1 Abọọñ amaabo Moses ke Abod Sainai ate, 2 "Dọkkọ nditọ Isrel ate: ‘Imaidʌk isọñ a-ami mbooho inọ ndufo do, isọñ ado ke idem amọ ana anie ini sabad anọ Abọọñ. 3 Ke isua itiokeed itọ mme inwañ ndufo, ñko ke isua itiokeed idiọñ inwañ fain ndufo inyʌñ idọk mme mfịd ammọ. 4 Ado ke ayọhọ isua itiaba yak isọñ anie nduọkadudu sabad isua keed, sabad enọ Abọọñ. Ikiitọ utọ, ikiinyʌñ idiọñ inwañ fain ndufo. 5 Ikiidọk se itịppe ke idem amọ, ikiinyʌñ itañ mme kreb a-ndufo imiikikpemeke, e-ekenwịmme ke idem ammọ. Ana isọñ anie nduọkadudu isua keed. 6 Se mbunwịm isọñ ado anwịm ke isua sabad ado adiido ndidia inọ ndufo, afo ke idem mfo, nditọufọk ideen ye ibaan mfo, ye ukpekpe awo utom ye awo anyʌññọ adʌñ ke atu ndufo ke etək-etək ini, 7 ye udịmedọñ ndufo ye mme unam ikọd e-ebaaha ke isọñ ndufo. Ekeme edidia se adodo anwịmme ato isọñ.

8 " ‘Ibat isua sabad itiaba isio, isua itiaba ke itie itiaba, nọ isua sabad itiaba ayọhọ isua aba mme usʌkkeed. 9 Ndin yak efịt adukpoñ ke afịd itie ke ayọhọ usen duob ke ayọhọ afiọñ itiaba; ke Usen Unam Ñkpeubọk ifịt adukpoñ ke afịd isọñ abio ndufo. 10 Inam ayọhọ isua aba mme duob asana inyʌñ inam ntadñyaak ke afịd isọñ inọ afịd mme andidʌñ ke esịd. Adiido yubili inọ ndufo; ndufo keedekeed enie editịmme ñnyọñ ñkeene inie ubon ndufo ñnyʌñ mbịne imaan ndufo. 11 Ayọhọ isua aba mme duob adiido isua yubili inọ ndufo; ikiitọ ikiinyʌñ idọk se itịppe ke idem amọ, ikiinyʌñ idọk mme fain a-ndufo imiikitọọhọ, e-etịppeke ke idem ammọ. 12 Sia ado yubili ndin ana ado adisana inọ ndufo; idia se edat eto inwañ kpọd.

13 " ‘Ke Isua Yubili afịd awo enie editịmme ñnyọñ ñkeene inie ammọ.

14 " ‘Ikpinyam isọñ inọ mbon ndufo me edep isọñ eto ammọ, ikiitʌk idem ndufo. 15 Idep ito mbon ndufo ikeene ibad isua yubili. Ndin ammọ enie edinyam inọọ ndufo ñkeene ibad isua se isʌhọ adidọk idọk. 16 Isua amaawak, afo anie adinam udua adọọk, isua imiiwakka, afo anie adisuuhọ udua, sia se enekke enyam unọọ fiin ado ibad mfịd inwañ. 17 Ikiitʌk idem ndufo, ado ibaak Abasi ndufo. Ami ndo Abọọñ Abasi ndufo.

18 " ‘Ikeene mme ewʌhọ mmi inyʌñ ikpeme adinịm mme mbed mmi, ndin eyaedʌñ ke isọñ ke ifuuro. 19 Ndin isọñ ayaanwịm mbunwịm amọ, ndufo eyaenyʌñ edia eyʌkkọ enyʌñ edʌñ do ke ifuuro. 20 Ndufo emekeme edibịp ebo, "Nsoo ke ñnyịn idiidia ke ayọhọ isua itiaba adieke ñnyịn imiitọọhọ inyʌññọ idọk mme ñkpọ inwañ ñnyịn?" 21 Ñyaanọ adidiọñ isọk ke ayọhọ isua itiokeed, adidiọñ a-adiinam isọñ anwịm se idiikem se edia ke isua ita. 22 Ke ini ediitọ ñkpọ ke ayọhọ isua itiaita, ediidia ito akaan utọ, enyʌñ ekaa iso edia eto do tutu idọk ayọhọ isua usʌkkeed.

23 " ‘Ikiinyam isọñ afịd-afịd, sia isọñ ado ami nnie ndin ndufo edʌñ ke isọñ mmi nte mme adidʌñ ye mme isenawo. 24 Ke afịd isọñ se afo ekama nte inie, ana ndufo enam usʌñ naña ediifaka isọñ ado.

25 " ‘Keed ke atu nditọ Isrel ndufo akpekappa uweene anyʌñ anyaam ubaak inie amọ, awo a-atooho ufọk amọ ana adifakka se ammọ ekenyam. 26 Akpedo anam ibaaha awo se idifakka inọ ammọ ado akema ammọ edinie ñkpọ enyʌñ enie ukeme edifakka anye ke idem ammọ, 27 yak ammọ ebat udua isọñ ekeene mme isua a-ammọ ekenyamma anye enyʌñ ekpọñ se isʌhọ enọ awo a-ammọ ekenyamma enọ; ammọ ndin ekeme editịmme ñkedat inie ammọ. 28 Ado ammọ imiinieghe ukeme adikpe, se ekenyam ayaasọọñọ aba nte inie andikidep tutu Isua Yubili. Ediikappa inọ mme andinie ke ini Yubili, ndin ammọ ekeme aditịmme ñkedat inie ammọ.

