* 1 Mbon se ikifiik ubọk ke ñwed ami ekedo:

Adaukara:

Nehimaiya ayịn Hakalia.

Sedekaiya, 2 Seraiya, Asaria, Yerimaiya,

3 Pasọ, Amaria, Malkiya,

4 Hatus, Sebania, Maluk,

5 Harim, Meremọd, Obadaiya,

6 Dandiel, Kinetọn, Baruk,

7 Mesulam, Abiya, Miyamịn,

8 Maasia, Bilkai ye Semaiya.

Mme aku ekedo ami.

9 Mme Lifai:

Yesua ayịn Asanaiya, Binui mme nditọ ideen Henadad, Kadmiel,

10 ye mme nsaña ammọ: Sebania,

Hodia, Kelita, Pelaiya, Hanan,

11 Mika, Rehob, Hasabaiya,

12 Saku, Serebia, Sebania,

13 Hodia, Bani ye Beninu.

14 Mme adadusʌñ mbon awo:

Paros, Pahad-Moab, Elam, Satu, Bani,

15 Buni, Askad, Bebai,

16 Adọniya, Bikfai, Adịn,

17 Ataa, Hesikaiya, Asọọ,

18 Hodia, Hasum, Besai,

19 Harif, Anatod, Nebai,

20 Makpias, Mesulam, Hesie,

21 Mesesabel, Sadọk, Yadua,

22 Pelatia, Hanan, Anaiya,

23 Hosie, Hananaiya, Hasub,

24 Halohes, Pilha, Sobek,

25 Rehum, Hasabna, Maaseiya,

26 Ahiya, Hanan, Anan,

27 Maluk, Harim ye Baana.

28 "Mbon se ikisʌhọ: mme aku, mme Lifai, mme akpeme inuaatob, mme akwọikwọ, mme anamutom ke tembịd ye afịd mbon se ikidiañña idem ikpọñ mbon idịd e-ekedʌññọ ediana ammọ ke ntak Mbed Abasi, ye mme ibaan ammọ ye mme nditọ ammọ ideen ye ibaan se inie iwuod ikan idiọọñọ ñkpọ; 29 afịd ami ediana ye nditọ Isrel ammọ, mme mbọọñ, enam isuuñọ ye unwọñọ adisaña ke Mbed Abasi ekenọọhọ eto ubọk Moses awo utom Abasi ye adinyʌñ ñkịt mbo ke iminam afịd item, mbed ye ewʌhọ Abọọñ ñnyịn.

30 "Ñnyịn iminwọñọ ibo ke ñnyịn idiinọọhọ mme ndʌñndiana idịd nditọ ibaan ñnyịn ke ndọ, idiinyʌññọ idọ nditọ ibaan ammọ inọ nditọ ideen ñnyịn.

31 "Mme ndʌñndiana idịd emaeben ñkpọ udua me mfịd inwañ ammọ idi adinyam ke usen Sabad, ñnyịn idiibọọhọ ammọ idep ke usen Sabad me ke adisana usen ndomokeed akeedodo. Kwa ayọhọ isua itiaba ñnyịn idiitọọhọ inwañ, ñko iyaibiat afịd isọn ifep, nọ mme andikama ekuukpe aba.

32 "Ñnyịn iminyịmme idat nte ubiọñutom, adinọ mbaak sekel keed ke itie ita* kwa isua nọ edat enam utom ke ufọk Abasi ñnyịn: 33 uyo ke akpokoro; uwa ñkpasi ye ufọfọb uwa; enọ ke mme Sabad, ke mme usọrọ Ufa Afiọñ ye mme usọrọ mfen se iba; adisana enọ; uwa ufeen idiọọkñkpọ adinam ñkpeubọk nnọọ Isrel; ye afịd utom ufọk Abasi ñnyịn.

34 "Ñnyịn, mme aku, mme Lifai ye afịd awo, imisịn afia nọ ediọọñọ idaha mme ubon ñnyịn keedekeed ediisiben ifia idi ufọk Abasi ñnyịn ke ini ekedotto kwa isua nọ efọp ke akpokoro uwa Abọọñ Abasi ñnyịn, naña ewet ke Mbed.

35 "Ñnyịn iminyʌñ inyịmme idat nte ubiọñutom, adiben akpa mfịd inwañ ñnyịn ye mme akpa mfịd afịd eto ndi ke ufọk Abọọñ kwa isua.

36 "Kpa naña esʌk ewet ke Mbed, ñnyịn iyaiben mme akpa nditọ ideen ñnyịn ye akpa ñyịnenañ ñnyịn, akpa ñyịnedọñ ye akpa ñyịnebod ñnyịn idi ufọk Abasi ñnyịn, idinọ mme aku se isaña utom do.

37 "Ke akanna ado, ñnyịn iyaiben akpa ukọkọk ndidia, enọ ñkpasi ñnyịn, akpa mfịd afịd eto ñnyịn ye ake ufa ukọd ye adan ọlif isọk mme aku ke ubeed ubonoñkpọ ke ufọk Abasi ñnyịn. Ñko iyainyʌñ iben ayọhọ mbaak duob ñkpọ inwañ ñnyịn isọk mme Lifai, sia ado mme Lifai esibọ ayọhọ mbaak duob ke afịd abio se ñnyịn inam utom. 38 Aku keed a-atooho ufọk Erọn anie adisaña ye mme Lifai ke ini ammọ ebọọhọ keed ke mbaak duob, ndin mme Lifai enie ediben mbakka keed ke itie duob ake afịd mme enọ ado keed ke itie duob ñkesịn ke ufọk Abasi ñnyịn, ke ubeed ubonoñkpọ ake itie unịmñkpọ. 39 Mbon Isrel, ye mme Lifai, enie adidat udeeme abakpa ammọ, ufa ukọd ye adan ọlif ndinịm ke mme ubeed ubonoñkpọ, itie e-ebonoke mme ñkpọ itieukpono ye ñkpọ mme aku e-esañake utom do, mme akpeme inuaatob ye mme akwọikwọ.

"Ñnyịn idiisioho anyen ikpọñ ufọk Abasi ñnyịn."