1 afịd awo emaedisoobo itie keed ke anwa a-adaaha ke iso Inuaatob Mmọọñ. Ammọ emaebo Esra andikpeeb Mbed ete yak asio Ñwed Mbed Moses, anye ake Abọọñ akewuuhọ Isrel, aben adi.

2 Anam ke akpa usen ke ayọhọ afiọñ itiaba aku Esra amaaben ñwed Mbed adi ke esob, a-akedooho ibaan ye ideen ye afịd mbon se ikidiọọñọ ñkpọ. 3 Anye amaada ke iso anwa Inuaatob Mmọọñ akoot ñwed ado tọọñọ ke usiere tutu ufọọd uweemeayio ke iso ideen, ibaan ye mbon mfen se ikidọọñọ ke esịd ñwed ado akenwaña. Ndin afịd awo emaekpañ utọñ enọ Ñwed Mbed.

4 Esra andikpeeb Mbed amaadọọk ada ke anyọñ anyan akpokoro eto e-ekebọppọ enọ adinam ado. Ado Matitia, Sema, Anaiya, Yuria, Hilkia ye Maaseiya ekeda anye ke ñkañ ke ubọk nnasia; Pedaiya, Miseel, Malkiya, Hasum, Hasbadana, Sakaraiya ye Mesulam emaenyʌñ eda anye ke ubọk ufiin.

5 Esra amaakʌppọ ñwed. Afịd awo emaekịt anye sia anye akeda ke ñkpọ se inyọọñ; ndin nte anye akʌppọke ñwed, afịd awo emaedaaña edada. 6 Esra amaatooro Abọọñ, akwa Abasi; ndin afịd awo emaebenne ubọk ke anyọñ enyʌñ ebọọrọ, "Amen! Amen!" Ndin ammọ emaenyuuk iwuod enyʌñ ekpono Abọọñ, etuuk iso ke isọñ.

7 Mme Lifai: Yesua, Bani, Serebia, Yamịn, Akub, Sabetai, Hodia, Maaseiya, Kelita, Asaria, Yoosabad, Hanan ye Pelaiya emaekpeep mme awo ebaña Mbed ke ini mme awo ekedaaha do. 8 Ammọ emaekoot Ñwed Mbed Abasi, enam ikọ ado anwaña enyʌñ ewọt mme awo se ikọ ado akewuọñọ nọ anwaña ammọ.

9 Ndin Nehimaiya adaukara, Esra aku ye andikpeeb Mbed ye mme Lifai e-ekesʌkkọ ekpeep mbon awo ñkpọ emaebo afịd ammọ ete, "Usen mfịn ami ado adisana anọ Abọọñ Abasi ndufo. Ndufo ikiiseeme ikiinyʌñ itua ayịd." Sia afịd awo eketuatua naña ekoppo mme ikọ Mbed ado.

10 Nehimaiya amaabo ate, "Ndufo ikaa ikidia nti ndidia inyʌñ inwọñ inịññe mmịn, inyʌñ inọ ubaak esọk mbon i-imiinieghe se etem. Usen mfịn ami ado adisana anọ Abọọñ ñnyịn. Ndufo ikiifʌhọ, sia idadesịd Abọọñ ado adudu ndufo."

11 Mme Lifai emaenam afịd awo etekke idem, ebo ammọ ete, "Ndufo idop, sia mfịn ado adisana usen. Ikiifʌhọ."

12 Ndin afịd awo emaedakka ekaa adidia ñnyʌñ ñnwọñ ñkpọ, ñnyʌñ nnọọ ndidia esọk mme awo ñnyʌñ nnam usọrọ ye ekamba idaara, sia idaha ado mme ikọ e-ekebenne ewọt ammọ emaenam anwaña ammọ ndin.

13 Ke ayọhọ usen iba ke afiọñ, mme mbọọñ ufọk, ye mme aku ye mme Lifai, emaeboho ekanna Esra andikpeeb, nọ ato do ammọ enekke ekpeep ediọọñọ mme ikọ Mbed. 14 Ammọ emaekịt nte ewet ke ñwed Mbed, ake Abọọñ akenọọhọ uyio ato Moses, ate ke ana nte nditọ Isrel edʌñ ke mme itie idʌñ ebọppọ ke ibio ke ini usọrọ ayọhọ afiọñ itiaba 15 ñko ke akena nte ammọ ekwọrọ ikọ ami enyʌñ esuan anye ke afịd mme abio ammọ ye ke Yeruselem: "Iwuọñọ ikaa abod-abod abio inyʌñ ikedat mme ñkọk ọlif ye eto ọlif esịd ikọd, ye ake meetel, ake mme ayob ye ake mme eto ake esinọọhọ mfuud, idi nọ idinam mme atayad," naña ekewet.

16 Ndin mme awo emaewuọñọ ekedat mme ñkọk enyʌñ edibọp mme atayad enọ idem ammọ ke mme akọm ufọk ammọ, ke akwere ammọ, ke akwere ufọk Abasi ye ke anwa Inuaatob Mmọọñ ye ake Inuaatob Ifrem. 17 Afịd atutu awo se ikito itie eketañña ammọ ekebon ke ufʌn emaebọp atayad enyʌñ edʌñ ke esịd. Tọọñọ ke ayio Yọsua ayịn Nọn tutu awuọ usen ado, nditọ Isrel ikinamma usọrọ ado ke utọ usʌñ ami. Ndin idadesịd ammọ amaanekke akpon.

18 Ke usen ke usen, tọọñọ ke akpa usen tutu awuọ akpatre, Esra amaakoot ke Ñwed Mbed Abasi. Ammọ emaedia usọrọ ado usen itiaba, ndin ke ayọhọ usen itiaita, naña mbed aketemme, ammọ emaenịm ekamba esob.