* 1 Ke ini Sanbalad akekoppo ke ñnyịn ikisʌk idiọñ ndibene, anye amaayat esịd anyʌñ akop ataa ifiobesịd. Anye amaasak mme Yuu, 2 ndin ke iso mme nsaña amọ ye mbon ekọñ Sameria, anye amaabo, "Nsoo ke mme ñyeeme Yuu ado enanam? Ammọ eyaemaana ibọp ndibene ammọ? Ammọ eyaewa mme uwa? Ammọ eyaekweeñe ke usen keed? Nte ammọ ekeme edimaana ndemme uwem mme itiad ado nsịññe ke ñwuudo ado, ke naña ikañ aketa ammọ?"

3 Tobia awo Amọn, a-akesañake ke ñkañ amọ, amaabo, "Nsoo ke ammọ ebọbọp; akpekọm ewaikọd adọọk ndibene itiad ammọ ado akeme adiwuut anye!"

4 Kpañ utọñ inọ ñnyịn, Abasi ñnyịn, sia e-esịn ñnyịn ke ndek. Nam nsueñ ammọ atịmme akedoro ammọ ke iwuod. Yaak ammọ nọ nte ñkpọ mbịme ke isọñ ufʌn. 5 Kuufʌk mme ukwaññkpọ ammọ, kuunyʌñ ukwokko mme idiọọkñkpọ ammọ ke iso mfo ufep, sia ammọ enọ mme anamutom usọñanyen.

6 Ntom ke ñnyịn ikimaana ibọp ndibene tutu afịd itie awuọ mbakka iba unyọọñ amọ, sia mme awo ekenam utom ke afịd esịd ammọ.

7 Ado ke ini Sanbalad, Tobia, mbon Arab, mbon Amọn ye mbon Asdọd ekekoppo ke esʌk ekaiso ediọñ ndibene Yeruselem, ñko ke esʌk esiit mme ufañ se ikinaa, ammọ emaeyat esịd eti-eti. 8 Afịd ammọ emaedioomo adikinwana ye Yeruselem ñnyʌñ nsịn ntịme do. 9 Ado ñnyịn imaibọñ akam inọ Abasi ñnyịn inyʌñ inịm awoukpeme uweemeayio ye akonayio mbaak ammọ edinam ibak.

10 Ke ini ado, mbon Yuda emaebo ete, "Udịd asʌk akweeñe mme anamutom, ndin ñwuudo ndibene asʌk akpon se isʌhọ se ñnyịn imiikanna ibọp."

11 Ñko mme asua ñnyịn emaebo ete, "Mbemiso ammọ edọọdiọọñọ me ekekịt ñnyịn, ñnyịn iyaiba do ke atu ammọ inyʌñ iwot ammọ inyʌñ inam utom ado atre."

12 Akem mme Yuu e-ekedʌññọ ediana ammọ edibo ñnyịn akañ duob ete, "Nte ndufo ekakanna ekaa, ammọ eyainwana ñnyịn."

13 Ke ntoro ami mmaanịm mme awo ke edem usuuk-usuuk itie ke ndibene, ke mme itie se ekeme edikịt awo, nnịm ammọ ke ubon ke ubon, ekama akañkañ ammọ, ye eduad ammọ ye utịgha ammọ. 14 Ke ami mmaakese naña ñkpọ aba, ami mmaadakka nda ñnyʌñ mbo mme mbọọñ, mme adaaha ye afịd mbon awo nte, "Ikiibaak ammọ. Itoiyo Abọọñ, a-akponno anyʌñ anie uteeñe, ndin inwana ekọñ inọ mme ubon ndufo, nditọ ideen ye nditọ ibaan ndufo, ibaan ndọ ye mme ufọk ndufo."

15 Ke ini mme asua ñnyịn ekekoppo ke ñnyịn imidiọọñọ se ammọ eduak ñko ke Abasi abiat uduak ammọ, afịd ñnyịn imaitịmme ika ndibene, ikinam utom ñnyịn.

16 Tọọñọ ke usen ado, mbakka ideen mmi keed ke itie iba ekenam utom, ke ini mbakka keed ako ekekamake mme eduad, atuekọñ, utịgha ye mme afọñidem ekọñ. Mme ikpọawo ekọñ emaenyʌñ eda ke edem afịd ufọk Yuda 17 e-ekebọppọ ndibene. Mbon ekekoonoke ñkpọ utom ekenam utom ammọ ubọk keed enyʌñ ekama ñkpọ ekọñ ke ubọk uko 18 ndin mme abọbufọk keedekeed emaebọbọ akañkañ ammọ ke isịn naña ammọ ekenamma utom. Ado awo a-akefịtte adukpoñ akeba ye ami.

19 Ndin ami mmaabo mme mbọọñ, mme adaaha ye afịd mbon awo nte, "Utom ami akpon anyʌñ atara eti-eti, ñko ñnyịn iminyʌñ inyọọñ usʌñ ikpọñ emọ-emọ ke ndibene. 20 Itie akeedodo ake ndufo ediikop uyio adukpoñ, isoobo ñnyịn do. Abasi ñnyịn ayaanwana ekọñ inọ ñnyịn!"

21 Ntom ke ñnyịn ikikaa iso inam utom, mbakka ideen keed ke itie iba ekama eduad, tọọñọ ke usiere tutu mme ntantaafiọñ ewuọñọ. 22 Ke ini ado ami mmaanyʌñ mbo afịd awo nte, "Yak afịd awo ye mme andinwam ammọ eba ke Yeruselem akonayio, mbaak ammọ ikpeme ñnyịn akonayio enyʌñ enam utom uweemeayio." 23 Ndin ami me nditọete mmi me ideen mmi me mbon ukpeme e-ekebaaha ye ami ndomokeed ikisịññeke afọñidem ñnyịn ke idem; afịd awo ekekaakama ñkpọ ekọñ, idem idaha e-eyemme adikibọ mmọọñ.