1 Ke afiọñ Nisan ke ayọhọ isua edịb tọọñọ Ataseeses akedo Adidem, ke ini emaekeben ukọd esọk anye, ami mmaaben ukọd ñnyʌñ ñkenọ adidem. Kpaanaanam mfʌhọke ke iso adidem akpa, 2 anam adidem amambịp miin ate, "Nsoo inam nọ iso mfo aba mfʌhọ-mfʌhọ ntoro ke ini afo umuudọñọkedọñọ? Ami ikemeke ido ñkpọ mfen ikan mfʌhọ esịd."

Ndịk amannam eti-eti, 3 ado ami mmaabo adidem nte, "Yak adidem adu uwem ke nsi-nsi! Die ke iso mmi imiikpibaaha mfʌhọ-mfʌhọ ke ini abio e-ebuuhọ mme eteete mmi adooho ñwuudo, ndin mme inuaatob amọ emaesịn ikañ?"

4 Adidem amambo miin ate, "Nsoo ke afo ayem?"

Ndin ami mmaabọñ akam ñkoot Abasi anyọñ, 5 ñnyʌñ mbọọrọ adidem nte, "Adieke anemme adidem esịd, ñko akpedo isʌñutom mfo a-akịt mfọn ke iso amọ, yak anye andọñ miin nọ ñka abio Yuda e-ebuuhọ mme eteete mmi nọ ñkemaana mbọp abio ado."

6 Ndin adidem, ye abọọñanwaan ke ñkañ amọ atie, amambịp miin ate, "Isañ mfo adiikpeene die, uduunyʌñ unyọñ udi idaha akee?" Amaanem adidem esịd adinnọ miin ñka; anam ami mmaanịm ini.

7 Ami ñko ñnyʌñ ndian mbo anye nte, "Ke adidem amaaha, yak anye annọ ñwed nsọk mme adaukara ke Inyañ Yufretis Edem uko, nọ ammọ endat usʌñ tutu ñkewuọ Yuda ke ifuuro. 8 Ñko yak anye annọ ñwed nsọk Asaf, andikpeme akai adidem, nọ anye annọ eto nọ edat enam atekke enọ mme inuaatob, ye ake ndibene abio ye ake ufọk ake ami ndiidʌñ." Ndin sia adifọn ubọk Abasi mmi amaakendoro miin ke idem, adidem amaanam se ami ñkebeeñe. 9 Ndin ami mmaakaa mbịne mme adaukara ke Edem-Yufretis ñnyʌñ ñkenọ ammọ mme ñwedetob adidem. Adidem amaanyʌñ anọ mme etubom mbon ekọñ ye kafalri esaña ye ami.

10 Ke ini Sanbalad awo Họrọn ye Tobia awo ke atu mme adaaha Amọn akekoppo ñkpọ ami, amaafịna ammọ eti-eti naña awo akpediyem ufọn nditọ Isrel.

11 Ami mmaakaa Yeruselem, ndin ke mmaakeba do usen ita 12 mmaadakka isañ akonayio ye ibad-ibad awo. Ami ñkidọkkọke awo ndomokeed se Abasi mmi akensịn miin ke esịd adinam nnọọ Yeruselem. Mme enañuwad ndomokeed ikibaaha ye ami ke amaaboiyo anye ake ami ñkewatta.

13 Ke akonayio ami mmaasaña Inuaatob Abedeñ ñwuọ ñkaa Ube Mmọọñ Yakal ye Inuaatob Ifịm, ñkeseet mme ndibene Yeruselem e-emaekewuut, ye mme inuaatob amọ, i-ikañ amaaketa. 14 Ndin ami mmaaboiyo ñkewuọ Inuaatob Faunten ye Ñkpọdiọhọ Mmọọñ Adidem, ado ufañ ikikponno ikem se enañuwad mmi asaña aboiyo; 15 anam ami mmaadọọk ndʌk abedeñ akonayio, nseet ndibene. Ke akpatre, ami mmaatịmme ndisaña Inuaatob Abedeñ ñnyọñ. 16 Mme adaaha ikidiọọñọke nte ami ñkekaa me se ami ñkenam, sia idaha ado ami ñketañña ñkpọ ndomokeed diin nnọ mme Yuu me mme aku me mme mbọọñ me mme adaaha me mbon mfen se idiinam utom ado.

17 Ndin ami mmaabo ammọ nte, "Ndufo emekịt mfịna se ñnyịn idʌk: Yeruselem akappa ndoon, ndin mme inuaatob amọ eta ikañ. Edi, yak ñnyịn imaana idiọñ ndibene Yeruselem, mbaak ñnyịn idika iso ido ñkpọ ndọk." 18 Ami mmaanyʌñ ndọkkọ ammọ naña ubọk Abasi andoro ke idem ye se adidem akembo.

Ammọ emaebọọrọ ete, "Yak itọọñọ adimaana mbọp." Ndin ammọ emaetọọñọ eti utom ami.

19 Ado ke ini Sanbalad awo Họrọn, Tobia adaaha mbon Amọn ye Kesem awo Arab ekekoppo ebaña ñkpọ ami, ammọ emaesaha enyʌñ eduọi ñnyịn. Ammọ emaebịp ebo, "Nsoo ke ndufo enam ami? Ndufo esọñ iwuod ye adidem?"

20 Ami mmaabọọrọ ammọ nte, "Abasi anyọñ ayainọ ñnyịn mfọn. Ñnyịn mbon utom amọ iyaitọọñọ adimaana mbọp, ado amaado ndufo, ndufo inieghe udeeme ke Yeruselem me unen ke ñkpọ ndomokeed se ibaña anye."