami ndo Abọọñ.

17 " ‘Kuusua emọ-emọ awo Isrel ndufo ndomokeed ke esịd mfo. Nekke sua nọ mbọhọidʌñ mfo mbaak afo udukeene uwuana ke ndudue ammọ.

18 " ‘Kuusio usiene, kuunyʌñ unie udu ubaña awo ndomokeed ke atu mbon ndufo, ado ma mbọhọidʌñ mfo nte idem mfo. Ami ndo Abọọñ.

19 " ‘Inịm mme ewʌhọ mmi.

" ‘Kuunam nọ utọ unam keed anie ewuana ye utọ unam mfen.

" ‘Kuutọ utọ uduud ñkpasi iba ke inwañ mfo.

" ‘Kuusịne nsiine e-edatta utọ afọñ iba ekịm.

20 " ‘Awodeen akpenie ewuana ye afʌn awonwaan emaekenwọñọ adinọ awo mfen ke ndọ ado awo ifakkake anye diin inọ itie ayịn isọñ, ana enọ anye ufen a-adotto. Ado inaaha ewot ammọ, sia awonwaan ado imiidooho ayịn isọñ diin. 21 Kpayeado, ana awodeen ado aben akukịmedọñ adi ke inuausʌñ atayad mbono nọ edinam uwa ndudue enọ Abọọñ. 22 Aku ana adat akukịmedọñ uwa ndudue ado anam ñkpeubọk anọ anye ke iso Abọọñ ke abaña idiọọkñkpọ a-anye anamma, ndin eyaefeen idiọọkñkpọ amọ.

23 " ‘Ke ini ndufo emaedʌk isọñ ado enyʌñ etọ eto mfịd akeedodo, idat mfịd amọ nte ñkpọ ebettebet.* Idat anye nte ñkpọ ibed.* Ke isua ita, inaaha edia anye. 24 Ke ayọhọ isua inaañ afịd mfịd amọ adiido adisana, edat anye enọ Abọọñ nte ñkpọ itooro. 25 Ado ke ayọhọ isua ition emekeme edidia mfịd amọ. Ntom ke mbunwịm ndufo adiitọt inọ ndufo. Ami ndo Abọọñ Abasi ndufo.

26 " ‘Ikiita unam ndomokeed se iyiib asʌk aba anye ke idem.

" ‘Ikiibre idiọñ, ikiinyʌñ iyem ñkukịd.

27 " ‘Ikiifat ided ndufo inịm ekpəñ, ikiinyʌñ ifat mben ñwaebek ndufo isio.

28 " ‘Ikiikpi abʌkidem ndufo ke ntak akpañkpa, ikiinyʌñ iwet akukịn ke ikpaidem ndufo. Ami ndo Abọọñ.

29 " ‘Kuusuuhọ ayịn awonwaan mfo itie ke adinam nọ anye ado akpara, imiidooho ntoro isọñ ado ayaawọññọ abịne ido akpara, anyʌñ ayọhọ ye ibak.

30 " ‘Inịm mme Sabad mmi inyʌñ iteeñe itieukpono mmi. Ami ndo Abọọñ.

31 " ‘Ikiikaa useñkpọ, ikiinyʌñ ikeene mbiaidiọñ, mbaak ammọ edisappa ndufo. Ami ndo Abọọñ Abasi ndufo.

32 " ‘Umaukịd ekamba awo, dakka da, kpono mme ñkpisọñ nyʌñ baak Abasi mfo. Ami ndo Abọọñ.

33 " ‘Asenawo amaadʌñ ke atu ndufo ke isọñ ndufo, ikiikuut ammọ. 34 Idat adidʌñ a-adʌññọ ke atu ndufo nte amanaisọñ. Ima ammọ nte idem ndufo, sia ndufo emaedo mme adidʌñ ke Iyib. Ami ndo Abọọñ Abasi ndufo.

35 " ‘Ikiidat idiọọk udomoñkpọ idomo ñkpọ inọọ awo, me ke adidomo unyọọñ, me udob me uwak. 36 Ikama nnen-nnen udomoñkpọ ye nnen-nnen udob, nnen-nnen efa* ye nnen-nnen hin*. Ami ndo Abọọñ Abasi ndufo, a-akibenne ndufo awuọ ke Iyib.

37 " ‘Inịm afịd mme ewʌhọ ye mme mbed mmi, inyʌñ inam ammọ. Ami ndo Abọọñ.’ "