1 Mme ikọ Nehimaiya ayịn Hakalia:

Ke afiọñ Kislef ke ayọhọ isua edịb, ke ini a-ami ñkebaaha ke ufọk adidem ke Susa, 2 Hanani, ayịneka mmi awodeen keed, amaato Yuda adi ye mbon mfen, ndin ami mmaabịp ammọ mbaña mme ñyọhọnsʌhọ nditọ Yuu e-ekebọkkọke ntañnsio, ñnyʌñ mbịp mbaña Yeruselem.

3 Ammọ emaembo miin ete, "Mbon se ikibọkkọ ntañnsio inyʌñ itịmme inyọñ abio eba ke ekamba ukuud ye asuenne. Ndibene Yeruselem awuudo, enyʌñ efọp inuaatob amọ ke ikañ."

4 Ke ini ami ñkekoppo mme ñkpọ ami, ami mmaasuuk ntie ntua. Ke ñkpọ nte usen ifañ ami mmaafʌhọ, ntie utreudia ñnyʌñ mbọñ akam ke iso Abasi anyọñ. 5 Ndin ami mmaabo nte:

"Abọọñ, Abasi ke hefịn, ekamba ye anie uteeñe Abasi, ake anịmme edioomo ima amọ ye mbon se ima anye inyʌñ inịm mme mbed amọ, 6 kpañ utọñ nyʌñ tat anyen mfo mbaak akop akam ake awo utom mfo abọññọ ke iso mfo uweemeayio ye akonayio abaña ikọd mfo, nditọ Isrel. Ami mmeyaara mme idiọọkñkpọ ñnyịn nditọ Isrel, kpa ye ake mmi ye ufọk ete mmi, inamma udue fiin. 7 Ñnyịn iminam abʌd-abʌd ido ye afo. Ñnyịn inyʌññọ inịm mme mbed, ewʌhọ ye item a-afo akenọọhọ isʌñutom mfo Moses.

8 "Toiyo ikọ a-afo akedọkkọke isʌñutom mfo Moses, abo, ‘Ndufo emaenam idiọọk ido, ami ñyaisuan ndufo ke atu mme idịd, 9 ado ndufo imaitịmme iñkeene miin inyʌñ inịm mme mbed mmi, mbon ndufo ekpesuana ewuọ utịd anyọñ, ami ñyaakoono ammọ ke udo ñnyʌñ mben ammọ ndi itie ake ami mmekke nte itie idʌñ nnọ Anyịñ mmi.’

10 "Ammọ edo mme mbon utom mfo ye mme ikọd mfo, ake afo akefakka ke akwa adudu ye ke akpọsọñ ubọk mfo. 11 Abọọñ, kpañ utọñ nọ akam isʌñutom mfo ami ye akam mme isʌñutom mfo se ima aditeeñe anyịñ mfo. Nọ isʌñutom mfo mfọniso mfịn ami ke adinam anye akịt mfọn ke iso adidem."

Ami ñkedo andisitọkkọ ukọd nsịn ke kọọb nnọọ adidem nọ anwọñ.