1 Akema mme awo ye mme ibaan ammọ eseeme akpọsọñ-akpọsọñ ebaña mme Yuu nditọete ammọ. 2 Usʌk ammọ ete, "Ñnyịn ye nditọ ideen ye nditọ ibaan ñnyịn imiwak; mbaak ato do ñnyịn idu uwem, ana ñnyịn inie abakpa."

3 Usʌk mfen ekesʌk ebo ete, "Ñnyịn imiben mme inwañ ñnyịn, mme inwañ fain ñnyịn ye mme ufọk ñnyịn inịm ubiọñ nọ ato do ñnyịn inie abakpa ke ini akañ."

4 Kpa usʌk mfen ekesʌk ebo ete, "Akena iwọwuọt akʌk ikpe ataksi inọ adidem ke mme inwañ ye mme inwañ fain ñnyịn. 5 Akpesʌkado ñnyịn ido abʌk ye iyiib keed nte mme Yuu nditọete ñnyịn ñko akpesʌkado nditọ ñnyịn enyʌññọ efọn nte ake ammọ, kpayeado ñnyịn iminam nditọ ideen ye nditọ ibaan ñnyịn ekappa edoñño mme ifʌn. Ubaak nditọ ibaan ñnyịn emaedodo ifʌn, ado ñnyịn inieghe se ikan inam, sia mme inwañ ye mme inwañ fain ñnyịn enie mbon mfen."

6 Ke ini ami mmaakekop ñkpoyo ammọ ye mme ikọ se eketañ edian, esịd amañyat eti-eti. 7 Ami mmaakere mme ñkpọ ami ke esịd mmi ndin mmaatọhọ ye mme mbọọñ ye mme adaaha. Ami mmaabo ammọ nte, "Ndufo ebọ mbon ndufo udod!" Ndin mmaakoot ataa uwak awo mbok nọ ato do eneme ebaña ñkpọ ami 8 ñnyʌñ mbo: "Ke naña ikpikakan, ñnyịn imaifak nditọ Yuu ñnyịn ake ekenyamma enọ mme Gentile isio. Idahami ndufo enyaanyam mbon ndufo, nọ emaana eben ammọ enyam inọ ñnyịn!" Ammọ emaedop uyio, sia ammọ ikinieghe se etañ.

9 Ndin ami mmaakaiso ntañ mbo, "Se ndufo enam ifọnnọ. Nte ndufo ikpisañake ke mbaak Abasi ñnyịn nọ ato do etre esaha mme Gentile asua ñnyịn? 10 Ami ye mme nditọete mmi ye mme ikọd mmi isʌk iwuọt mbon awo akʌk ye ñkpasi abakpa ñko. Ado yak itre adibọ udod! 11 Ndufo iyaak usọp-usọp mme inwañ ammọ, mme inwañ fain, mme inwañ ọlif ye mme ufọk ammọ inọ ammọ, ñko ye udod ake ndufo ebọọhọ ammọ, mbaak keed ke itie ikie (100) ke akʌk, ñkpasi abakpa, ufa ukọd ye adan ọlif."

12 Ammọ emaebo ete, "Ñnyịn iyaikpọñ inọ ammọ. Ñko ñnyịn idiibọọhọ ammọ ñkpọ aba. Ñnyịn iyainam naña afo abo."

Ndin ami mmaakoot mme aku ñnyʌñ nnam mme mbọọñ ye mme adaaha edat unwọñọ ebo ke mmimọ iyainam naña ikinwọñọ ado. 13 Ami mmaanyʌñ ñnyeghe ikpanesịd afọñ mmi nsio ñnyʌñ mbo, "Ntom ke Abasi adiinyeghe awo ake imiinịmme enwọñọ ami isio ke ufọk ammọ ye ke inie ammọ. Yak enyeghe utọ awo ado esio enyʌñ etem anye ukpọk!"

Ke ami afịd awo emaebọọrọ, "Amen," emaenyʌñ etooro Abọọñ. Ndin ammọ emaenam naña ekenwọñọ.

14 Kpayeado, tọọñọ ke ayọhọ isua edịb nte Adidem Ataseeses akeda ukara, ke ini ekemmekke miin nte adaukara ammọ ke isọñ Yuda, tutu awuọ ayọhọ isua edịb mme duob mme iba ke ukara amọ, isua duob mme iba, ami ye nditọete mmi ikidiaha ndidia adaukara. 15 Ado mme adaukara se ikibem iso iba, se ikiba mbemiso ami, emaetʌkkọ mme awo enyʌñ esibọ ammọ sekel silfa aba* dian ye ndidia ye ukọd. Mme udiana ammọ ñko emaenyʌñ esitʌkkọ mbon awo. Ado ato ke ntak uteeñe Abasi ami ñkinamma ntoro. 16 Utu ke ado, ami mmaayaak idem mmi nnọ utom ndibene ami. Afịd ikọd mmi emaedisoobo do nọ enam utom ado; ñnyịn ikideppe isọñ ndomokeed.

17 Ke ami amaakeboiyo, mme Yuu ye mme adaaha ikie mme aba mme duob (150) ye mbon mfen ake eketooho ñkanñkʌk idịd ekesidia ñkpọ ke akpokoro mmi. 18 Kwa usen ekesitem abaakenañ keed, mfọọn idem edọñ itiokeed ñkọrọ mme unen ennọ miin, ndin kwa usen duob ennọ uwak nsio-nsio utọ ukọd. Kpa ye ami, akenam ami ñyemme ndidia ake enịmme enọ adaukara, sia mme ñkpọ se ekeyem eto mbon awo ado amaafiik ammọ ibọhọ.

19 Ntoiyo miin ye mfọn, Abasi mmi, ke afịd se nnam nnọ mbon ami.