29 " ‘Awo a-anyamma ufọk ke abio e-ebọppọ ndibene ekanna asʌk anenie ayọhọ unen adifakka anye ke ufañ isua keed tọọñọ anye akenyam. Ke ufọọd isua keed ado andikinyam akeme adimaana mbọọ ndep. 30 Akpedo anam andikinyam ifakkake ke ufọọd isua keed ado, ufọk ado ke abio ebọppọ ndibene ekanna do adiinie andideb ye afịd emana amọ. Inaaha ekappa enọ anye ke Yubili. 31 Ado mme ufọk ke mme abio a-awo imiibọppọ ndibene ikanna edat ammọ nte esịne ke inwañ abio. Ekeme edifak ammọ ntịmme ñyaak nnọ andikinie ke Isua Yubili.

32 " ‘Mme Lifai enie unen afịd ini adifakka mme ufọk ammọ ke mme abio mme Lifai, a-ammọ enieghe. 33 Ke ntoro inie mme Lifai ado se efakka, ado ado ntom, ufọk akeedodo enyamma ke abio a-ammọ ekamake a-anaaha efakka ke Yubili, sia mme ufọk ke mme abio mme Lifai edo inie ammọ ke atu nditọ Isrel. 34 Ado inaaha enyam mme ikọd ubọọk ufene a-anieghe mme abio ammọ; anye ado ado nsi-nsi udeeme ammọ.

35 " ‘Ayịn Isrel ndufo ndomokeed akpekappa uweene ndin inyʌññọ ikan ikama idem ammọ aba ke atu ndufo, inyaaña ammọ ukem naña ekpenyaaña asenawo me adidʌñ, nọ ato do ammọ ekan ekaiso edʌñ ke atu ndufo. 36 Ikiibọọ ammọ udod, ado ibaak Abasi ndufo, nọ ammọ ekaiso edʌñ ke atu ndufo. 37 Inaaha ndufo enọ ammọ ewuọd akʌk eyem udod me enyam ndidia enọ ammọ eyem udod. 38 Ami ndo Abọọñ Abasi ndufo, a-akisioho ndufo ke Iyib adinọ isọñ Kenan ñnyʌñ ndido Abasi ndufo.

39 " ‘Awo Isrel ndufo ndomokeed akpekappa uweene enyʌñ enyam idem ammọ inọ ndufo, ikiinam ammọ enam utom nte mme ifʌn. 40 Idat ammọ nte mbon e-ekpeeghekpe utom me nte mbon e-edʌññọ ye ndufo ke etək-etək ini; ammọ enie edinam utom inọọ ndufo tutu akem Isua Yubili. 41 Amaama ado esaana ammọ ye nditọ ammọ eyaak, ndin ammọ eyaetịmme ebịne ubon ammọ ye mme inie mme eteete ammọ. 42 Sia adooho nditọ Isrel edo ikọd mmi, a-ami ñkesioho ke Iyib, inaaha enyam ammọ nte mme ifʌn. 43 Ikiikara ammọ ke ufịk, ado ibaak Abasi ndufo.

44 " ‘Ifʌn ideen ye ifʌn ibaan ndufo ediito mme idịd mfen ke ñkanñkʌk ndufo; emekeme idep ifʌn nto ammọ. 45 Emekeme adinyʌñ ndep mbon edʌññọdʌñ ke ufọọd ndufo ye mbon ubon ammọ e-emanake ke abio ndufo, ndin ammọ eyaekappa edo inie ndufo. 46 Emekeme ikpọñ ammọ nnọọ nditọ ndufo nte inie adiaakpa, ammọ enyʌñ edo ifʌn ke nsi-nsi, ado inaaha ekara nditọ Isrel ndufo ke ufịk.

47 " ‘Adieke asenawo a-adʌññọ ke atu ndufo akpekappa amọinyọ nọ awo Isrel ndufo ndomokeed akappa uweene enyʌñ enyam idem ammọ enọ asenawo me ubon asenawo ado 48 enie unen adifakka ammọ ke ammọ emaekenyam idem ammọ. Awo keed ke ubon ammọ akeme adifakka ammọ: 49 Ayịneka ete, ayịneka eka me ayịn ayịneka ete me ayịn ayịneka eka me awo ubon ammọ ke atu imaan ammọ akeme adifak ammọ. Ammọ ke idem ammọ ekpedinie ñkpọ, ekeme adifakka idem ammọ. 50 Ammọ ye mme andideb ammọ enie edibat ini tọọñọ ke isua ammọ ekenyamma idem ammọ tutu akesịm Isua Yubili. Ekọmudua adidat ifakka ammọ adiikeene se ekpe anamutom ke utọ ibad isua ado. 51 Isua se isʌhọ akpewak, ana ammọ ekpe udua se ikpon ikan se ekekpe efak ammọ. 52 Akpedo isua se isʌhọ iwakka mbemiso ewuọ Isua Yubili, ammọ enie edibat naña adʌk ñnyʌñ ñkpe mfakka idem ammọ. 53 Ana ekama ammọ nte mbon e-ekekpeeghe utom ke isua ke isua; ana ekịt ebo ke mbon a-ammọ enamma utom enọ ikarake ammọ ke ufiik.

54 " ‘Akpekọm awo ifakka ammọ ke mme utọ usʌñ ami, ana esaana ammọ ye nditọ ammọ eyak ke Isua Yubili, 55 sia nditọ Isrel edo ake mmi nte nditọufọk mmi. Ammọ edo nditọufọk mmi, a-ami ñkesioho ke Iyib. Ami ndo Abọọñ Abasi ndufo.